କୋରାପୁଟ: ଜିଲ୍ଲାର ବନ୍ଧୁଗାଁ ବ୍ଲକରେ ଲେମନ ଗ୍ରାସରୁ ବାହାରୁଥିବା ତେଲର ବେଶ ଚାହିଦା ଥିଲା । ଚାଷୀ ଲିଟର ତେଲ ବିକି 1300ରୁ 1500 ଟଙ୍କା ପର୍ଯ୍ୟନ୍ତ ପାଉଥିଲେ । ଏଭଳି ଉପାୟରେ ଅର୍ଥ ଉପାର୍ଜନ ଆଶାରେ 10-15 ବର୍ଷ ପୂର୍ବେ ଏହି ବ୍ଲକର ଆଲମଣ୍ଡା ପଞ୍ଚାୟତ ସମେତ ଆହୁରି 12ଟି ପଞ୍ଚାୟତର ହଜାର ହଜାର ଧାନ, ମାଣ୍ଡିଆ, ଧୁଆଁପତ୍ର ଓ କପା ଚାଷ କରିବା ଛାଡ଼ି ବ୍ୟାପକ ଭାବେ ଏହି ଘାସ ଲଗାଇ ଏକ ନୂତନ ସ୍ବପ୍ନ ଦେଖିବାକୁ ଆରମ୍ଭ କରିଥିଲେ । କିନ୍ତୁ ଗତ କିଛି ବର୍ଷ ହେବ ଏହି ତେଲର ବଜାର ଦର ହଠାତ ଲିଟର ପିଛା 600ରୁ 700 ଟଙ୍କାକୁ ଖସି ଆସିଥିବା ଯୋଗୁଁ ଚାଷୀକୂଳ ଏବେ ଚିନ୍ତାରେ ।
ସୂଚନାନୁସାରେ, ଗତ କିଛିବର୍ଷ ପୂର୍ବେ କିଛି ବ୍ୟବସାୟୀ ଏହି ତେଲକୁ ବାହାର ରାଜ୍ୟକୁ ପଠାଇଥିବା ବେଳେ ସେଠାକାର ବ୍ୟବସାୟୀ ଏହି ତେଲରେ ଭେଜାଲ ତେଲ ମିଶିଥିବା ଅଭିଯୋଗ କରି ଏହି ତେଲ ନେବା ସମ୍ପୂର୍ଣ୍ଣ ନେବା ବନ୍ଦ କରି ଦେଇଛନ୍ତି । ଯାହାର ଫଳସ୍ବରୂପ ଏପର୍ଯ୍ୟନ୍ତ ଏଠାକାର ତେଲ ଏବେ ନିଜର ଗୌରବ ହରାଇଛି । ତେବେ ଏନେଇ ଚାଷୀ ମୂଲିଆ ସଂଘର କର୍ମକର୍ତ୍ତା ଜିଲ୍ଲାପାଳଙ୍କୁ ମଧ୍ୟ ଦେଖା କରିଥିଲେ । ଏହା ପରେ ସେହି ଅଞ୍ଚଳରେ କାର୍ଯ୍ୟ କରୁଥିବା ସ୍ବେଚ୍ଛାସେବୀ ସଂସ୍ଥା ନବ ନିର୍ମାଣ ସମିତି ଆନୁକୂଲ୍ୟରେ ଗାଁ ଗାଁରେ ଲେମନ ଗ୍ରାସ ତୈଳ ଉତ୍ପାଦକ ଦଳ ଗଠନ ହୋଇପାରିଛି । ଏହି ଦଳ ସାମୁହିକ ଭାବେ ତୈଳ ଉତ୍ପାଦନ କରିବା ସହିତ ପ୍ରସ୍ତୁତ ହେଉଥିବା ତେଲକୁ ଛୋଟ ଛୋଟ ବୋତଲରେ ଭର୍ତ୍ତି କରି ବିକ୍ରି କରିବା ଆରମ୍ଭ କରିଛନ୍ତି ।
ବୋତଲରେ ଭର୍ତ୍ତି ହୋଇଥିବା ଏହି ତେଲକୁ ବିନା କୌଣସି ମଧ୍ୟସ୍ଥିରେ ସିଧାସଳଖ ଖାଉଟି ପାଖରେ ପହଞ୍ଚାଇବାର ବ୍ୟବସ୍ଥା କରାଯାଇ ଚାଷୀଙ୍କ ଏହି ସମସ୍ୟାର ସମାଧାନ କରାଯାଉଥିବା ଓରମାସର ଜିଲ୍ଲା ପ୍ରକଳ୍ପ ନିର୍ଦ୍ଦେଶକ କାର୍ତ୍ତିକ ରୋଶନ ଜଣାଇଛନ୍ତି । ଏହି ପ୍ରକ୍ରିୟାରେ ବାଲିଯାତ୍ରା ଓ ପରବ ଭଳି ବିଶାଳ ଯାତ୍ରାରେ ଚାଷୀ ସିଧା ନିଜ କଷ୍ଟାର୍ଜିତ ତୈଳ ସିଧାସଳଖ ବିକିବାର ସୁବିଧା ପାଇପାରିଛନ୍ତି । ତେବେ ଭବିଷ୍ୟତରେ ଓଡିଶାର ବ୍ରହ୍ମପୁର ଓ ଆନ୍ଧ୍ରପ୍ରଦେଶର ବିଶାଖାପାଟଣା ଠାରେ ଆୟୋଜିତ ହେଉଥିବା ଯାତ୍ରା ଓ ବଜାରକୁ ମଧ୍ୟ ଏହି ତୈଳ ପଠାଇବାର ବ୍ୟବସ୍ଥା କରାଯାଉଥିବା ସେ କହିଛନ୍ତି । ହାତୀଗାଡ଼ାର ଅନ୍ୟତମ ଚାଷୀ ଗୋବିନ୍ଦ ମାଣ୍ଡିଙ୍ଗିଙ୍କ କହିବାନୁଯାୟୀ କଟକର ବାଲିଯାତ୍ରା ଓ କୋରାପୁଟର ପରବ ବଜାରରେ ଏହି ତେଲକୁ ଲିଟର ପିଛା 1300 ଟଙ୍କାରେ ବିକ୍ରି କରିପାରିଲେ ଚାଷୀ ପୂର୍ବଭଳି ଲାଭବାନ ହୋଇପାରିବେ ବୋଲି ଆଶା ରଖିଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
