ରାଜନୀତିରେ ସାବାଳକ ହୋଇନାହାଁନ୍ତି ପୃଥ୍ୱୀରାଜ, କଟାକ୍ଷ କଲା ବିଜେଡି

ଆନ୍ଧ୍ର ପ୍ରଦେଶ ବିଧାନ ପରିଷଦର ମାମଲାରେ ବିଜେପି ନେତା ପୃଥ୍ୱୀରାଜଙ୍କୁ ଟାର୍ଟେଟ କଲା ବିଜେଡି । ରାଜନୀତିରେ ସାବାଳକ ପ୍ରାପ୍ତ ହୋଇନଥିବା ପୃଥ୍ୱୀରାଜଙ୍କୁ ଓଡ଼ିଶାରେ କେହି ଜଣେ ମଧ୍ୟ ଗୁରୁତ୍ୱର ସହ ନିଅନ୍ତି ନାହିଁ କହି କଟାକ୍ଷ କଲେ ବିଜେଡି । ଅଧିକ ପଢ଼ନ୍ତୁ

ଭୁବନେଶ୍ବର: ଆନ୍ଧ୍ରରେ ଅର୍ଥ କାରବାର ମାମଲାରେ ଗିରଫ ହୋଇପାରନ୍ତି ବିଜେପି ନେତା । ଖୁବଶୀଘ୍ର ଆନ୍ଧ୍ରରେ ରୁଜୁ ହେବାକୁ ଯାଉଛି ଫୌଜଦାରୀ ମାମଲା । ବିଧାନ ପରିଷଦ ସଦସ୍ୟ କରାଇବାକୁ କହି ଆଦାୟ ହୋଇଛି ଅର୍ଥ । ଏନେଇ ଓଡିଶା ବିଜେପିକୁ ସତର୍କ କରାଇଛନ୍ତି ବିଜେଡି ପ୍ରବକ୍ତା ତୁମ୍ବନାଥ ପଣ୍ଡା । ରାଜନୈତିକ ମନ୍ତବ୍ୟ ଦେବାରୁ ବିବାଦୀୟ ନେତାଙ୍କୁ ଦୂରେଇ ରଖିବାକୁ ବିଜେପିକୁ ପରାମର୍ଶ ଦେଇଛନ୍ତି ତୁମ୍ବନାଥ । ଏହା ସହ ପୃଥ୍ୱୀରାଜଙ୍କୁ ଆନ୍ଧ୍ର ମଡ଼େଲ ମନେ ପକାଇ କଟାକ୍ଷ କରିଛି ବିଜେଡି ।

ତୁମ୍ବନାଥ କହିଛନ୍ତି, ‘‘ପୃଥ୍ୱୀରାଜ ସବୁବେଳେ ଓଡ଼ିଶା ବିରୋଧୀ ବୟାନ ଦିଅନ୍ତି । ଏଯାଏଁ ରାଜନୀତିରେ ସାବାଳକ ପ୍ରାପ୍ତ ହୋଇନଥିବା ପୃଥ୍ୱୀରାଜଙ୍କୁ ଓଡ଼ିଶାରେ କେହି ଜଣେ ମଧ୍ୟ ଗୁରୁତ୍ୱର ସହ ନିଅନ୍ତି ନାହିଁ । ଓଡ଼ିଶାରେ କେଉଁ ମଡେଲ ଶାସନ ଚାଲିଛି ବୋଲି ପ୍ରଶ୍ନ କରୁଥିବା ପୃଥ୍ୱୀରାଜ ନିଶ୍ଚୟ ଭଲ ଭାବରେ ଜାଣିଥିବେ ଯେ ଆନ୍ଧ୍ର ମଡେଲ ମଧ୍ୟ ରହିଛି । ଯେଉଁ ମଡେଲରେ ଆନ୍ଧ୍ର ପ୍ରଦେଶ ବିଧାନ ପରିଷଦର ସଦସ୍ୟ କରିଦେବା ପାଇଁ ଆଶାୟୀଙ୍କଠାରୁ କୋଟିକୋଟି ଟଙ୍କା ଆଦାୟ ହୋଇଛି । ଶୁଣିବାକୁ ମିଳୁଛି, ଏହି କେଳେଙ୍କାରୀକୁ ନେଇ ଫୌଜଦାରୀ ମାମଲା ମଧ୍ୟ ହେବାକୁ ଯାଉଛି । ଏଥିରେ ସଂପୃକ୍ତ ଲୋକ ଖୁବଶୀଘ୍ର ଗିରଫ ହେବାର ସମ୍ଭାବନା ରହିଛି ।’’

ସେ ଆହୁରି ମଧ୍ୟ କହିଛନ୍ତି, ‘‘୨୩ ବର୍ଷ ହେଲା ଓଡ଼ିଶାବାସୀଙ୍କ ଆଶୀର୍ବାଦ ପାଇ ଆସୁଥିବା ନବୀନଙ୍କୁ ସମାଲୋଚନା କରିବା ଯୋଗ୍ୟତା ବାରମ୍ଵାର ପ୍ରତ୍ୟାଖ୍ୟାତ ହୋଇ ଆସୁଥିବା ଓଡ଼ିଶା ବିରୋଧୀ ନେତାଙ୍କର ନାହିଁ । ଓଡ଼ିଶା ବିଜେପିର କାର୍ଯ୍ୟଶୈଳୀ ଦେଖି ଲାଗୁଛି, ବୋଧହୁଏ ଦଳର ରାଜ୍ୟ ସଂଗଠନରେ କେହି ବିଧାୟକ କିମ୍ବା ସାଂସଦ ନାହାନ୍ତି । ଯିଏ ରାଜନୈତିକ ପ୍ରସଙ୍ଗରେ ମନ୍ତବ୍ୟ ଦେଇପାରିବେ । ନହେଲେ ଫୌଜଦାରୀ ମାମଲାରେ ଛନ୍ଦି ହୋଇ ଯେକୌଣସି ମୁହୂର୍ତ୍ତରେ ଜେଲ ଯିବାର ଆଶଙ୍କା ଥିବା ଜୁନିୟର ଲୋକଙ୍କୁ ଗଣମାଧ୍ୟମରେ ମନ୍ତବ୍ୟ ଦେବାକୁ ଛାଡ଼ି ନଥାନ୍ତେ । ତେଣୁ ଓଡ଼ିଶା ବିଜେପିକୁ ଆମର ପରାମର୍ଶ, ଆଗକୁ ସେମାନେ ଏ ନେଇ ସତର୍କ ରୁହନ୍ତୁ ।’’

ଇଟିଭି ଭାରତ, ଭୁବନେଶ୍ବର