ମାଲକାନଗିରି: ଜିଲ୍ଲାରେ ଗୁଣି ଗାରେଡି ସନ୍ଦେହରେ ଜଣେ ଯୁବକଙ୍କୁ ହତ୍ୟା ଅଭିଯୋଗରେ 6 ଜଣଙ୍କୁ ଗିରଫ କରି ପୋଲିସ କୋର୍ଟ ଚାଲାଣ କରିଥିବା ଜଣାପଡିଛି ।
ସୂଚନାନୁଯାୟୀ, ମାଲକାନଗିରି ଅନ୍ତର୍ଗତ କେନ୍ଦୁଗୁଡାରେ ଗତ 3 ମାସ ମଧ୍ୟରେ 17 ଜଣ ଗ୍ରାମବାସୀଙ୍କର ଆଜମା ରୋଗରେ ମୃତ୍ୟୁ ହୋଇଥିଲା । ଏପରିକି 10 ଗ୍ରାମବାସୀ ଆଜମା ରୋଗରେ ଆକ୍ରାନ୍ତ ମଧ୍ୟ ହୋଇଛନ୍ତି । ଗୁଣିଗାରେଡି ହେତୁ ଏପରି ହେଉଥିବା ନେଇ ପ୍ରଥମେ ଗ୍ରାମବାସୀ ସନ୍ଦେହ କରିଥିଲେ । ପରେ କିଛି ଯୁବକ ଗାଁର ସମରା ମାଡକାମି ଗୁଣି ଗାରେଡି କରି ଲୋକଙ୍କୁ ମାରୁଥିବା ସନ୍ଦେହ କରି ଅତି ନିର୍ମମ ଭାବରେ ତାଙ୍କର ହତ୍ୟା କରିଦେଇଥିଲେ ।
ଏହାପରେ ଉକ୍ତ ଯୁବକକୁ ଜଙ୍ଗଲ ଭିତରେ ପୋତି ଦେଇଥିଲେ । ଯୁବକଙ୍କ ପରିବାର ଲୋକଙ୍କ ଅଭିଯୋଗ ଆଧାରରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା । ଏହାସହ ଏକ ହତ୍ୟା ମାମଲା ରୁଜୁ କରିଥିଲା । ଏହି ଘଟଣାରେ ପୋଲିସ କେନ୍ଦୁଗୁଡାର 6 ଜଣ ଯଥା ଦେବ ମାଡକାମି, ଶୁକ୍ରା କବସି, ଆଡମା ମାଢି, ବୁଦ୍ରା ମୁସକି, ଆଇତା କବସି ଏବଂ ରାମ ମଧିକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
