କୋରାପୁଟ: ଜିଲ୍ଲାପାଳଙ୍କୁ ବଡସୁକୁ ପଞ୍ଚାୟତବାସୀଙ୍କ ଦାବିପତ୍ର ପ୍ରଦାନ । କୋରାପୁଟ ଓ ସୁକୁ ମଧ୍ୟରେ ଥିବା କୋଲାବ ଜଳଭଣ୍ଡାର ଉପରେ ରେଳ ବ୍ରିଜ କଡରେ ଗାଡି ମଟର ଯିବା ଆସିବା କରିବା ପାଇଁ ଏକ ପକ୍କା ପୋଲ ନିର୍ମାଣ କରିବା ପାଇଁ ଦାବି କରିଛନ୍ତି ପଞ୍ଚାୟତବାସୀ । ତେବେ ବଡସୁକୁ ପଞ୍ଚାୟତର କାଲଚୁର, ଭୋଇଗୁଡା, ଘାତମୁନ୍ଦାର ପ୍ରଭୃତି ଗ୍ରାମର ଲୋକେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ଏହି ଦାବି କରିଛନ୍ତି ।
ବଡସୁକୁ ପଞ୍ଚାୟତ ସମେତ ଲମତାପୁଟ ବ୍ଲକର କିଛି ଗ୍ରାମ ଏହି ବାଟଦେଇ କୋରାପୁଟ ଯାଉ ଥିବାବେଳେ କୋଲାବ ଜଳରାଶି ସେମାନଙ୍କ ପାଇଁ ଅନେକ ଅସୁବିଧା ସୃଷ୍ଟି କରୁଥିବା ପୂର୍ବତନ ବିଧାୟକ ତଥା କଂଗ୍ରେସ ଦଳର ନେତା ନିମାଇଁ ସରକାର ଅଭିଯୋଗ କରିଛନ୍ତି । ରାସ୍ତା ପଥରେ ଆସିବାକୁ ହେଲେ ଏହି ସମସ୍ତ ଗ୍ରାମବାସୀଙ୍କୁ ନନ୍ଦପୁର ବାଟଦେଇ 100 କିଲୋମିଟରରୁ ଊର୍ଦ୍ଧ୍ବ ବାଟ ଅତିକ୍ରମ କରିବାକୁ ହେଉଛି । ଲୋକଙ୍କ ଏହି ଅସୁବିଧାକୁ ଦୂର କରିବା ପାଇଁ ଗତ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ମଧ୍ୟ ଏକ ପୋଲ ନିର୍ମାଣ କରିବା ପାଇଁ ପ୍ରତିଶ୍ରୁତି ଦେଇଥିଲେ ।
କିନ୍ତୁ ନିର୍ବାଚନ ସରିବା ପରେ ସେ ବିଷୟରେ ପାଦେ ହେଲେ ଆଗେଇନଥିବା ବଡସୁକୁ ସରପଞ୍ଚ ଗୋବିନ୍ଦ ମାଝୀ ଅଭିଯୋଗ କରିଛନ୍ତି । ଏଥି ସହିତ ତିଆଡିପୁଟ ଓ ଘାଟମୁନ୍ଦାର ନିକଟରେ ଏକ ପୁସିଂ ବ୍ରିଜ ନିର୍ମାଣ କରିବା ପାଇଁ ଗ୍ରାମବାସୀ ଦାବି କରିଛନ୍ତି । ଆଜି ରେଳବାଇ ପୋଲିସ କୋଲାବ ଜଳଭଣ୍ଡାର ଉପରେ ଥିବା ରେଳ ପୋଲ କଡରେ ଥିବା ସଂକୀର୍ଣ୍ଣ ଚଲାପଥ ଦେଇ ଗାଡି ଚଳାଇବାକୁ ମନା କରୁଥିବା ଯୋଗୁଁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିବା ଗୋବିନ୍ଦ ମାଝୀ ଜଣାଇଛନ୍ତି ।
କୋରାପୁଟରୁ ସି ଏଚ ଶାନ୍ତାକାର, ଇଟିଭି ଭାରତ
