ବାରିପଦା: ମୟୂରଭଞ୍ଜ ଜିଲ୍ଲା ବାଙ୍ଗରିପୋଷି ବ୍ଲକ ବୁଢାମରା ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ବିଭିନ୍ନ ଅବ୍ୟବସ୍ଥାକୁ ନେଇ ତାଲା ପକାଇଲେ ସ୍ଥାନୀୟ ଗ୍ରାମବାସୀ ଓ ଅଭିଭାବକ । ଖବର ପାଇ ବିଇଓ , ସରପଞ୍ଚ ଓ ପଞ୍ଚାୟତ ସମିତି ସଭ୍ୟ ସେଠାରେ ପହଞ୍ଚିଲା ପରେ ତାଙ୍କୁ ମଧ୍ୟ ତାଲା ପକେଇ ଅଟକ ରଖିଲେ ଗ୍ରାମବାସୀ ।
ଅଭିଯୋଗ ମୁତାବକ ବିଦ୍ୟାଳୟର ଛାତ ଫାଟି ପାଣି ପଡୁଥିବା ବେଳେ ଅନେକ ସମୟରେ ଛାତରୁ ପ୍ଲାଷ୍ଟର ଖସୁଛି । ସମସ୍ତ ଶ୍ରେଣୀ ଗୃହର ଅବସ୍ଥା ସଙ୍କଟାପନ୍ନ । ଏନେଇ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀଙ୍କ କହିବା କଥା ହେଲା ସେ ଏବାବଦରେ ଅନେକ ସମୟରେ ବିଇଓ ଏବଂ ବିଡିଓଙ୍କୁ ଜଣାଇଛନ୍ତି । ମାତ୍ର କୌଣସି ପଦକ୍ଷେପ ନିଆଯାଇନାହିଁ ।
ସେପଟେ ଏସମ୍ପର୍କରେ ବିଇଓଙ୍କ କହିବା କଥା ହେଲା ଏବାଦରେ ସେ ପୂର୍ବରୁ ଅବଗତ ନଥିଲେ । ଆଜି ବିଦ୍ୟାଳୟ ଆସିବାରୁ ସ୍କୁଲର ବିପଦସଙ୍କୁଳ ଅବସ୍ଥା ଦେଖିଥିଲେ । ଘଟଣା ସ୍ଥଳରେ ବାଙ୍ଗିରିପୋଷି ବିଡିଓ ପହଞ୍ଚି ସେମାନଙ୍କୁ ମୁକୁଳେଇବା ସହିତ ଶୁକ୍ରବାର ଜିଲ୍ଲାପାଳଙ୍କ ନିକଟକୁ ଯାଇ ଏ ବିଷୟରେ ଆଲୋଚନା କରିବେ ବୋଲି କହିବା ପରେ ସ୍କୁଲରୁ ତାଲା ଖୋଲାଯାଇଥିଲା।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
