ଭୁବନେଶ୍ବର: ଅମୃତ କାଳ ବଜେଟରେ ମହିଳାଙ୍କୁ ପାଇଁ ବହୁ ବ୍ୟବସ୍ଥା ରହିଛି । ସ୍ବୟଂ ସହାୟକ ମହିଳା ଗୋଷ୍ଠୀଙ୍କୁ ସଶକ୍ତ କରିବାକୁ ପ୍ରୟାସ କରାଯାଇଛି । ଦୁଇ ଦିନିଆ ଓଡ଼ିଶା ଗସ୍ତରେ ଆସିଥିବା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବିଜେପି ରାଜ୍ୟ କାର୍ଯ୍ୟାଳୟରେ ପହଞ୍ଚି ଏପରି କହିଛନ୍ତି । ଏହି କାର୍ଯ୍ୟକ୍ରମରେ ଅର୍ଥମନ୍ତ୍ରୀଙ୍କ ସହ ସାଂସଦ ଅପରାଜିତା ଷଡ଼ଙ୍ଗୀ, କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉପସ୍ଥିତ ରହିଥିଲେ ।
ବିଜେପି ରାଜ୍ୟ କାର୍ଯ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟତଃ ଦୁଇଟି ଯୋଜନା ଉପରେ ଫୋକସ କରିଥିଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ମହିଳା ସମ୍ମାନ ବଚତ ପତ୍ରରେ ୨ ବର୍ଷ ପାଇଁ ଟଙ୍କା ରଖିପାରିବେ ମହିଳା । ୭.୫ ପ୍ରତିଶତ ସୁଧରେ ଟଙ୍କା ରଖିପାରିବେ। ଏଥିସହ ପ୍ରଧାନମନ୍ତ୍ରୀ ବିଶ୍ଵକର୍ମା ଯୋଜନାରେ କାରିଗରଙ୍କୁ ପ୍ରୋତ୍ସାହନ ଦିଆଯିବ । ଯାହା ଫଳରେ ଓଡ଼ିଶାର କାରିଗରମାନେ ଲାଭବାନ ହେବେ ବୋଲି ଅର୍ଥମନ୍ତ୍ରୀ କହିଥିଲେ । ସେ କହିଥିଲେ ଯେ, "ମହିଳାଙ୍କୁ ସ୍ବାବଲମ୍ବୀ କରିବା ପାଇଁ ସ୍ବୟଂ ସହାୟକ ଗୋଷ୍ଠୀର ସହାୟତା ନିଆଯିବ । ମହିଳାଙ୍କୁ ନେଇ ଛୋଟ ଛୋଟ ଗୋଷ୍ଠୀ ତିଆରି କରି ସେମାନଙ୍କୁ କର୍ମ ଯୋଗାଇଦିଆଯିବ । ଯାହା ଫଳରେ ଗ୍ରାମୀଣ ଅଞ୍ଚଳରେ ଥିବା ମହିଳାମାନେ ଲାଭବାନ ହେବେ । ମହିଳାଙ୍କୁ ଉନ୍ନତ ବଜାର ଯୋଗାଇ ଦିଆଯିବ । ସାରା ଦୁନିଆର ମାର୍କେଟରେ କିପରି ସେମାନଙ୍କ ସାମଗ୍ରୀ ପହଞ୍ଚି ପାରିବ ସେଥିଲାଗି ମୋଦି ସରକାର ପ୍ରୟାସ ଜାରି ରଖିଛନ୍ତି ।"
ମନ୍ତ୍ରୀ ଆହୁରି ମଧ୍ୟ କହିଛନ୍ତି, ଅମୃତ କାଳ ବଜେଟରେ ମହିଳାଙ୍କ ପାଇଁ ବିଶେଷ ବ୍ୟବସ୍ଥା ରହିଛି । ଦୁଇ ବର୍ଷ ଯାଏ ମହିଳା ସମ୍ମାନ ବଚତ ପତ୍ର ଯୋଜନା ଆଧାରରେ ୭.୫ ପ୍ରତିଶତ ସୁଧରେ ଟଙ୍କା ରଖିପାରିବେ । ଏହି ଅବଧି ସମୟରେ ମଧ୍ୟ ସେମାନେ ତାଙ୍କ ଟଙ୍କା ଉଠାଇ ପାରିବେ । କେନ୍ଦ୍ର ସରକାରଙ୍କ ଯୋଜନାରେ ସିଧାସଳଖ ଭାବେ ଓଡ଼ିଶାବାସୀ ଲାଭବାନ ହେବେ ବୋଲି କେନ୍ଦ୍ର ଅର୍ଥମନ୍ତ୍ରୀ ସୀତାରମଣ କହିଛନ୍ତି ।
