ଭୁବନେଶ୍ବର: ହୁସିଆର ! ରାସ୍ତାରେ ଛକିଛି ମାୟାବିନୀ । ଏକୁଟିଆ ଦେଖିଲେ ପାଖକୁ ମାଡ଼ି ଆସୁଛି । ଦିନ ହେଉ ଅବା ରାତି, ଭିଡ଼ି ନେଉଛି ମୋବାଇଲ । ରାଜଧାନୀରେ ମାୟା ଜାଲ ବିଛାଇଛନ୍ତି ଏମିତି କିଛି ମହିଳା । ଯାହାଙ୍କ ହାବୁଡ଼ରେ ପଡିଲେ ତାଙ୍କ ଇଛା ମୁତାବକ ଦେବାକୁ ପଡ଼ିବ ଟଙ୍କା । ନଚେତ ତାଙ୍କୁ ଦୁଷ୍କର୍ମ କରିଥିବା ମିଛ ଅଭିଯୋଗ କରିଦେବାର ଦେଉଛି ଧମକ । ଜଣେ ସହୀଦନଗରର ଯୁବକ ଚେନ୍ନାଇ ଯିବା ପାଇଁ ଷ୍ଟେସନକୁ ଟିକେଟ କାଟିବାକୁ ଯାଇଥିବା ବେଳେ ଏଭଳି ଲୁଟର ଶିକାର ହୋଇଥିଲେ । ଏନେଇ ଲୁଟ ଓ ଡକାୟତି ମାମଲାରେ ଗିରଫ ହୋଇଛନ୍ତି ଦୁଇ ମହିଳା । ଯିଏକି ଶୁକ୍ରବାର ରାତିରେ ଏପରି ଆତଙ୍କ ରଚିଥିଲେ ମାଷ୍ଟରକ୍ୟାଣ୍ଟିନରେ ।
ଉଭୟ ମହିଳାଙ୍କୁ ଗିରଫ କରାଯାଇଥିବା କମିଶନରେଟ ପୋଲିସର ଜୋନ ୧ ଏସିପି ମାନସ ଗଡ଼ନାୟକ ସୂଚନା ଦେଇଛନ୍ତି । ପୋଲିସ ଏପରି ଘଟଣାକୁ ଗୁରୁତର ସହ ନେଇଛି । ତେବେ ଏହି ଘଟଣା ନୂଆ ନୁହେଁ । ରାଜଧାନୀରେ ଏପରି ଘଟଣାର ଅନେକ ନଜିର ରହିଛି । ମାଷ୍ଟରକ୍ୟାଣ୍ଟିନ ଛକ ଏମାନଙ୍କ ଆଡ୍ଡା ପାଲଟିଛି । ହେଲେ ରାଜଧାନୀର ଏୟାରପୋର୍ଟ ଛକ, ନାଲକୋ ଛକ ଭଳି ଟଙ୍କପାଣି ରୋଡ଼, କଳିଙ୍ଗ ଷ୍ଟୁଡିଓ ଭଳି ଅନେକ ନିଛାଟିଆ ଜାଗାରେ ଏମାନଙ୍କର ଏପରି ଉତ୍ପାତ ଦେଖିବାକୁ ମିଳିଥାଏ । ଅନ୍ଧାର ରାତିରେ ଏମାନଙ୍କର କିଛି ପୁରୁଷ ସହଯୋଗୀଙ୍କ ସହ ଖଟି ଜମିଥାଏ । ନିଛାଟିଆ ଅନ୍ଧାରରେ ମାୟାବିନୀ ରାସ୍ତା ଉପରେ ଛକିରହିଥାଏ । ଚେହେରା ଆଳରେ ଲୋକଙ୍କୁ ମୋହରା କରିଥାଏ । ନିଜର ଆଧୁନିକ ଶୈଳୀରେ ଲୋକଙ୍କୁ ଆକୃଷ୍ଟ କରିଥାନ୍ତି । ତାପରେ ଆରମ୍ଭ ହୋଇଯାଏ ଏମାନଙ୍କର ଆତଙ୍କରାଜ । ତାଙ୍କ କବଳରୁ ସହଜରେ ମୁକୁଳିବାର ପ୍ରଶ୍ନ ଉଠେନି । ପ୍ରଥମେ ଲୋକଙ୍କ ଗାଡି ଚାବି ଓ ମୋବାଇଲ୍ ଛଡାଇ ନିଅନ୍ତି ଏମାନେ । ପରେ ତାଙ୍କ କଥା ମାନି ତାଙ୍କ ହିସାବରେ ଟଙ୍କା ଦେବାକୁ ବାଧ୍ୟ କରନ୍ତି । ନଦେଲେ ତାଙ୍କୁ ଦୁଷ୍କର୍ମ ବା ଅସଦାଚରଣ କରିଥିବା ମିଛ ଅଭିଯୋଗ କରିବେ ବୋଲି ଧମକ ଦେଇଥାନ୍ତି ।
