କୋରାପୁଟ: ଜିଲ୍ଲା ଦଶମନ୍ତପୁର ବ୍ଲକର ପେଡିସିଲ ଗ୍ରାମର ଏକ ଧାନ ଖଳାରେ ଗତ ଶୁକ୍ରବାର ବିଳମ୍ବିତ ରାତିରେ ତିନିମାସ ଶିଶୁକନ୍ୟାର ମୃତଦେହକୁ ଉଦ୍ଧାର କରାଯାଇଛି ।
ସୂଚନା ଅନୁଯାୟୀ, ପେଡିସିଲ ଗ୍ରାମର ରାଜେନ୍ଦ୍ର ମୁଦୁଲି ଗତ ଶୁକ୍ରବାର ଜୟପୁର ଯାଇଥିଲେ । ଏଥିପାଇଁ ତାଙ୍କ ପତ୍ନୀ ମିନତା ତାଙ୍କର ଦୁଇ ସନ୍ତାନଙ୍କ ସହ ନିଜ ଘରେ ଏକାକୀ ଶୋଇବାକୁ ଯାଇଥିଲେ । ତେବେ ରାତି ପ୍ରାୟ 11ଟାବେଳେ ରାଜେନ୍ଦ୍ର ଘରକୁ ଫେରି ଆସି ପୁଣିଥରେ ବାହାରକୁ ଯାଇଥିଲେ ।
ରାଜେନ୍ଦ୍ର ଘର ବାହାରକୁ ଯିବାପରେ ତାଙ୍କ ତିନି ମାସର ଝିଅ ଖେଳୁଥିବା ଦେଖି ମିନତା ପୁଣିଥରେ ଶୋଇପଡିଥିଲେ । କିନ୍ତୁ କିଛି ସମୟ ପରେ ତାଙ୍କ ଝିଅ ପାଖରେ ନଥିବା ଦେଖି ଖୋଜାଖୋଜି ଆରମ୍ଭ କରିଥିଲେ । ତାଙ୍କ ଅନୁରୋଧ କ୍ରମେ ଗ୍ରାମବାସୀ ମଧ୍ୟ ଖୋଜାଖୋଜି ଆରମ୍ଭ କରିଥିଲେ ।
ଶେଷରେ ଘର ନିକଟରେ ଥିବା ଏକ ଧାନ ଖଳାରେ ଶିଶୁଟି ପଡିଥିବା ଦେଖି ପରିବାର ଲୋକେ ଶିଶୁଟିକୁ ଉଦ୍ଧାର କରିଥିଲେ । ଏହାପରେ ଶିଶୁଟିକୁ ମେଡିକାଲ ନିଆଯାଇଥିଲା । ମାତ୍ର ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ । ଖବର ପାଇ ସ୍ଥାନୀୟ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
କୋରାପୁଟରୁ ସି.ଏଚ୍ ଶାନ୍ତାକାର, ଇଟିଭି ଭାରତ
