ରାଇରଙ୍ଗପୁର: ଅଜ୍ଞାନର ଅନ୍ଧାରରୁ ଜ୍ଞାନର ଆଲୋକକୁ ଯିଏ ଘେନି ଯାଆନ୍ତି, ତାଙ୍କୁ ଗୁରୁ ବା ଶିକ୍ଷକ କହନ୍ତି । କିନ୍ତୁ ବର୍ତ୍ତମାନ ସମୟରେ ଯେ କିଛି ଶିକ୍ଷକ ରାକ୍ଷସ ପାଲଟି ଯାଉଛନ୍ତି ତାହାର ଜ୍ଵଳନ୍ତ ଉଦାହରଣ ଦେଖିବାକୁ ମିଳିଛି ଠାକୁରମୁଣ୍ଡା ବ୍ଲକ ଖଣ୍ଡବନ୍ଧ ଗ୍ରାମପଞ୍ଚାୟତରେ । ଜିଲ୍ଲାରେ ପୁଣି ଜଣେ ଛାତ୍ରୀଙ୍କୁ ଗର୍ଭବତୀ ହୋଇଥିବା ଘଟଣା ସାମ୍ନାକୁ ଆସିଛି । ଜଣେ ନବମ ଶ୍ରେଣୀ ପଢୁଥିବା ଛାତ୍ରୀଙ୍କୁ ଟିଉସନ ସାର ଗର୍ଭବତୀ କରାଇଥିବା ନେଇ ଠାକୁରମୁଣ୍ଡା ଥାନାରେ ଅଭିଯୋଗ ହୋଇଛି ।
ଏହା ମଧ୍ୟ ପଢ଼ନ୍ତୁ: ଶୈଶବରୁ ବାପାଙ୍କ ଅଧୁରା ସ୍ବପ୍ନ ପୂରଣ କରିବାକୁ ସଂକଳ୍ପ, ୩୫ କିମି ଦୌଡ଼ିଲେ ତିନି ଶିଶୁ ଧାବକ
ସୂଚନା ଅନୁଯାୟୀ, ଶିକ୍ଷକ ଜଣକ ହେଉଛନ୍ତି ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ଖଣ୍ଡବନ୍ଧ ଗ୍ରାମପଞ୍ଚାୟତର ରବିନ୍ଦ୍ର କୁମାର ମହାନ୍ତ । ସେ କେନ୍ଦୁଜିଆଣୀ ଗ୍ରାମପଞ୍ଚାୟତ ଅନ୍ତର୍ଗତ ଜଡିବିଲ ଉଚ୍ଚ ବିଦ୍ୟାଳୟରେ ଶିକ୍ଷକତା କରନ୍ତି । ସମୟ କ୍ରମେ ରବୀନ୍ଦ୍ର ନିଜ ଗ୍ରାମର କିଛି ଛାତ୍ରଛାତ୍ରୀଙ୍କୁ ନେଇ ଟିଉସନ ଆରମ୍ଭ କରିଥିଲେ । ଉକ୍ତ ଟିଉସନରେ ଠାକୁରମୁଣ୍ଡା ଥାନା ଅଧୀନସ୍ଥ ଏକ ଅଞ୍ଚଳର ଜନୈକ ନବମ ଶ୍ରେଣୀର ଛାତ୍ରୀ ମଧ୍ୟ ଟିଉସନ ପଢିବାକୁ ଆସୁଥିଲେ । ତେବେ ଶିକ୍ଷକ ରବୀନ୍ଦ୍ର ଉକ୍ତ ନାବାଳିକାକୁ ବିଭିନ୍ନ ପ୍ରଲୋଭନ ତଥା ଧମକଚମକ ଦେଇ ଦୁଷ୍କର୍ମ କରିଥିବା ନେଇ ନାବାଳିକା ଜଣକ ଅଭିଯୋଗ କରିଛନ୍ତି ।
ଏହା ମଧ୍ୟ ପଢ଼ନ୍ତୁ: ଘରୋଇ କମ୍ପାନୀ ହାତରେ ରାଉରକେଲା ସୁପର ସ୍ପେସିଆଲିଷ୍ଟ ହସ୍ପିଟାଲ, ବଢ଼ୁଛି ଜନ ଅସନ୍ତୋଷ
ନାବାଳିକାଙ୍କ ଅଭିଯୋଗ ଅନୁଯାୟୀ, ସେ ଟିଉସନ ଯିବା ଦିନଠାରୁ ରବୀନ୍ଦ୍ର ବିଭିନ୍ନ ସମୟରେ ନାବାଳିକାଙ୍କୁ ଦୁଷ୍କର୍ମ କରୁଥିବାରୁ ସେ ବର୍ତ୍ତମାନ ଗର୍ଭବତୀ ଥିବାନେଇ ସୂଚନା ଦେଇଛନ୍ତି । ତେବେ ପରିବାର ଲୋକେ ଏନେଇ ଜାଣିବା ପରେ ଥାନାର ଦ୍ବାରସ୍ଥ ହୋଇଛନ୍ତି । ଗତ ଶନିବାର ନାବାଳିକାଙ୍କୁ ନ୍ୟାୟ ପ୍ରଦାନ କରିବା ପାଇଁ ତାଙ୍କ ମାଆ ଠାକୁରମୁଣ୍ଡା ଥାନାରେ ପହିଞ୍ଚି ଥିଲେ । ଘଟଣା ସମ୍ପର୍କରେ ଠାକୁରମୁଣ୍ଡା ଥାନା ଅଧିକାରିଣୀଙ୍କୁ ଅବଗତ କରେଇବା ପରେ ଥାନାରେ ଏକ ଲିଖିତ ଅଭିଯୋଗ ଦାଖଲ କରିଥିଲେ । ତେବେ ଏହି ଘଟଣା ପ୍ରଚାରିତ ହେବା ପରେ ଉକ୍ତ ଶିକ୍ଷକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାଧାରଣରେ ଦାବି ଜୋର ଧରିଛି । ସେପଟେ ଠାକୁରମୁଣ୍ଡା ଥାନା ପୋଲିସ ଉକ୍ତ ଶିକ୍ଷକଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି । କିନ୍ତୁ ଶିକ୍ଷକ ଜଣକ ଫେରାର ଥିବାରୁ ବର୍ତ୍ତମାନ ସୁଦ୍ଧା ତାଙ୍କୁ ଗିରଫ କରିବାରେ ଅସମର୍ଥ ହୋଇଛି ପୋଲିସ ।
ଇଟିଭି ଭାରତ, ରାଇରଙ୍ଗପୁର
