କୋରାପୁଟ: ବିଭିନ୍ନ ଅଞ୍ଚଳର ବଣ ପର୍ବତରୁ ମିଳୁଥିବା ସାମଗ୍ରୀରେ ପ୍ରାକୃତିକ ଭାବେ ଝାଡୁ ଉତ୍ପତ୍ତି ହୋଇଆସୁଥିବା ବେଳେ ବର୍ତ୍ତମାନ କୋରାପୁଟ ଝାଡୁର ଚାହିଦା ବଢିବାରେ ଲାଗିଛି । ଫଳରେ କୋଟିଆ ଭଳି ପାର୍ବତ୍ୟ ଇଲାକାରେ ଆଦିବାସୀ ଝାଡୁ ଚାଷ କରିବା ଆରମ୍ଭ କରିଛନ୍ତି ।
ତେବେ ଝାଡୁର ଫୁଲଯୁକ୍ତ ଖଡ଼ିକାକୁ ତୋଳିଆଣିବା ପରେ ତାକୁ ଆଧୁନିକ ପଦ୍ଧତିରେ ବାନ୍ଧି ପାରୁନଥିବା ଯୋଗୁଁ ବ୍ୟବସାୟୀଙ୍କ ପାଖରେ ଶାଗମାଛ ଦରରେ ବିକ୍ରି କରିଦେଇଥିବା ମହିଳା ଚାଷୀ ଜଣାଇଛନ୍ତି । କିନ୍ତୁ, କାଫକୋ ଓ ଓରମାସର ମିଳିତ ପ୍ରୟାସରେ ଆଧୁନିକ ପ୍ରଣାଳୀରେ ପ୍ଲାଷ୍ଟିକ ଓ ମେଟାଲ ଖୋଳରେ ପୁରାଇ ବାନ୍ଧିବାର କୌଶଳ ମିଳିବା ପରେ ନିଜ ଉତ୍ପାଦର ଅଧିକ ମୂଲ୍ୟ ପାଇପାରିବେ ବୋଲି ମହିଳା ଚାଷୀମାନେ ଆଶା ବାନ୍ଧିଛନ୍ତି ।
ଗତ ଦୁଇଦିନ ଧରି କୋରାପୁଟରେ ଜିଲ୍ଲାର ବିଭିନ୍ନ ଅଞ୍ଚଳରୁ ଆସିଥିବା ମହିଳା ଝାଡୁ ଚାଷୀ ଓ ସଂଗ୍ରାହକଙ୍କୁ ସୁଦୂର ନାଗପୁରରୁ ତାଲିମଦାତା ଆସି ସେମାନଙ୍କ ମନରେ ଏହି ନୂତନ ଆଶା ସଞ୍ଚାରିତ କରିପାରିଥିବା କାଫକୋର ଅଧିକାରୀ ମତ ରଖିଛନ୍ତି । ଏହି ଆଦିବାସୀ ମହିଳାଙ୍କ ହାତରେ ଅତି ଉଚ୍ଚ ମାନର ଝାଡୁ ପ୍ରସ୍ତୁତ ହୋଇପାରୁଥିବା ତାଳିମଦାତା ମଧୁସୂଦନ ଭୋଇ ଜଣାଇଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
