କୋରାପୁଟ: ଶିକ୍ଷା ଓ ମୌଳିକ ସୁବିଧାରୁ ବଞ୍ଚିତ କୋରାପୁଟର ବୈପାରିଗୁଡା ବ୍ଲକ ଅନ୍ତର୍ଗତ ଡୁମୁରିପଦର ଗାଁ । ହାତଗଣତି ପିଲାଙ୍କୁ ଛାଡିଦେଲେ ଅଧିକାଂଶ ପିଲା ବିଦ୍ୟାଳୟ ମାଟି ମାଡି ନଥିବା ଗାଁ ଲୋକେ କହିଛନ୍ତି । ଦଣ୍ଡାବାଡି ବିଦ୍ୟାଳୟ ଡୁମୁରିପଦର ଠାରୁ 5 କିଲୋମିଟର ଦୂରରେ ଥିବା ଯୋଗୁଁ ଘଞ୍ଚ ଜଙ୍ଗଲ ମଧ୍ୟରେ ଥିବା ରାସ୍ତା ଦେଇ ଯିବାକୁ ପଡିଥାଏ । ବନ୍ୟଜନ୍ତୁ ଆକ୍ରମଣ ଭୟରେ ଗାଁ ଲୋକେ ପିଲାଙ୍କୁ ସ୍କୁଲ ଛାଡିବାକୁ ସଙ୍କୋଚ ମନେ କରୁଛନ୍ତି । ସ୍କୁଲକୁ ଯିବା ପାଇଁ ରାସ୍ତା କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ଶେଷ ହେଉ ନଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଅପରପକ୍ଷେ ଗାଁର ସମସ୍ତ ଶିଶୁ ଆଦିବାସୀ ସମ୍ପ୍ରଦାୟର । 5 କିଲୋମିଟର ଦୂରରେ ଶହୀଦ ଲକ୍ଷ୍ମଣ ନାୟକଙ୍କ ଜନ୍ମସ୍ଥାନ ତେନ୍ତୁଳୀଗୁମ୍ମା ସ୍ଥିତ ଆବାସିକ ବିଦ୍ୟାଳୟରେ ରହିଥିଲେ ମଧ୍ୟ ଶାବରୀ ନଦୀ ଉଭୟ ଗ୍ରାମ ମଧ୍ୟରେ ସଂଯୋଗକୁ ବିଚ୍ଛିନ୍ନ କରିଦେଇଛି । ଦଣ୍ଡାବାଡି ଓ ତେନ୍ତୁଳିଗୁମ୍ମା ମଧ୍ୟରେ ବୋହିଯାଉଥିବା ଶାବରୀ ନଦୀ ଉପରେ ପ୍ରାୟ ୨୦୦ ମିଟର ପୋଲ ନିର୍ମାଣ କାର୍ଯ୍ୟ ଶେଷ ହୋଇପାରୁନାହିଁ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏହି ବ୍ଲକର ବିଭିନ୍ନ ଅଞ୍ଚଳ କୋରାପୁଟ ଓ ନବରଙ୍ଗପୁର ସାଂସଦ ଏବଂ କୋରାପୁଟ ଓ କୋଟପାଡ ବିଧାୟକଙ୍କ ପରିସୀମା ମଧ୍ୟରେ ଆସୁଥିବା ବେଳେ ଅଞ୍ଚଳର ବିକାଶ ଦିଗରେ କେହି ଧ୍ୟାନ ଦେଉନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ଆସନ୍ତା ସାଧାରଣ ନିର୍ବାଚନ ପୂର୍ବରୁ ବ୍ରିଜ କାର୍ଯ୍ୟ ଶେଷ କରିବାକୁ ଅଞ୍ଚଳବାସୀ ଦାବି କରିଛନ୍ତି । ଅନ୍ୟପଟେ ବାରମ୍ବାର ତାଗିଦ କରିବା ପରେ ମଧ୍ୟ ଠିକାଦାର ରାସ୍ତାକାମକୁ ତ୍ୱରାନ୍ୱିତ କରୁନଥିବା ଦଣ୍ଡାବାଡି ପଞ୍ଚାୟତ ସରପଞ୍ଚ କହିଛନ୍ତି ।
ଏନେଇ ଜିଲ୍ଲାପାଳ ଅବଦଲ ଅକ୍ତର କହିଛନ୍ତି,‘‘ରାସ୍ତା ଓ ବ୍ରିଜ କାମ ଅତି ଶୀଘ୍ର ସମ୍ପୂର୍ଣ୍ଣ ହେବ । ଶାବରୀ ନଦୀ ଉପରେ ପୋଲ ନିର୍ମାଣ ସହିତ ଦଣ୍ଡାବାଡି ଠାରୁ ସଡକ ନିର୍ମାଣ କାର୍ଯ୍ୟ ଆରମ୍ଭ ହୋଇଯାଇଛି । ଏଠାକାର ମାଟି ପୋଲ କାର୍ଯ୍ୟରେ ବାଧକ ସାଜିଥିବା ବେଳେ ବର୍ତ୍ତମାନ ସେ ଗୁଡିକୁ ଦୂର କରାଯାଇ ପାହାଡ଼ କାଟି ରାସ୍ତା ନିର୍ମାଣ କରାଯାଇଛି । ବ୍ରିଜ ପାଇଁ ଖମ୍ବ ନିର୍ମାଣ କାର୍ଯ୍ୟ ଆରମ୍ଭ ହୋଇଯାଇଛି । ଏହି ବ୍ରିଜ ଓ ସଡକ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେଲେ ଏହି ଅଞ୍ଚଳର ବିକାଶ କ୍ଷେତ୍ରରେ ସହାୟକ ହେବା ସହ ଛତିଶଗଡ଼ ସୀମାକୁ ଲାଗି ରହିଥିବା ଅଞ୍ଚଳରେ ମାଓବାଦୀଙ୍କ ଚଳପ୍ରଚଳ ଉପରେ ନିୟନ୍ତ୍ରଣ ଆଣିବାରେ ସହଯୋଗ କରିବ ।’’
ଇଟିଭି ଭାରତ, କୋରାପୁଟ
