କୋରାପୁ: ଗାଁରେ ପୋଖରୀ ଥିଲା । କିନ୍ତୁ ସେଥିରୁ ପାଣି ଆଣି ଗାଁର ଅପରପାର୍ଶ୍ଵରେ ଚାଷ କରିବା ସମ୍ଭବ ହେଉନଥିବା ଯୋଗୁଁ କେବଳ ସୁଆଁ ଭଳି ଶସ୍ୟ ଅମଳ କରୁଥିଲେ ଗ୍ରାମବାସୀ । ପନିପରିବା ଚାଷ କରିବା ସେମାନଙ୍କ ପାଇଁ ଏକ ସ୍ୱପ୍ନ ମାତ୍ର ହୋଇ ରହିଯାଇଥିଲା । ଏବେ ଗାଁରେ ମୋଟର ପମ୍ପ ଅଛି । ପୋଖରୀ ଓ କୂଅର ପାଣି କ୍ଷେତରେ ମଡ଼ାଇ ଗ୍ରାମବାସୀ ବିଭିନ୍ନ ପ୍ରକାରର ପନିପରିବା ଚାଷ କରି ବେଶ ଦୁଇ ପଇସା ଉପାର୍ଜନ କରୁଛନ୍ତି ।
ଏହା ହେଉଛି କୋରାପୁଟ ଜିଲ୍ଲା କୋଟପାଡ ବ୍ଲକ ଅନ୍ତର୍ଗତ ବତାସନା ପଞ୍ଚାୟତର କସମଗୁଡା ଗାଁର କଥା । କୋରାପୁଟର ଶୋଭା ସ୍ବେଚ୍ଛାସେବୀ ସଙ୍ଗଠନ ଦ୍ୱାରା ଗ୍ରାମବାସୀଙ୍କ ପାଇଁ ଦୁଇଟି ପମ୍ପ ଓ ଉନ୍ନତମାନର ପରିବା ବିହନ ଯୋଗାଇଦେବା ସହ ବିଭିନ୍ନ ଚାଷ କରିବାର ପ୍ରଣାଳୀ ସମ୍ପର୍କରେ ତାଲିମ ଦିଆଯିବା ପରେ ଗାଁରେ ଚାଷୀଙ୍କ ମୁଖରେ ଆନନ୍ଦ ଖେଳିଯାଇଛି ।
ଗତ ବର୍ଷେ ହେବ ବାଇଗଣ ଚାଷ କରି ଘାସିରାମ ଭତ୍ରା ବ୍ୟାଙ୍କରେ ୫ ହଜାର ଟଙ୍କା ସଞ୍ଚୟ କରିଥିବା ବେଳେ ଆଉ ଏକ ଚାଷୀ ବୀର ସିଂ ଭତ୍ରା ପରିବା ବିକ୍ରି କରି ତା ଲାଭାଂଶରେ ହଳ କିଣିଲେଣି । ଚାଷୀଙ୍କ ସଫଳତାକୁ ଦେଖି ସେହି ଗାଁର ଅନ୍ୟ ଚାଷୀ ମଧ୍ୟ ଖାଲି ପଡିଥିବା ଜମିରେ ପରିବା ଚାଷ କରିବା ପାଇଁ ଆଗେଇ ଆସିଛନ୍ତି ବୋଲି ଶୋଭା ସଙ୍ଗଠନର ସ୍ଥାନୀୟ କର୍ମକର୍ତା ମଣ୍ଟୁ ମହାନ୍ତି ଜଣାଇଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
