ମାଲକାନଗିରି: ବଣ୍ଡା ଘାଟିରେ ଓଲଟିଲା ଅଗ୍ନିଶମ ବିଭାଗର ଗାଡି । ଏଥିରେ ୫ ଜଣ ଅଗ୍ନିଶମ ବିଭାଗର କର୍ମଚାରୀ ଥିବାବେଳେ ସେଥି ମଧ୍ୟରୁ ୪ ଜଣ ଆହତ ହୋଇଛନ୍ତି । ଜଣଙ୍କର ଅବସ୍ଥା ଗୁରୁତର ରହିଛି ।
ଆଜି(ରବିବାର) ମାଲକାନଗିରି ଜିଲ୍ଲା ବଣ୍ଡା ଘାଟିର ମୁଦୁଲିପଡ଼ାରେ ପୋଲିସ ଡିଜିପିଙ୍କ ହେଲିକପ୍ଟର ଯୋଗେ ଗସ୍ତ ଥିବାରୁ କୁଡୁମୁଳୁଗୁମ୍ମାର ଅଗ୍ନିଶମ ବିଭାଗର ଗାଡି ମୁଦୁଲିପଡ଼ା ଯାଉଥିଲା । ଏହି ସମୟରେ ଭାରସାମ୍ୟ ହରାଇ ଓଲଟି ପଡିଛି ଅଗ୍ନିଶମ ବିଭାଗର ଗାଡି। ଖଇରପୁଟ ଚିକିତ୍ସାଳୟରେ ପ୍ରାଥମିକ ଚିକିତ୍ସା କରାଯିବା ପରେ ଗୁରୁତରଙ୍କୁ ମାଲକାନଗିରି ସଦର ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ଆହତମାନେ ହେଲେ ମନୋଜ କୁମାର ସେଠୀ, ଉମାଶଙ୍କର ନାୟକ, ସରଙ୍ଗାଧର ହାତୀ, ପ୍ରକାଶ ଚନ୍ଦ୍ର ନାୟକ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
