କୋରାପୁଟ: ଜିଲ୍ଲା ସୁନାବେଡାର ହାଲ କଲୋନୀରେ ଗତ କିଛିଦିନ ପୂର୍ବେ ହୋଇଥିବା ଡକାୟତିରେ ସମ୍ପୃକ୍ତ 5ଜଣ ଯୁବକଙ୍କୁ ପୋଲିସ ଆଜି ଗିରଫ କରି କୋର୍ଟଚାଲାଣ କରିଥିବା ଜଣାପଡିଛି ।
ସୂଚନାନୁଯାୟୀ, ଚଳିତ ମାସ ୧୬ ତାରିଖରେ ଜଣେ ହାଲ କର୍ମଚାରୀ ଘରେ ନଥିବା ସମୟରେ କିଛି ଦୁର୍ବୃତ୍ତ ଘର ତାଲା ଭାଙ୍ଗି ସୁନା ରୁପା ଗହଣା ଲୁଟ କରିବା ସହ ଅନ୍ୟ ନିତ୍ୟବ୍ୟବହାର୍ଯ୍ୟ ଜିନିଷ ନେଇଯାଇଥିଲେ । ପୋଲିସ ସୂଚନା ପାଇ ତୁରନ୍ତ ସେଠାରେ ପହଞ୍ଚି ସନ୍ଧାନୀ କୁକୁର ସାହାଯ୍ୟରେ ତଦନ୍ତ ଆରମ୍ଭ କରିଥିଲା ।
ତେବେ ଆଜି ଏହି ଘଟଣାରେ ଡକାୟତ ଦଳର ତିନି ଜଣଙ୍କୁ ଓ ସେମାନଙ୍କ ଠାରୁ ଚୋରି ଜିନିଷ କିଣିଥିବା ଦୁଇଜଣ ଡକାୟତଙ୍କୁ ପୋଲିସ ଗିରଫ କରିଛି । ଏହାସହ ସେମାନଙ୍କ ଠାରୁ 200 ଗ୍ରାମ ସୁନା, 300 ଗ୍ରାମ ରୁପା ଅଳଙ୍କାର ଓ ଚୋରିରେ ବ୍ୟବହୃତ ହୋଇଥିବା ସ୍କୁଟି ଓ ବାଇକ ଜବତ କରିଛି । ତେବେ ସେମାନଙ୍କୁ ଆହୁରି ଅଧିକ ଜେରା କରାଗଲେ ଚୋରି ହୋଇଯାଇଥିବା ସାମଗ୍ରୀ ପାଇହେବ ବୋଲି ସୁନାବେଡା ଏସଡ଼ିପିଓ ନିରଞ୍ଜନ ବେହେରା ଆଜି ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
