କୋରାପୁଟ: ଗତକାଲି(ସୋମବାର)ଠାରୁ ବରିଷ୍ଠ ନାଗରିକମାନଙ୍କୁ କୋଭିଡ ଟିକାର ବୁଷ୍ଟର ଡୋଜ(booster dose) ଦେବା ଆରମ୍ଭ ହୋଇଯାଇଛି । କିନ୍ତୁ ଘରେ ନପଶୁଣୁ ଚାଳ ବାଜିଲା ଭଳି ପ୍ରଥମ ଦିନରେ ହିଁ କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ହସ୍ପିଟାଲରେ ଦେଖା ଦେଇଛି ଟିକାର ଅଭାବ(Lack of vaccines) । ଫଳରେ ଟୀକାକରଣ ପାଇଁ ଆସିଥିବା ବୟସ୍କ ମହିଳା ଓ ପୁରୁଷ(senior citizens ) ହନ୍ତସନ୍ତ ହେଉଥିବା ଅଭିଯୋଗ ହୋଇଛି ।
ତେବେ ପ୍ରଥମେ ସକାଳେ ଟିକା ନେବା ପାଇଁ ଆସିଥିବା ବରିଷ୍ଠ ନାଗରିକଙ୍କୁ ଦ୍ବିପ୍ରହରରେ ଟିକାଦାନ କରାଯିବ ବୋଲି କହିବା ପରେ ସେମାନେ ଘରକୁ ଫେରିଯାଇଥିଲେ । ଏହାପରେ ପୁଣିଥରେ ଟିକା ନେବାକୁ ଆସିଥିବା ବରିଷ୍ଠ ନାଗରିକମାନେ ବସିବାକୁ ସୁବିଧା ନଥିବାରୁ ପ୍ରାୟ 2 ଘଣ୍ଟା ଧରି ଧାଡ଼ିରେ ଠିଆ ହୋଇଥିଲେ । ଏପରିକି ଦୁଇଘଣ୍ଟା ଧାଡିରେ ଠିଆ ହେବା ପରେ ସେମାନଙ୍କୁ ଟିକା ସରିଯାଇଛି ବୋଲି କୁହାଯାଇଥିଲା । ଯଦ୍ବାରା ଅନେକ ବ୍ୟକ୍ତି ଟିକାଦାନରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି ।
ତେବେ କିଶୋର କିଶୋରୀଙ୍କ ସହ ବରିଷ୍ଠ ନାଗରିକଙ୍କୁ ଗୋଟିଏ ଧାଡିରେ ରଖିବା ଫଳରେ ଅନେକ ଅସୁବିଧା ହେଉଛି । ତେଣୁ ବରିଷ୍ଠ ନାଗରିକଙ୍କ ପାଇଁ ସ୍ବତନ୍ତ୍ର ଧାଡିର ବ୍ୟବସ୍ଥା କରିବା ଓ ଆବଶ୍ୟକ ମୁତାବକ ଟିକା ମହଜୁଦ ରଖିବା ପାଇଁ ସେମାନେ ଦାବି କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
