ଭୁବନେଶ୍ବର: ଏକ ଭାରତ ଶ୍ରେଷ୍ଠ ଭାରତ ଯୁବା ସଂଗମ କାର୍ଯ୍ୟକ୍ରମ ଅଧୀନରେ ସିକ୍କିମ ଏନଆଇଟିର ୨୫ ଜଣ ଛାତ୍ରଛାତ୍ରୀ ଓ ୫ ଜଣ ଅଧ୍ୟାପକ ଭୁବନେଶ୍ବରରେ ପହଞ୍ଚିଛନ୍ତି । ଏହି ଟିମ ଏକ ସପ୍ତାହବ୍ୟାପୀ ଓଡ଼ିଶା ଗସ୍ତରେ ଆସିଛନ୍ତି । ନାଗରିକ ସମ୍ପର୍କ, ବିଶେଷକରି ଉତ୍ତର ପୂର୍ବ ଭାରତର ଯୁବବର୍ଗଙ୍କ ସହିତ ଦେଶର ଅନ୍ୟ ରାଜ୍ୟର ଯୁବବର୍ଗଙ୍କ ସମ୍ପର୍କ ଯୋଡ଼ିବା ଏହାର ଉଦ୍ଦେଶ୍ୟ ।
ଏହାଦ୍ୱାରା ଆୟୋଜକ ରାଜ୍ୟରେ ଜୀବନର ବିଭିନ୍ନ ସ୍ୱରୂପ, ବିକାଶର ମାଇଲଖୁଣ୍ଟ, ସାମ୍ପ୍ରତିକ ଉପଲବ୍ଧି ଏବଂ ଯୁବପିଢ଼ିଙ୍କ ସମ୍ପର୍କ ବିଷୟରେ ପରିଦର୍ଶନ ରାଜ୍ୟର ଯୁବପ୍ରତିନିଧିମାନେ ଅନୁଭୂତି ହାସଲ କରିପାରିବେ । ଗସ୍ତ ସମୟରେ ପରିଭ୍ରମଣକାରୀ ଯୁବ ପ୍ରତିନିଧିମାନେ ପାଞ୍ଚଟି ପ୍ରମୁଖ କ୍ଷେତ୍ର ପର୍ଯ୍ୟଟନ, ପରମ୍ପରା, ପ୍ରଗତି, ପ୍ରଦ୍ୟୋଗିକୀ ଓ ପରସ୍ପର ସମ୍ପର୍କକୁ ଉଜାଗର କରିପାରିବେ ।
ଏନଆଇଟି ରାଉରକେଲାର ରେଜିଷ୍ଟ୍ରାର ପ୍ରଫେସର ରୋହନ ଧିମାନ କହିଛନ୍ତି, ‘‘ଯୁବା ସଂଗମ ହେଉଛି ଭାରତର ବିବିଧତାକୁ ପାଳନ କରିବାର ଏକ ଅଭିନବ କାର୍ଯ୍ୟକ୍ରମ । ଭାରତର ଯୁବପିଢ଼ି ବିଭିନ୍ନ ରାଜ୍ୟର ଲମ୍ବା ଐତିହାସିକ ଯାତ୍ରାର ଗୁରୁତ୍ବକୁ ଜାଣିବା ଉଚିତ୍ ଏବଂ ପରମ୍ପରା, ପ୍ରଯୁକ୍ତି ବିନିମୟ କରିବା ଓ ସମ୍ପର୍କ ଯୋଡ଼ିବା ଲାଗି ପରସ୍ପର ସହ ମତବିନିମୟ କରିବା ଆବଶ୍ୟକ । ଛାତ୍ର ଜୀବନରେ ଏକ ରୋଚକ ଅନୁଭୂତି ହାସଲ ପାଇଁ ସୁଯୋଗ ଦେଇଥିବା କାରଣରୁ ଭାରତ ସରକାରଙ୍କ ବିଭିନ୍ନ ମନ୍ତ୍ରଣାଳୟ ଓ ଆୟୋଜକ ଶିକ୍ଷାନୁଷ୍ଠାନର ପ୍ରୟାସକୁ ଛାତ୍ରଛାତ୍ରୀ ସ୍ବୀକାର କରିବା ଆବଶ୍ୟକ। ଭାରତ ସରକାର ଏହି କାର୍ଯକ୍ରମ ପାଇଁ ସମ୍ପୂର୍ଣ୍ଣ ପାଣ୍ଠି ଯୋଗାଇ ଦେଉଛନ୍ତି । ଆୟୋଜକ ଶିକ୍ଷାନୁଷ୍ଠାନ ରହିବା ଓ ଖାଇବା ବ୍ୟବସ୍ଥା କରୁଥିବାରୁ ଭ୍ରମଣକାରୀ ଛାତ୍ରଛାତ୍ରୀଙ୍କୁ କୌଣସି ଅର୍ଥ ଖର୍ଚ୍ଚ କରିବାକୁ ପଡ଼ିବ ନାହିଁ । ପ୍ରଭୁ ଜଗନ୍ନାଥଙ୍କ ପବିତ୍ର ମାଟିର ପ୍ରତିନିଧିତ୍ବ କରିବା ଲାଗି ଏନଆଇଟି ରାଉରକେଲାକୁ ସୁଯୋଗ ଦେଇଥିବାରୁ ମୁଁ ଶିକ୍ଷା ମନ୍ତ୍ରଣାଳୟକୁ ଧନ୍ୟବାଦ ଜଣାଉଛି। ସହର ଓ ରାଜ୍ୟ ପକ୍ଷରୁ, ମୁଁ ସିକ୍କିମରୁ ଆସିଥିବା ଆମର ପ୍ରତିନିଧିମାନଙ୍କୁ ହାର୍ଦ୍ଦିକ ସ୍ୱାଗତ ଜଣାଉଛି । ଆଶା କରୁଛି ଯେ ଆମେ ସମସ୍ତେ ମିଶି ଏକ ଅବିସ୍ମରଣୀୟ ଯାତ୍ରା ଆରମ୍ଭ କରିପାରିବା ।’’
ସିକ୍କିମର ସଂଯୋଜକ ସୁମୀତ କୁମାର କହିଛନ୍ତି, ‘‘ପ୍ରଭୁ ଜଗନ୍ନାତଙ୍କ ମାଟିକୁ ଆସି ଆମେ ଆନନ୍ଦିତ । ଦୁଇ ଦିନ ଧରି ଯାତ୍ରା କରିବା ପରେ ଏନଆଇଟି ରାଉରକେଲା ଓ ରେଳ କର୍ତ୍ତୃପକ୍ଷଙ୍କ ଦ୍ୱାରା ଆମକୁ ଯେଭଳି ଭାବେ ସ୍ୱାଗତ କରାଗଲା ତାହା ଅବିସ୍ମରଣୀୟ । ଏକ ଭାରତ ଶ୍ରେଷ୍ଠ ଭାରତ ଏନଆଇଟି ରାଉରକେଲାର ସମ୍ପୂର୍ଣ୍ଣ ଟିମ ଆମକୁ ଆପଣାର ଭଳି ଆତିଥ୍ୟ ଅନୁଭୂତି ପ୍ରଦାନ କରିଛନ୍ତି । ଓଡ଼ିଶା ସଂସ୍କୃତିକୁ ଅତି ନିକଟରୁ ଦେଖି ଆମେ ଅନୁପ୍ରାଣିତ ହୋଇପାରିବୁ । ଆମେ ଏହାର ଐତିହ୍ୟକୁ ଭଲ ଭାବେ ଜାଣିବା ଲାଗି ଆଗ୍ରହୀ ରହିଛୁ । ଆମର ସିକ୍କିମ ପ୍ରତିନିଧି ଦଳକୁ ଭବ୍ୟ ସ୍ୱାଗତ ଓ ହାର୍ଦ୍ଦିକ ଆତିଥେୟ ପାଇଁ ମୁଁ ଏନଆଇଟି ରାଉରକେଲାକୁ ଧନ୍ୟବାଦ ଦେଉଛି । ’’
ସିକ୍କିମ ପ୍ରତିନିଧିମାନେ ଟ୍ରେନ ଯୋଗେ ଆସି ଶନିବାର ଅପରାହ୍ନରେ ରାଉରକେଲାରେ ପହଞ୍ଚିଥିଲେ । ଏନଆଇଟି ରାଉରକେଲା ପ୍ରତିନିଧି, ରେଜିଷ୍ଟ୍ରାର ପ୍ରଫେସର ରୋହନ ଧିମାନ, ଛାତ୍ର କଲ୍ୟାଣ ଡିନ ପ୍ରଫେସର ଏସ ଜେନା, ସୁରକ୍ଷା ଓ ନିରାପତ୍ତା ବିଭାଗର ପ୍ରାଧ୍ୟାପକ ଅନୀଲ କୁମାର ସିଂ, ଏନଆଇଟି ରାଉରକେଲା ଯୁବା ସଂଗମ କାର୍ଯ୍ୟକ୍ରମର ସଂଯୋଜକ ଏବଂ ଛାତ୍ର ସ୍ବେଚ୍ଛାସେବୀ ସେମାନଙ୍କୁ ସ୍ୱାଗତ କରିଥିଲେ । ଆଇଆରସିଟିସିର ପ୍ରତିନିଧିମାନେ ମଧ୍ୟ ଏହି ସ୍ୱାଗତ ସମାରୋହରେ ଅଂଶଗ୍ରହଣ କରିଥିଲେ । ଷ୍ଟେସନରେ ପାରମ୍ପରିକ ଲୋକନୃତ୍ୟ ଜରିଆରେ ସିକ୍କିମ ଦଳକୁ ସ୍ୱାଗତ କରାଯାଇଥିଲା ।
ଯୁବା ସଂଗମ ଯୁବ ବିନିମୟ କାର୍ଯ୍ୟକ୍ରମ ଆୟୋଜନ ଲାଗି ଏନଆଇଟି ରାଉରକେଲାକୁ ନୋଡାଲ ପ୍ରତିଷ୍ଠାନ ଭାବେ ଚୟନ କରାଯିବା ସହିତ ଏହାକୁ ଏନଆଇଟି ସିକ୍କିମ ସହିତ ଯୋଡ଼ଯାଇଛି । ଏନଆଇଟି ରାଉରକେଲା ପକ୍ଷରୁ ସିକ୍କିମର ପ୍ରତିନିଧି ଦଳ ପାଇଁ ପାଞ୍ଚ ଦିନିଆ ଓଡ଼ିଶା ଗସ୍ତରେ ଆସିଛନ୍ତି । ଆଗକୁ ଯୁବ ପ୍ରତିନିଧିମାନେ ରାଉରକେଲା ଇସ୍ପାତ କାରଖାନା, ବିର୍ସା ମୁଣ୍ଡା ହକି ଷ୍ଟାଡିୟମ ଓ ଇନଡୋର ଷ୍ଟାଡିୟମ ଓ ସହରର ଅନ୍ୟାନ୍ୟ କ୍ରୀଡ଼ା ଭିତ୍ତିଭୂମି, ହନୁମାନ ବାଟିକା, ବେଦବ୍ୟାସ ମନ୍ଦିର ଓ ବୈଷ୍ଣୋଦେବୀ ମନ୍ଦିର, ଜଗନ୍ନାଥ ମନ୍ଦିର, ଆଇଆଇଏମ ସମ୍ବଲପୁର, ହୀରାକୁଦ ନଦୀବନ୍ଧ, ସମଲେଇ ମନ୍ଦିର, ସ୍ୱୟଂ ସହାୟକ ଗୋଷ୍ଠୀ ଭଳି ବିଭିନ୍ନ ଶିକ୍ଷାନୁଷ୍ଠାନ, ପର୍ଯ୍ୟଟନ କ୍ଷେତ୍ର ଓ ପ୍ରମୁଖ ଶିଳ୍ପ କାରଖାନା ବୁଲି ଦେଖିବେ ।
ଇଟିଭି ଭାରତ, ଭୁବନେଶ୍ବର
