କୋରାପୁଟ: କୋରାପୁଟ, ଜୟପୁର, କୋଟପାଡ଼ ଓ ସୁନାବେଡ଼ା ପୌର ପରିଷଦ ପାଇଁ ନାମାଙ୍କନ ଦାଖଲ ପ୍ରକ୍ରିୟା ଶେଷ ହୋଇଛି । ପୌର ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲର ଆଜିଥିଲା ଶେଷ ଦିନ । ମାର୍ଚ୍ଚ ୨ ତାରିଖରୁ ନାମାଙ୍କନ ପତ୍ର ଦାଖଲ ପକ୍ରିୟା ଆରମ୍ଭ ହୋଇଥିଲା । ଜିଲ୍ଲାରେ ସମସ୍ତ ପୌର ପରିଷଦରେ ଥିବା ୮୭ଟି ୱାର୍ଡ ପାଇଁ ୪୯ ଜଣ ପୌରାଧ୍ୟକ୍ଷ ଓ ୩୭୭ ଜଣ କାଉନସିଲର ପଦବୀ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି ।
କୋରାପୁଟର ୨୧ଟି ୱାର୍ଡ ପାଇଁ ୫ଜଣ ପୌରାଧ୍ୟକ୍ଷ ଓ ୯୧ ଜଣ କାଉନସିଲର ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । କୋଟପାଡର ୧୩ଟି ୱାର୍ଡ ପାଇଁ ୫ଜଣ ପୌରାଧ୍ୟକ୍ଷ ଓ ୪୮ ଜଣ କାଉନସିଲର ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । ସେହିପରି ଜୟପୁର ପୌରାଞ୍ଚଳର ୨୮ଟି ୱାର୍ଡ ପାଇଁ ୨୨ଜଣ ପ୍ରାର୍ଥୀ ପୌରାଧ୍ୟକ୍ଷ ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି ।
ସୁନାବେଡ଼ା ପୌରାଞ୍ଚଳର ୧୩ଟି ୱାର୍ଡ ପାଇଁ ୧୭ଜଣ ପ୍ରାର୍ଥୀ ପୌରାଧ୍ୟକ୍ଷ ପଦବୀ ପାଇଁ ଓ ୧୦୫ ଜଣ ପ୍ରାର୍ଥୀ କାଉନସିଲର ପଦବୀ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି । ସୁନାବେଡ଼ା ଓ କୋଟପାଡ଼ରେ ଜଣେ ଲେଖାଏଁ ମହିଳା ପ୍ରାର୍ଥୀ ପୌରାଧ୍ୟକ୍ଷ ପଦବୀ ପାଇଁ ସ୍ଵାଧୀନ ଭାବେ ନାମାଙ୍କନ ଦାଖଲ କରିଛନ୍ତି । ପ୍ରଥମ ଥର ପାଇଁ ସୁନାବେଡ଼ାରେ ଆମ ଆଦମୀ ପାର୍ଟି ପକ୍ଷରୁ ପୌରାଧ୍ୟକ୍ଷ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
