ମାଲକାନଗିରି: ପଡୋଶୀ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଉଥିବାବେଳେ 3 ନାବାଳିକା ଉଦ୍ଧାର । ମାଲକାନଗିରି ମୋଟୁ ଥାନା ପୋଲିସ ବୁଧବାର ରାତ୍ରିରେ ସେମାନଙ୍କୁ ଉଦ୍ଧାର କରିଛି । ତିନି ଜଣ ନାବାଳିକାଙ୍କୁ ସିଡବ୍ଲ୍ୟୁସି ପକ୍ଷରୁ ପଚରାଉଚରା କରାଯିବା ପରେ ସେମାନଙ୍କ ଅଭିଭାବକକୁ ଡକାଇ ସେମାନଙ୍କ ପାଠ ପଢିବା ନେଇ ସମସ୍ତ ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦିଆଯାଇଛି ।
ନାବାଳିକାମାନେ ଆନ୍ଧ୍ର୍ରର ଏକ ପେପର ମିଲକୁ କାମ କରିବାକୁ ଯାଉଥିବା ଜଣାପଡିଛି । ଏନେଇ ମାଲକାନଗିରି ପୋଲିସକୁ ମୋଟୁ ପୋଲିସ ଖବର ଦେବା ପରେ ପୋଲିସ ଅଧିକାରୀ ରାମ ପ୍ରସାଦ ନାଗଙ୍କ ନିର୍ଦ୍ଦେଶରେ କିଛି ପୋଲିସ କର୍ମଚାରୀ ସେଠାରେ ପହଞ୍ଚିଥିଲେ । ଏହି ତିନି ଜଣ ନାବାଳିକାକୁ ଉଦ୍ଧାର କରି ସିଡବ୍ଲୁସି ନିକଟରେ ହାଜର କରାଇଥିଲେ।
ମାଲକାନଗିରି ଅଞ୍ଚଳରୁ ପ୍ରତିଦିନ ଶହ ଶହ ସଂଖ୍ୟାରେ ନାବାଳକ ଏବଂ ନାବାଳିକାମାନେ ବିଭିନ୍ନ ଉପାୟରେ ଜିଲ୍ଲାରୁ ଖସି ବାହାର ଜିଲ୍ଲାରେ ପହଞ୍ଚୁଛନ୍ତି । ଦଲାଲମାନେ ପୋଲିସ ଏବଂ ଶ୍ରମ ବିଭାଗ ଆଖିରେ ଧୂଳି ଦେଇ ଏମାନଙ୍କୁ ଜିଲ୍ଲା ପାର କରାଇବାରେ ସକ୍ଷମ ହେଉଛନ୍ତି । ବର୍ତ୍ତମାନ ସ୍କୁଲ କଲେଜ ବନ୍ଦ ଥିବାରୁ ଦଲାଲମାନେ ପିଲାମାନଙ୍କୁ ଟାର୍ଗେଟ କରୁଛନ୍ତି । କମ୍ ଟଙ୍କାରେ ଅଧିକା କାମ ହେଉଥିବାରୁ ଏମାନଙ୍କୁ ନେବା ପାଇଁ ବଡ ବଡ କମ୍ପାନୀ ମଧ୍ୟ ଇଚ୍ଛା ପ୍ରକଟ କରୁଥିବା ଦେଖିବାକୁ ମିଳିଛି । ତେବେ ପୋଲିସ ଓ ଶ୍ରମ ବିଭାଗ ପକ୍ଷରୁ ଘନ ଘନ ଚଢାଉ ହେଲେ ଦଲାଲମାନେ ଭୟ କରିବେ ଏବଂ ଏହି ଚାଲାଣ କମ୍ ହେବ ବୋଲି କୁହାଯାଇଛି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
