ମାଲକାନଗିରି: ବାରମ୍ବାର ଦାବି ସତ୍ତ୍ବେ ପ୍ରଶାସନ କରିପାରିଲାନି 300 ମିଟର ଆପ୍ରୋଚ ରୋଡ୍ । ଶେଷରେ ବାଧ୍ୟ ହୋଇ ମାଲକାନଗିରି ଜିଲ୍ଲା ‘ମୋଟୁ’ ଅଞ୍ଚଳବାସୀ ନିଜେ ତିଆରି କରୁଛନ୍ତି ଏହି ରାସ୍ତା ।
ଆନ୍ଧ୍ରପ୍ରଦେଶ ଓ ଛତିଶଗଡ ସୀମାକୁ ଲାଗିଥିବା ଏହି ଅଞ୍ଚଳର ଦୁଇ ପାର୍ଶ୍ବରେ ପ୍ରବାହିତ ହେଉଛି ସିଲେରୁ ଓ ସାବେରି ନଦୀ । ସିଲେରୁ ନଦୀ ଉପରେ ଆନ୍ଧ୍ର ସରକାର ପୋଲ ନିର୍ମାଣ କରିଥିବାବେଳେ ସାବେରି ନଦୀ ଉପରେ ଛତିଶଗଡ ସରକାର ପୋଲ ନିର୍ମାଣ କାମ ଆରମ୍ଭ କରିଛନ୍ତି । ତେବେ ସିଲେରୁ ପୋଲର ଓଡିଶା ପଟ ଅଞ୍ଚଳରେ ଆପ୍ରୋଚ ରୋଡ ହୋଇପାରିନାହିଁ । ବାରାମ୍ବାର ଅଭିଯୋଗ ପରେ ପ୍ରଶାସନ ନଶୁଣିବାରୁ ‘ମୋଟୁ’ ଅଞ୍ଚଳବାସୀ କାମକୁ ନିଜେ କରୁଛନ୍ତି ।
ପ୍ରତିଦିନ ଆନ୍ଧ୍ରକୁ ଯିବା ପାଇଁ ଶହ ଶହ ଲୋକେ ଏଠାରେ ନଦୀ ପାର ହୁଅନ୍ତି । ତେବେ ସିଲେରୁ ନଦୀ ଉପରେ ପୋଲ ନିର୍ମାଣ ହେବା ପରେ ଲୋକେ ବିପଦସଙ୍କୁଳ ଅବସ୍ଥାରେ ନଦୀ ପାର ହେବାରୁ ରକ୍ଷା ପାଇବେ ବୋଲି ଆଶା ବାନ୍ଧିଥିଲେ । କିନ୍ତୁ ପ୍ରଶାସନ ଆପ୍ରୋଚ ରୋଡ ନକରିବାରୁ ନିଜେ କାମ ଆରମ୍ଭ କରିଛନ୍ତି ଅଞ୍ଚଳବାସୀ । ସେପଟେ ଏନେଇ ଖୁବଶିଘ୍ର ଟେଣ୍ଡର ହେଉଥିବା କହିଛନ୍ତି ବିଭାଗୀୟ କର୍ତ୍ତୃପକ୍ଷ ।
ତେବେ ପୋଲ ସମାପ୍ତ ହେବାର ୭ ମାସ ପରେ ବି ୩୦୦ ମିଟର ରାସ୍ତା ସରକାର ତିଆରି କରିପାରି ନଥିବାରୁ ମୋଟୁ ଅଞ୍ଚଳବାସୀ ନିଜେ ତିଆରି କରିଛନ୍ତି ଏହି ରାସ୍ତା । ଫଳରେ ଉଦଘାଟନ ପୁର୍ବରୁ ପୋଲ ଉପରେ ଆରମ୍ଭ ହୋଇଛି ସାଧାରଣ ଲୋକଙ୍କ ଜୀବନ ଯାତ୍ରା ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
