କୋରାପୁଟ: ପିଲାଏ ଖେଳିବେ, ଦେଶ ବିଦେଶରେ ନାଁ କରିବେ । ଏହି ସ୍ବପ୍ନକୁ ଆଧାର କରି ସରକାର ଅନେକ ଯୋଜନା କରୁଛନ୍ତି । କିନ୍ତୁ କୋରାପୁଟରେ ଖେଳ ପଡିଆର ଅବସ୍ଥା ଏପରି ଯେ ପିଲାଏ ଖେଳିବାକୁ ଇଚ୍ଛା କଲେ ବି କେଉଁଠି ଖେଳିବେ ସେ ନେଇ ଚିନ୍ତାରେ ପଡିଛନ୍ତି । ସହରର ହକି ପଡିଆ ବନ୍ଦ ପଡିଥିବାବେଳେ ଉଚ୍ଚ ବିଦ୍ୟାଳୟ ଖେଳ ପଡିଆ ଆରଟିଓ କବଜାରେ । ଜିଲ୍ଲା ଷ୍ଟାଡିୟମରେ ଘାସ ଲାଗିଥିବାରୁ ଖେଳିବା ବି ମନା ।
ଜିଲ୍ଲା ଜଳ ବିଭାଜିକା ବିଭାଗ ଦ୍ବାରା ୮୦ ଲକ୍ଷ ଟଙ୍କା ବ୍ୟୟରେ ଏହି ପଡିଆରେ ଚାଲିଥିବା ଘାସ ରୋପଣ କାର୍ଯ୍ୟ ସମ୍ପୂର୍ଣ ହୋଇନଥିବା ଯୋଗୁଁ ଆଜି ଯାଏଁ କ୍ରୀଡା ବିଭାଗ ତାର ଦାୟିତ୍ବ ନେଇ ପାରୁନଥିବା ସ୍ପଷ୍ଟ କରିଛନ୍ତି ଜିଲ୍ଲା କ୍ରୀଡା ଅଧିକାରୀ ରାଜକିଶୋର ଜେନା । ଫଳରେ ଜିଲ୍ଲା ଯୁବପୀଢିଙ୍କ ଖେଳ ଭବିଷ୍ୟତ ଅନ୍ଧାର ଭିତରେ ।
ସେପଟେ ଆଜି ସାରାଦେଶ ହକି ତାରକା ଧ୍ୟାନଚାନ୍ଦଙ୍କ ଜନ୍ମଦିନକୁ ଜାତୀୟ କ୍ରୀଡା ଦିବସ ଭାବେ ପାଳୁଛି । ଏପଟେ ଜିଲ୍ଲାରେ ଖିଳିବାରୁ ବଞ୍ଚିତ ହୋଇଛନ୍ତି ପିଲା । ହକି ତାରକାଙ୍କ ଜନ୍ମଦିନରେ କୋରାପୁଟ ହକି ପଡିଆରେ ଝୁଲୁଛି ତାଲା । ଯାହା ଜିଲ୍ଲା କ୍ରୀଡା ବିଭାଗର ପାରିବାପଣିଆ ଉପରେ ବିରାଟ ପ୍ରଶ୍ନବାଚୀ ଠିଆ କରିଛି । ତେବେ ଏପରି ସ୍ଥଳେ ଜିଲ୍ଲାରେ ଖେଳିବା ଲାଗି ଉପଯୁକ୍ତ ଷ୍ଟାଡିୟମ କରିବାକୁ ଦାବି ହେଉଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
