ମାଲକାନଗିରି: ଜିଲ୍ଲାର mv-13 ନିକଟରେ ଥିବା ନାଳରେ କ୍ଷତାକ୍ତ ଅବସ୍ଥାରେ ପଡି ରହିଥିବା ହେଟାବାଘକୁ ବନବିଭାଗ ସୋମବାର ଉଦ୍ଧାର କରିଛି । ସ୍ଥାନୀୟ ଅଞ୍ଚଳରେ ଥିବା ପଶୁ ଡାକ୍ତରଖାନାରେ ଯନ୍ତା ମଧ୍ୟରେ ସୁରକ୍ଷିତ ଭାବେ ରଖାଯାଇ ଚିକିତ୍ସା କରାଯାଉଛି ।
କ୍ଷତାକ୍ତ ଅବସ୍ଥାରେ ଦୀର୍ଘ ସମୟ ଧରି ହେଟା ବାଘ ନାଳରେ ଗୁରୁତର ଭାବେ ପଡି ରହିଥିଲା । ସ୍ଥାନୀୟ ଲୋକମାନେ ହେଟା ବାଘକୁ ଦେଖିବା ପରେ ଜିଲ୍ଲାର ବନ ବିଭାଗକୁ ସୂଚନା ଦେଇଥିଲେ । ଖବର ପାଇବା ପରେ ବନ ବିଭାଗ ପହଞ୍ଚି ଅସୁସ୍ଥ ହେଟାବାଘକୁ ଉଦ୍ଧାର କରି ନିକଟସ୍ଥ ପଶୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ତେବେ ହେଟାକୁ ଯନ୍ତା ମଧ୍ୟରେ ସୁରକ୍ଷିତ ଭାବେ ରଖାଯାଇ ମାଲକାନଗିରି ଜିଲ୍ଲା ମୁଖ୍ୟ ପଶୁ ଡାକ୍ତରଖାନାରେ ଚିକିତ୍ସା କରାଯାଉଛି । କୋରୁକୋଣ୍ଡା, ପାଣ୍ଡ୍ରିପାଣି ଏବଂ ମାଲକାନଗିରି ବନବିଭାଗ ମିଳିତ ଉଦ୍ୟମରେ ହେଟା ବାଘକୁ ଉଦ୍ଧାର କରାଯାଇଥିଲା । ହେଟା ବାଘ ସୁସ୍ଥ ହେଲେ ପୁଣି ଜଙ୍ଗଲରେ ଛଡ଼ାଯିବ ବୋଲି ମାଲକାନଗିରି ବନ ଅଧିକାରୀ ସୂଚନା ଦେଇଛନ୍ତି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
