କୋରାପୁଟ: ଜିଲ୍ଲାରେ କୋଭିଡ 19କୁ ନେଇ ସଚେତନତା ବୃଦ୍ଧି ପାଇଛି । ଲୋକେ ଏହା ସମ୍ପର୍କରେ ଅଧିକ ସତର୍କ ହୋଇଛନ୍ତି । ଏହାସହ ପ୍ରତି ଶନିବାର ଓ ରବିବାର ସଟଡାଉନ କରିବା ନେଇ ଜିଲ୍ଲା ପ୍ରଶାସନର ନିର୍ଦ୍ଦେଶକୁ ଲୋକେ ବିନା ଦ୍ବିଧାରେ ପାଳନ କରିଥିବା ଜଣାପଡିଛି ।
ଏହା ସଂକ୍ରାନ୍ତରେ ପ୍ରଶାସନ ପକ୍ଷରୁ ଶୁକ୍ରବାର ଘୋଷଣା କରାଯାଇଥିଲା । ଏହାକୁ ଜନସାଧାରଣ ନିସର୍ତ୍ତ ସମର୍ଥନ କରିଥିବା ଯୋଗୁଁ ଶାନ୍ତିପୂର୍ଣ୍ଣ ଭାବେ ଶନିବାର ସମଗ୍ର ଜିଲ୍ଲା ବନ୍ଦ ହୋଇଯାଇଛି । ବ୍ୟବସାୟୀ ସଂଘ ମଧ୍ୟ ଜିଲ୍ଲା ପ୍ରଶାସନର ବନ୍ଦ ଡାକରାକୁ ସମ୍ପୂର୍ଣ ସମର୍ଥନ ଜଣାଇ ଦୋକାନ ବଜାର ବନ୍ଦ ରଖିଛନ୍ତି ।
ଗତ ସପ୍ତାହେ ମଧ୍ୟରେ ଜିଲ୍ଲାରେ ବୃଦ୍ଧି ପାଉଥିବା କୋରୋନା ସଂକ୍ରମଣକୁ ଆଖିରେ ରଖି ପ୍ରଶାସନ ଏପରି ବନ୍ଦ ନିଷ୍ପତ୍ତି ନେଇଛି । ଗୋଟିଏ ସପ୍ତାହରେ ଏଠାରେ 22 ଜଣ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଶନିବାର ପୁଣି 5 ଜଣ ପଜିଟିଭ ସ୍ପଷ୍ଟ ହୋଇଥିବା ଜିଲ୍ଲାପାଳ ମଧୁସୂଦନ ମିଶ୍ର ଜଣାଇଛନ୍ତି । ପୋଲିସ ପକ୍ଷରୁ ଛକ ଜାଗା ଏବଂ ଗୁରୁତ୍ବପୂର୍ଣ୍ଣ ସ୍ଥାନରେ ଲୋକଙ୍କ ଯିବା ଆସିବାକୁ ଯାଞ୍ଚ କରାଯାଉଥିବା ପରିଲକ୍ଷିତ ହୋଇଛି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
