ମୟୂରଭଞ୍ଜ: ବିପଦରେ ଗଜରାଜ । ହାତୀଙ୍କ ଚଲାପଥରେ ମରଣାଯନ୍ତା ପାଲଟୁଛି ବିଦ୍ୟୁତ ତାର । ଭୂମିଠାରୁ ମାତ୍ର 10 ଫୁଟ ଉଚ୍ଚରେ ଝୁଲି ରହୁଛି 11 କେଭି ବିଦ୍ୟୁତ ତାର । ଏଥସହି ମୁକୁଳା ରହୁଛି ଟ୍ରାନ୍ସଫର୍ମର । ସରକାରୀ ନିୟମ ଅନୁଯାୟୀ ଟ୍ରାନ୍ସଫର୍ମର ଗୁଡିକରେ ତାରବାଡି ସହ ପାଚେରୀ ରଖିବା କଥା । କିନ୍ତୁ ବନ ବିଭାଗର ଖାମଖିଆଲ ନୀତି ଯୋଗୁ 3 ବର୍ଷରେ ଗଲାଣି 3 ହାତୀଙ୍କ ଜୀବନ ।
ଶିମିଳିପାଳ ଅଭୟାରଣ୍ୟ ହେଉ କିମ୍ବା ପଡୋଶୀ ରାଜ୍ୟର ଦଲମା ଜଙ୍ଗଲ । ଖାଦ୍ୟ ଅନ୍ବେଷଣରେ ମୟୂରଭଞ୍ଜ ଜିଲ୍ଲା ବେତନଟୀ ରେଞ୍ଜ ଅସନବଣୀକୁ ଆସୁଛନ୍ତି ହାତୀ । ମୟୂରଭଞ୍ଜ ଜିଲ୍ଲା ଦେଇ ନୀଳଗିରି ଅଭିମୁଖେ ବର୍ଷର 7 ରୁ 8 ମାସ ହାତୀ ଚଳପ୍ରଚଳ କରନ୍ତି । କିନ୍ତୁ ବନ ବିଭାଗ ଓ ବିଦ୍ୟୁତ ବିଭାଗ ଅପରାଗତରୁ ଜୀବନ ହାରୁଛନ୍ତି ହାତୀ । ବିଦ୍ୟୁତ ତାର ଓ ଟ୍ରାନ୍ସଫର୍ମର ଏପରି ବ୍ୟବସ୍ଥା ଦେଖି ବାରମ୍ବାର ସ୍ଥାନୀୟ ବାସିନ୍ଦା ଅଭିଯୋଗ ମଧ୍ୟ ଆଣିଛନ୍ତି । ହେଲେ ନା ଶୁଣୁଛି ବନ ବିଭାଗ ନା ବିଦ୍ୟୁତ ବିଭାଗ ।
ସେପଟେ, ବିପଦସଙ୍କୁଳ ଭାବେ ରହିଥିବା ବିଦ୍ୟୁତ ତାର ଓ ଖୁଣ୍ଟି ଚିହ୍ନଟ ଲାଗି ବନ ବିଭାଗ ପକ୍ଷରୁ ବିଦ୍ୟୁତ ବିଭାଗକୁ ଅର୍ଥ ଦିଆଯାଇଛି କହିଛି ବନଖଣ୍ଡ ଅଧକାରୀ । ବାରିପଦା ବନଖଣ୍ଡ ଅଧିନରେ ମୋଟ 545ଟି ବିଦ୍ୟୁତ ତାର ଓ ଖୁଣ୍ଟିକୁ ଚିହ୍ନଟ କରାଯାଇଥିବା ବେଳେ ମରାମତି ହୋଇଛି ମାତ୍ର 147ଟି ଖୁଣ୍ଟି । ଏଥିସହ ୨୦୧୪-୧୫ ଆର୍ଥିକ ବର୍ଷରେ ସରକାରଙ୍କୁ ବିଦ୍ୟୁତ ବିଭାଗ ମୋଟ ୨୫ କୋଟି ଟଙ୍କା ବ୍ୟୟ ଅଟକଳ କରି ପଠାଇଥିଲା । ହେଲେ ଚଳିତ ଆର୍ଥିକ ବର୍ଷରେ ରାଜ୍ୟ ସରକାର ବନ ବିଭାଗକୁ 15 କୋଟି 7 ଲକ୍ଷ ଟଙ୍କା ମଞ୍ଜୁର କରିଥିଲେ । କିନ୍ତୁ ସେଥିରୁ ମାତ୍ର 12କୋଟି ଟଙ୍କା ଖର୍ଚ୍ଚ କରିଛି ବିଦ୍ୟୁତ ବିଭାଗ । ଯଦି ଟଙ୍କା ହାତୀଙ୍କ ପାଇଁ ଖର୍ଚ୍ଚ ହୋଇନି ତେବେ କାହା ପାଇଁ ଟଙ୍କା ଖର୍ଚ୍ଚ ହୋଇଛି ବୋଲି ପ୍ରଶ୍ନ କରିଛନ୍ତି ପୂର୍ବତନ ଅବୈତନିକ ବନ୍ୟପ୍ରାଣୀ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
