କୋରାପୁଟ:ସରକାର ଟିଡିସିସି ମାଧ୍ୟମରେ ଜିଲ୍ଲାରେ ମଣ୍ଡି ଖୋଲି ଚାଷୀଙ୍କଠାରୁ ମାଣ୍ଡିଆ ସଂଗ୍ରହ କରିଥିଲେ କିନ୍ତୁ ବିକ୍ରି କରିବାର ଦେଢମାସରୁ ଊର୍ଦ୍ଧ୍ଵ ସମୟ ବିତିଯାଇଥିଲେ ମଧ୍ୟ ବିକ୍ରି କରିଥିବା ମାଣ୍ଡିଆର ପଇସା ନ ମିଳିବା ଯୋଗୁଁ ଚାଷୀ ମୁଣ୍ଡରେ ହାତ ଦେଇ ବସିଛି । ବର୍ତ୍ତମାନ ସରକାରଙ୍କ ଟାଳଟୁଳ ନୀତି ଯୋଗୁଁ ଚାଷୀମାନେ ମାଣ୍ଡିଆ ମଣ୍ଡିରେ ବିକ୍ରି କରିବା ପାଇଁ ଓଡିଶା ମିଲେଟ ମିସନର ସଦସ୍ୟ ଭାବେ ସେମାନଙ୍କୁ ପ୍ରୋତ୍ସାହିତ କରିଥିବା ସ୍ବେଛାସେବୀ ସଂସ୍ଥା ଗୁଡିକୁ ଦାୟୀ କରୁଛନ୍ତି ।
ସେପଟେ ସ୍ବେଛାସେବୀ ସଂଗଠନ ସେମାନଙ୍କ ଅଞ୍ଚଳରେ କାମ କରିବାକୁ ଗଲାବେଳେ ଚାଷୀଙ୍କ ଦୁଃଖ ଭରା ପ୍ରଶ୍ନର ସାମ୍ନା କରିବାକୁ ପଡୁଥିବା ଅଭିଯୋଗ କରିଛନ୍ତି ସ୍ବେଛାସେବୀ ଚନ୍ଦନ ତ୍ରିପାଠୀ । ଜିଲ୍ଲାରେ 369 ଜଣ ଚାଷୀ ମଣ୍ଡି ବନ୍ଦ ହେବାର ନିର୍ଦ୍ଦେଶ ଆସିବାର ବହୁଦିନ ପୂର୍ବରୁ ଜିଲ୍ଲାର ବିଭିନ୍ନ ମଣ୍ଡିରେ 4513.51 କ୍ଵିଣ୍ଟାଲ ମାଣ୍ଡିଆ ବିକ୍ରି କରିସାରିଥିଲେ ହେଁ ଏ ପର୍ଯ୍ୟନ୍ତ ସେମାନଙ୍କ ପ୍ରାପ୍ୟ ପାଇନଥିବା ଚାଷୀ ଅଭିଯୋଗ କରିଛନ୍ତି ।
ଏଥି ସହିତ ମାର୍ଚ୍ଚ ମାସ 1 ତାରିଖରେ ମଣ୍ଡି ବନ୍ଦ ହେବାର ଘୋଷଣା କରିବା ସମୟରେ ମଣ୍ଡି ଗୁଡିକରେ ପଡିରହିଥିବା 313 ଜଣ ଚାଷୀଙ୍କ 2795.77 କ୍ଵିଣ୍ଟାଲ ମାଣ୍ଡିଆ ଏ ପର୍ଯ୍ୟନ୍ତ ବର୍ଷା ପାଣି ଖାଇ ପଡିରହିଛି । ଏନେଇ ଜିଲ୍ଲାପାଳଙ୍କୁ ମଧ୍ୟ ଅବଗତ କରାଯାଇଛି । ଚାଷୀଙ୍କ ମାଣ୍ଡିଆର ମୂଲ୍ୟ ଶୀଘ୍ର ପ୍ରଦାନ କରିବା ସହ ସ୍ବେଚ୍ଛାସେବୀ ସଂଗଠନ ଗୁଡିକୁ ଚାଷୀଙ୍କ କ୍ରୋଧର ଶିକାର ହେବାରୁ ରକ୍ଷା କରିବା ପାଇଁ ସେମାନେ ପ୍ରଶାସନ ପାଖରେ ଗୁହାରି କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
