ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା କରଞ୍ଜିଆ ବ୍ଳକ ଅନ୍ତର୍ଗତ ତାଟୋ ଅଞ୍ଚଳର ଏକ ସରକାରୀ ବାଳିକା ବିଦ୍ୟାଳୟରୁ ୩ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏ ନେଇ ମୟୂରଭଞ୍ଜ ମଙ୍ଗଳ ଅଧିକାରୀ ଚିତ୍ତରଞ୍ଜନ ମହାପାତ୍ର ସୂଚନା ଦେଇଛନ୍ତି ।
ଗତ ଦୁଇଦିନ ପୂର୍ବରୁ ଦୁଇ ଜଣ ଛାତ୍ରୀ ଏବଂ ଜଣେ ମାଟ୍ରୋନଙ୍କ ସ୍ୱାସ୍ଥ୍ୟ ଅବସ୍ଥା ଅସ୍ଵାଭାବିକ ହେବାରୁ ତାଙ୍କର କୋରୋନା ପରୀକ୍ଷା ହୋଇଥିଲା । ଫଳରେ ଦୁଇ ଜଣ ଛାତ୍ରୀଙ୍କ ସହିତ ମାଟ୍ରୋନଙ୍କ କୋରୋନା ପଜିଟିଭ ଥିବା ଜଣାପଡିଥିଲା । ତେଣୁ ଗତକାଲି ପାଖରୁ ସ୍କୁଲକୁ ବନ୍ଦ ରଖାଯାଇଥିବାର ସୂଚନା ମିଳିଛି । ସେପଟେ ହଷ୍ଟେଲରେ ୧୧୪ ଜଣ ଛାତ୍ରୀ ରହୁଥିବା ବେଳେ ସେମାନଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି ।
ଆକ୍ରାନ୍ତ ଛାତ୍ରୀ ଏବଂ ମାଟ୍ରୋନଙ୍କୁ ସ୍କୁଲ ସଙ୍ଘରୋଧ ଗୃହରେ ରଖି ତାଙ୍କର ଚିକିତ୍ସା କରାଯାଉଛି । ତେବେ ସ୍କୁଲରେ ପଢ଼ୁଥିବା ସମସ୍ତ ଛାତ୍ରୀ ସମେତ ଶିକ୍ଷକଙ୍କ କୋରୋନା ପରୀକ୍ଷା ଗତକାଲି ପାଖରୁ କରାଯାଉଛି । ବର୍ତ୍ତମାନ ସୁଧା ୧୧୪ ଜଣଙ୍କ RTPCR ଟେଷ୍ଟ ହୋଇଥିବା ବେଳେ ସମସ୍ତଙ୍କ ରିପୋର୍ଟ ନେଗେଟିଭ ଆସିଛି । ତେବେ ସ୍କୁଲରେ ସାନିଟାଇଜ ସହିତ ସମସ୍ତ ଆଗୁଆ ସତର୍କତାମୂଳକ ପଦକ୍ଷେପ ନିଆ ଯାଉଥିବା ସୂଚନା ଦେଇଛନ୍ତି ଜିଲ୍ଲା ମଙ୍ଗଳ ଅଧିକାରୀ ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
