ବାରିପଦା: ପରକୀୟା ପ୍ରୀତିକୁ କେନ୍ଦ୍ର କରି ସ୍ବାମୀକୁ ହତ୍ୟା କଲା ସ୍ତ୍ରୀ । ସୁପାରି କିଲର ଦ୍ବାରା ଟଙ୍କା ଦେଇ ସ୍ବାମୀକୁ ହତ୍ୟା କରିଛି ସ୍ତ୍ରୀ । ଏଭଳି ଏକ ଜଘନ୍ୟ ହତ୍ୟାକାଣ୍ଡର ପର୍ଦ୍ଦାଫାସ କରିଛି ବାରିପଦା ଟାଉନ ପୋଲିସ ।
ସୂଚନା ଅନୁସାରେ ବାରିପଦା ଟାଉନ ଥାନା ଅଧିନ ଛାଞ୍ଚ ଅଞ୍ଚଳର ଆଦିତ୍ୟ କୁମାର ପଣ୍ଡାଙ୍କର ଗତ ୨୮ ତାରିଖରେ ମୃତ୍ୟୁ ଘଟିଥିଲା । ମୃତ୍ୟୁର କାରଣ ଅସ୍ପଷ୍ଟ ଥିଲା । ଆଦିତ୍ୟଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ କରିଥିଲେ ତାଙ୍କ ପରିବାର ଲୋକେ । ଆଦିତ୍ୟଙ୍କୁ ତାଙ୍କ ସ୍ତ୍ରୀ ଚନ୍ଦନା ହତ୍ୟା କରିଛି ବୋଲି ଅଭିଯୋଗ ଆଣିଥିଲେ ଆଦିତ୍ୟଙ୍କ ବାପା । ବାରିପଦା ଟାଉନ ଥାନା ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା ।
ମୃତ ଆଦିତ୍ୟଙ୍କ ପତ୍ନୀ ଚନ୍ଦନା ସହ ଦିଅରର ଅନୈତିକ ସମ୍ପର୍କ ଥିବା ତଦନ୍ତରୁ ପୋଲିସ ଜାଣିବାକୁ ପାଇଥିଲା । ସ୍ବାମୀଙ୍କ ନିକଟରୁ ଶାରୀରିକ ସୁଖ ନପାଇବାରୁ ତାଙ୍କୁ ହତ୍ୟା କରିବା ନେଇ ଯୋଜନା କରିଥିଲା ସ୍ତ୍ରୀ । ସୁପାରି କିଲର ମାଧ୍ୟମରେ ହତ୍ୟା କରିବାକୁ ଯୋଜନା ପ୍ରସ୍ତୁତ କରିଥିଲା ସ୍ତ୍ରୀ ଚନ୍ଦନା । ହତ୍ୟାକାଣ୍ଡରେ ଜଡିତ ପଶ୍ଚିମବଙ୍ଗ ମୁର୍ଶିଦାବାଦର ସୁପାରୀ କିଲର ଜମୀର ସେଖ ଫେରାର ଅଛି । ଆଦିତ୍ୟଙ୍କ ସ୍ତ୍ରୀ ଚନ୍ଦନା ପଣ୍ଡା ଓ ଅନ୍ୟତମ ସହଯୋଗୀ ପଶ୍ଚିମବଙ୍ଗ ମୁର୍ଶିଦାବାଦର ଲାଲଟୁ ସେଖକୁ ଗିରଫ କରିଛି ପୋଲିସ ।
ଲାଲଟୁ ଶେଖ ଆଦିତ୍ୟଙ୍କ ଘରେ ଘରକାମ କରୁଥିଲା । ପୂର୍ବ ଯୋଜନା ମୁତାବକ ଲାଲଟୁ ଶେଖ ହତ୍ୟାକାଣ୍ଡ ପାଇଁ ମୁର୍ଶିଦାବାଦରୁ ଦୁଇ ଲକ୍ଷ ଟଙ୍କାରେ ଏହି ସୁପାରୀ କିଲରକୁ ଠିକ କରିଥିଲା । ସୁପାରୀ କିଲର ଗତ ୨୭ ତାରିଖରେ ଘରେ ପହଞ୍ଚି ଆଦିତ୍ୟ ଶୋଇଥିବା ସମୟରେ ତାଙ୍କୁ ତଣ୍ଟି ଚିପି ହତ୍ୟା କରିଥିଲା । ତେବେ ହତ୍ୟାକାଣ୍ଡରେ ସ୍ତ୍ରୀ ମଧ୍ୟ ସାହାଯ୍ୟ କରିଥିଲା ବୋଲି ପୋଲିସ କହିଛି । ଅନ୍ୟପକ୍ଷରେ ସୁପାରୀ କିଲରକୁ ଟଙ୍କା ଦେବାପାଇଁ ଚନ୍ଦନା ନିଜ ଘରେ ରଖିଥିଲା 30 ହଜାର ଟଙ୍କା । ଯାହାକୁ ପୋଲିସ ଜବତ କରିଛି । ଅନ୍ୟତମ ମୁଖ୍ୟ ଅଭିଯୁକ୍ତ ସୁପାରୀ କିଲରକୁ ମଧ୍ୟ ଶିଘ୍ର ଗିରଫ କରାଯିବ ବୋଲି କହିଛି ପୋଲିସ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
