ବାରିପଦା: ମୟୂରଭଞ୍ଜ ଶ୍ୟାମାଖୁଣ୍ଟା ବି.ଡି.ଓ ଶ୍ରୀ ଜୟକୃଷ୍ଣ ପାତ୍ରଙ୍କୁ ବିଜେଡି କର୍ମୀମାନେ ଦୁର୍ବ୍ୟବହାର ହୋଇଥିବା ଅଭିଯୋଗ ହୋଇଥିଲେ । କିନ୍ତୁ ଅଭିଯୋଗ ପରେ ମଧ୍ୟ ପୋଲିସ ଦୋଷୀଙ୍କୁ ଗିରଫ କରିନଥିବା ଅଭିଯୋଗ ହୋଇଛି । ଦୋଷୀଙ୍କୁ ଗିରଫ ଦାବିରେ ବିଜେପି ପକ୍ଷରୁ ସଦର ଥାନା ଘେରାଉ କରାଯାଇଛି ।
ଘଟଣା ଅନୁସାରେ ଗତ ଜୁନ ୩ ତାରିଖ ଦିନ ମୟୂରଭଞ୍ଜ ଜିଲ୍ଲା ଶ୍ୟାମଖୁଣ୍ଟା ବ୍ଲକ ଉନ୍ନୟନ ଅଧିକାରୀ(ବିଡିଓ) ଜୟକୃଷ୍ଣ ପାତ୍ରଙ୍କୁ ବିଲ ଦସ୍ତଖତ ପାଇଁ ଜବରଦସ୍ତ ବାଧ୍ୟ କରିଥିଲେ କିଛି ବିଜେଡି କର୍ମୀ । ବିଡିଓ ବିଜୁ ଜନତା ଦଳର କର୍ମୀଙ୍କ ଆକ୍ରମଣରେ ଶିକାର ହୋଇଥିଲେ ଓ କର୍ମୀମାନେ କାର୍ଯ୍ୟାଳୟର ଆସବାବପତ୍ର ଭଙ୍ଗାରୁଜା କରିବା ଓ ଧମକପୂର୍ଣ୍ଣ ଚେତବନୀ ମଧ୍ୟ ଦେଇଥିଲେ । ତେବେ ଏ ନେଇ ଜୁନ ୫ ତାରିଖ ଦିନ ବିଡିଓ ବାରିପଦା ସଦର ଥାନାରେ 5 ଜଣଙ୍କ ବିରୁଦ୍ଧରେ ଏତଲା ଦେଇଥିଲେ । ତେବେ ପୋଲିସ ଘଟଣାରେ ଏ ପର୍ଯ୍ୟନ୍ତ କାହାକୁ ଗିରଫ କରିନାହିଁ ।
ତେବେ ବିଜେପି ଜିଲ୍ଲା ସଭାପତିଙ୍କ ଅଭିଯୋଗ ଅନୁଯାୟୀ ବିଜେଡିର ଟାଣୁଆ ନେତା ତଥା ରାଜସ୍ବ ମନ୍ତ୍ରୀ ସୁଦାମ ମାର୍ଣ୍ଡିଙ୍କ ସମର୍ଥକମାନେ ବିଡିଓଙ୍କୁ ଧମକ ଦେଇ ବିଭିନ୍ନ କାର୍ଯ୍ୟର ବିଲ କରାଇବା ପାଇଁ ବାଧ୍ୟ କରିଛନ୍ତି ଓ ପୋଲିସ ମଧ୍ୟ ଶାସକ ଦଳର କର୍ମୀ ହୋଇଥିବା ଯୋଗୁଁ ଏ ଯାଏଁ ଗିରଫ କରିନାହିଁ । ବିଡିଓଙ୍କୁ ଦୁର୍ବ୍ୟବହାର କରିଥିବା ବିଜେଡି କର୍ମୀଙ୍କୁ ତୁରନ୍ତ ଗିରଫ ଦାବିରେ ବୁଧବାର ମୟୂରଭଞ୍ଜ ବିଜେପି ପକ୍ଷରୁ ବାରିପଦା ସଦର ଥାନା ସମ୍ମୁଖରେ ଧାରଣା ଦିଆଯାଇଥିଲା । ତେବେ ବାରିପଦା ଏସଡିପିଓ କେ କେ ହରିପ୍ରସାଦ କହିଛନ୍ତି ସଦର ଥାନାରେ ବିଡିଓଙ୍କୁ ଆକ୍ରମଣ ନେଇ ୫ ଜଣଙ୍କ ନାଁରେ ଅଭିଯୋଗ କରିଛନ୍ତି । ତେବେ ଘଟଣାର ତଦନ୍ତ ଜାରି ରହିଛି, ଖୁବଶୀଘ୍ର ଦୋଷୀଙ୍କୁ ଗିରଫ କରାଯିବା ନେଇ କହିଛନ୍ତି ଏସଡିପିଓ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
