କୋରାପୁଟ: ପ୍ରାକୃତିକ ସୌନ୍ଦର୍ଯ୍ୟରେ ଭରା କୋରାପୁଟ । ପର୍ଯ୍ୟଟନ କ୍ଷେତ୍ରରେ ଆଉ ଦି ପାଦ ଆଗକୁ ବଢିଛି ଜିଲ୍ଲା ପ୍ରଶାସନ । ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ଗୁମ୍ପାରେ ଆଲୋକୀକରଣ ବ୍ୟବସ୍ଥା କରାଯିବା ସହ ଯାଆଆସ ପାଇଁ ଭଲ ରାସ୍ତା ନିର୍ମାଣ ପାଇଁ ପଦକ୍ଷେପ ନେଇଛି କୋରାପୁଟ ପ୍ରଶାସନ ।
ଜିଲ୍ଲାର ବୈପାରିଗୁଡା ବ୍ଲକରେ ଗୁପ୍ତେଶ୍ବର ଠାରୁ ଆରମ୍ଭ କରି ଲକ୍ଷ୍ମୀପୁର ବ୍ଲକର କୁଟୁଣିପଦର, ସେମିଳିଗୁଡା ନିକଟସ୍ଥ ପାରୁଆମାଳୀ, ନନ୍ଦପୁର ବ୍ଲକରେ ଥିବା ବାଲ୍ମିକୀ ଆଶ୍ରମ ନିକଟସ୍ତ ରାଜା ଗୁମ୍ଫା ଓ ବାଲ୍ଡ଼ା ନିକଟସ୍ଥ ନାଗେଶ୍ବରୀ ଗୁମ୍ଫା ରହିଛି । ଏହି ବିଶାଳକାୟ ଗୁମ୍ପା ପର୍ଯ୍ୟଟକଙ୍କୁ ଆକର୍ଷିତ କରୁଛି ।
କୋରାପୁଟ ଜିଲ୍ଲାପାଳ କହିଛନ୍ତି, "ପର୍ଯ୍ୟଟନର ଏହି ଦିଗର ଗୁରୁତ୍ଵକୁ ଅନୁଭବ କରି କୋରାପୁଟ ଜିଲ୍ଲା ପ୍ରଶାସନ ଦ୍ବାରା ଏହି ସମସ୍ତ ଗୁମ୍ଫା ସମେତ ଗୁପ୍ତେଶ୍ବର ନିକଟସ୍ଥ ଆଉ କିଛି ଛୋଟ ବଡ଼ ଗୁମ୍ଫାର ପୁନରୁଦ୍ଧାର କରାଯିବ । ଯାହା ଫଳରେ ଜିଲ୍ଲାରେ ପର୍ଯ୍ୟଟନ ବିକାଶ ଘଟିବା ସହ ସ୍ଥାନୀୟ ଲୋକେ ରୋଜଗାରକ୍ଷମ ହୋଇପାରିବେ । ସେହି ଅଞ୍ଚଳକୁ ପ୍ଲାଷ୍ଟିକ ମୁକ୍ତ କରାଯିବ । ଗୁପ୍ତେଶ୍ବର ଗୁମ୍ପାର କାର୍ଯ୍ୟ ମଧ୍ୟ ବେଶ ଆଗେଇ ଚାଲିଛି ।"
ସେ ଆହୁରି ମଧ୍ୟ କହିଛନ୍ତି, "ବର୍ଷା ଦିନ ପରେ ଗୁମ୍ପାକୁ ଯାଇଥିବା ରାସ୍ତାର ପିଚୁକାମ ଆରମ୍ଭ ହେବ । ସେପଟେ, କୋଲାବ ନଦୀ ଉପରେ ଥିବା ଘାଟ କାର୍ଯ୍ୟ ମଧ୍ୟ ଆଗଉଛି । ୨୫ ଲକ୍ଷ ଟଙ୍କା ଓଆଇସିସିକୁ ଦିଆଯାଇଛି । ଖୁବଶୀଘ୍ର ଏ ସମସ୍ତ କାର୍ଯ୍ୟ ଶେଷ ହେବ ।"
ଏହାବି ପଢନ୍ତୁ: ପଦ୍ମଶ୍ରୀ କମଳା ପୂଜାରୀ ଗୁରୁତର, SCB ସ୍ଥାନାନ୍ତର, ଆଶୁ ଆରୋଗ୍ୟ କାମନା କଲେ ମୁଖ୍ୟମନ୍ତ୍ରୀ
ପ୍ରଥମ ପର୍ଯ୍ୟାୟରେ ବର୍ତ୍ତମାନ ନାଗେଶ୍ବରୀ ଗୁମ୍ଫା ଓ ଗୁପ୍ତେଶ୍ବର ଅଞ୍ଚଳରେ ଥିବା ଗୁମ୍ଫା ଗୁଡ଼ିକୁ ପର୍ଯ୍ୟଟକଙ୍କ ପାଇଁ ପ୍ରାକୃତିକ ଉପାୟରେ ସମସ୍ତ ସୁବିଧା ସୁଯୋଗ ସୃଷ୍ଟି କରାଯାଉଛି । ଏହି କାର୍ଯ୍ୟର ସୁପରିଚାଳନା ନିମନ୍ତେ ଜିଲ୍ଲାପାଳ ନିଜେ ଗୁମ୍ଫା ଗୁଡିକୁ ମଧ୍ୟ ପରିଦର୍ଶନ କରିଛନ୍ତି ।
ଇଟିଭି ଭାରତ, କୋରାପୁଟ
