ଭୁବନେଶ୍ବର: ପୁଣି ରକ୍ତରଞ୍ଜିତ ହେଲା ରାଜଧାନୀ ରାଜରାସ୍ତା । ବିଚ୍ ରାସ୍ତାରେ ରକ୍ତର ହୋଲି ଖେଳିଲେ ଦୁର୍ବୃତ୍ତ । ରାସ୍ତା ଉପରେ ଯୁବକଙ୍କୁ ନିର୍ମମ ଭାବେ ହାଣିଲେ । ଆଜି ସକାଳୁ ଭୁବନେଶ୍ବର କ୍ୟାପିଟାଲ ଥାନା ଅନ୍ତର୍ଗତ ୟୁନିଟ-୧ ହାଇସ୍କୁଲ ପାଖରୁ ଜଣେ ଯୁବକଙ୍କ ରକ୍ତ ଜୁଡୁବୁଡୁ ମୃତଦେହ ଉଦ୍ଧାର ହୋଇଛି । ଦୁର୍ବୃତ୍ତମାନେ ତାଙ୍କୁ ଗୋଡାଇ ଗୋଡାଇ ମାରଣାସ୍ତ୍ରରେ ହାଣି ହତ୍ୟା କରିଛନ୍ତି । ମୃତକ ସ୍ଥାନୀୟ ବସ୍ତିର ସୁଶାନ୍ତ ନାୟକ । ମାସକ ତଳର ନାବାଳିକା ଅସଦାଚରଣ ଘଟଣାକୁ କେନ୍ଦ୍ରକରି ଏଭଳି ନିର୍ମମ ହତ୍ୟାକାଣ୍ଡ ଘଟିଥିବା ଜଣାପଡିଛି । ହତ୍ୟା କରିଥିବା ଅଭିଯୁକ୍ତ ମାମୁଁ ଓ ଭଣଜା । ପୂର୍ବ ରାଗ ସୁଝାଇବାକୁ ମାମୁଁ-ଭଣଜା ମିଶି ଯୁବକଙ୍କୁ ମୁଣ୍ଡକୁ ଆକ୍ରମଣ କରି ହତ୍ୟା କରିଛନ୍ତି ।
ଯାହା ସୂଚନା ମିଳିଛି, ବିଶାଲ ନାୟକ ନାମକ ଅଭିଯୁକ୍ତ ମାସକ ତଳେ ମୃତ ସୁଶାନ୍ତଙ୍କର ନାବାଳିକା ଝିଆରୀକୁ ଅସଦାଚରଣ କରିଥିଲେ । ଏନେଇ ବିଶାଲ ବିରୁଦ୍ଧରେ କ୍ୟାପିଟାଲ ଥାନାରେ ଅଭିଯୋଗ ହୋଇଥିଲା । ହେଲେ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଇନଥିଲା । ଏହି ମାସକ ତଳେ ଅସଦାଚରଣ ଘଟଣାର ରାଗ ରଖି ଅଭିଯୋଗକାରୀ ପରିବାରର ସଦସ୍ୟଙ୍କୁ ହତ୍ୟା କରାଯାଇଛି । ବିଶାଲ ନାୟକ ତା'ର ମାମୁଁ ସୁଜିତ ନାୟକ ଓ ସହଯୋଗୀ ମିଶି ସମ୍ପୃକ୍ତ ନାବାଳିକାଙ୍କ ଦାଦା ସୁଶାନ୍ତଙ୍କୁ ହତ୍ୟା କରିଛନ୍ତି । ସୁଶାନ୍ତ ଆଜି ସକାଳୁ ନିଜ ସ୍ତ୍ରୀକୁ ହସ୍ପିଟାଲ ନେଇ ଫେରିବା ପରେ ଜିଇଡି ବସ୍ତି ନିକଟରେ ତାଙ୍କୁ ହତ୍ୟା କରାଯାଇଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଛାନଭିନ୍ କରିବା ସହ ମୃତଦେହ ଉଦ୍ଧାର କରିଛି ।
ଏଠାରେ ଉଲ୍ଲେଖଯୋଗ୍ୟ ଯେ, ରାଜଧାନୀରେ ଗୋଟିଏ ପଟେ ପୋଲିସ କ୍ରାଇମ୍ କଣ୍ଟ୍ରୋଲ ପାଇଁ ଚେଷ୍ଟା କରୁଥିବା ବେଳେ ଅନ୍ୟପଟେ ପୋଲିସ ଓ ଆଇନ କାନୁନ ପ୍ରତି ଅପରାଧିକଙ୍କ ଭୟ ରହୁନଥିବା ଦେଖାଯାଉଛି । ଅପରାଧିମାନେ ରାସ୍ତା ଉପରେ ହତ୍ୟାକାଣ୍ଡ ଘଟାଇ ଫେରାର୍ ହୋଇଯାଉଛନ୍ତି । ଗତ ୧୭ ତାରିଖରେ ଭରତପୁର ଥାନା ଅଞ୍ଚଳରେ ସେହିପରି କୌଣସି ପୂର୍ବ ଶତ୍ରୁତା ନେଇ କିଛି ଅଭିଯୁକ୍ତ ଜଣକୁ ଖଣ୍ଡାରେ ଆକ୍ରମଣ କରି ରକ୍ତାକ୍ତ କରିଥିଲେ । ଏପରିକି ଦୋକାନ ଭିତରେ ପଶି ଆତଙ୍କ ଖେଳାଇଥିଲେ । ଏହି ଘଟଣାରୁ ସେତେବେଳେ କିଛି ଅଭିଯୁକ୍ତଙ୍କୁ ପୋଲିସ ଗିରଫ କରିଥିଲା ।
ସେହିପରି ଗତ ୧୮ତାରିଖରେ ମଧ୍ୟ ଖଣ୍ଡଗିରି ଥାନା ପାଖରେ ଏକ ଗୋଡି ଓ ବାଲି ବ୍ୟବସାୟୀଙ୍କୁ ଅତି ନିର୍ମମ ଭାବେ ହାଣିଥିଲେ ଦୁର୍ବୃତ୍ତ । କିଛି ଦିନ ପରେ ଏହି ଘଟଣାରେ ଜଣେ ଅଭିଯୁକ୍ତକୁ ଖଣ୍ଡଗିରି ଥାନା ପୋଲିସ ଗିରଫ କରିଥିଲା । ପରେ ସେହି ଅଭିଯୁକ୍ତର ଗ୍ୟାରେଜ ଓ ସରକାରୀ ଜାଗା ଉପରେ ଥିବା ଘରକୁ ପୋଲିସ ଭାଙ୍ଗିଥିଲା । ଗତ ୨୦ ତାରିଖରେ ମଧ୍ୟ ସମାନ ଘଟଣା ଘଟିଥିଲା ଲିଙ୍ଗରାଜ ଥାନା ଅଞ୍ଚଳରେ । ଲିଙ୍ଗରାଜ ମନ୍ଦିର ପାଖ ଗଙ୍ଗା ଯମୁନା ନିକଟରେ ଜୟ ପ୍ରକାଶ ନାମକ ଯୁବକଙ୍କୁ କିଛି ଯୁବକ ଛୁରୀରେ ଆକ୍ରମଣ କରିଥିଲେ । ରାତି ୧୧.୩୦ ସମୟରେ ଜୟ ପ୍ରକାଶ ଜଗତସିଂହପୁର ଘରକୁ ଫେରୁଥିବା ବେଳେ ନିଶା ପାଇଁ ସମ୍ପୃକ୍ତ ଯୁବକମାନେ ତାଙ୍କୁ ଆକ୍ରମଣ କରିଥିଲେ । ଏଥିରେ ତାଙ୍କର ହାତରେ ଗଭୀର ଆଘାତ ଲାଗିଥିଲା ।
ଇଟିଭି ଭାରତ, ଭୁବନେଶ୍ବର
