କୋରାପୁଟ: ଦିବ୍ୟାଙ୍ଗଙ୍କ ପାଇଁ ସାହାରା ପାଲଟିଛି କୋରାପୁଟ ଜିଲ୍ଲା ପୁନର୍ବାସ କେନ୍ଦ୍ର, ଡିଡିଆରସି । ଯାହାର ଗୋଡ ନାହିଁ ତାକୁ କୃତ୍ରିମ ଗୋଡ, ଯିଏ ଚାଲିବାକୁ ଅକ୍ଷମ ତାଙ୍କୁ ଅସ୍ଥିଶଲ୍ୟ ଜୋତା ପ୍ରଦାନ କରୁଛି ଡିଡିଆରସି । ଗତକାଲି ଏହି କେନ୍ଦ୍ର ପୋଡାଗଡ ପଞ୍ଚାୟତ ବାସିନ୍ଦା ଘନଶ୍ୟାମ ପାଞ୍ଜିଆଙ୍କ ଜୀବନରେ କୃତ୍ରିମ ଅଙ୍ଗ ପ୍ରଦାନ କରି ଏକ ନୂତନ ଆଶା ସଞ୍ଚରିତ କରିଛି । ଜିପ୍ ଡ୍ରାଇଭର ଭାବେ କାମ କରୁଥିବା ଘନଶ୍ୟାମ ଗତ କିଛିଦିନ ପୂର୍ବେ ଏକ ଦୁର୍ଘଟଣାରେ ବାମ ଗୋଡ ହରାଇ ବସିଥିଲେ । ଆଉ ଗାଡ଼ି ଚଲାଇ ନ ପାରିବାର କ୍ଷୋଭ ତାଙ୍କୁ ଗ୍ରାସ କରି ଆସୁଥିବା ବେଳେ ଡିଡିଆରସି ତାଙ୍କୁ ଆଜି କୃତ୍ରିମ ଗୋଡ ପ୍ରଦାନ କରି ନୂତନ ଜୀବନ ପ୍ରଦାନ କରିଛି ବୋଲି ସେ ଜଣାଇଛନ୍ତି । ବର୍ତ୍ତମାନ ଏହି କୃତ୍ରିମ ଗୋଡ଼ର ସାହାଯ୍ୟରେ ସେ ପୁଣିଥରେ ଗାଡ଼ି ଚଲାଇ ପାରିବେ ବୋଲି ଆଶା ପୋଷଣ କରିଛନ୍ତି ।
ଠିକ୍ ସେହିପରି ପିଲାଟି ବେଳୁ ଖଣ୍ଡିଆ ଗୋଡକୁ ନେଇ ଠିକ୍ ଭାବେ ଚାଲି ପାରୁନଥିଲେ ପାଇକ ଫୁଲବେଡା ଗାଁର କୁନି ଝିଅ ହିରିତା ପାଇକ । ତେବେ ଗତକାଲି ଡିଡିଆରସି ଠାରେ ଉପଯୁକ୍ତ ଜୋତା ପାଇ ଘରକାମ କରି ବିଦ୍ୟାଳୟକୁ ଯାଇପାରିବ ବୋଲି ସେ କହିଛନ୍ତି । ବର୍ଷ 2018ରେ ଆରବିଏସକେ ଦ୍ବାରା ଜିଲ୍ଲାର ବିଭିନ୍ନ ବ୍ଲକ ରୁ 43 ଜଣକୁ ପାଦ ଅସ୍ତ୍ରୋପଚାର ନିମନ୍ତେ ଚୟନ କରାଯାଇ ସେମାନଙ୍କ ମଧ୍ୟରୁ 34 ଜଣକୁ ଅସ୍ତ୍ରୋପଚାର କରାଯାଇ ଉପଯୁକ୍ତ ଜୋତା ପ୍ରଦାନ କରାଯାଇଛି ।
ଗତକାଲି ଦ୍ୱିତୀୟ ପର୍ଯ୍ୟାୟରେ ଏହି କେନ୍ଦ୍ରରେ 10 ଜଣଙ୍କୁ ଅସ୍ଥିଶଲ୍ୟ ଜୋତା, ଜଣକୁ କୃତ୍ରିମ ଗୋଡ଼ ଓ 5 ଜଣଙ୍କୁ ସଂଯୋଗ ଅଙ୍ଗ ପ୍ରଦାନ କରାଯାଇଥିବା ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସିମାଞ୍ଚଳ ମହାପାତ୍ର ଜଣାଇଛନ୍ତି । ଜିଲ୍ଲାରେ ବର୍ତ୍ତମାନ ପ୍ରତି ବ୍ଲକରେ ଭିନ୍ନକ୍ଷମ ଚିହ୍ନଟ ଓ ସାର୍ଟିଫିକେଟ ପ୍ରଦାନ କୁ ତ୍ୱରାନ୍ୱିତ କରାଯାଉଥିବା ସେ ସୂଚନା ଦେଇଛନ୍ତି । ପ୍ରତି ବ୍ଲକରେ ସ୍ବତନ୍ତ୍ର ଶିବିର ଆୟୋଜନ କରି ଏହି କାର୍ଯ୍ୟ ସମ୍ପାଦିତ ହେଉଥିବା ସେ ଜଣାଇଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
