ଭୁବନେଶ୍ବର: ଆବାସ ଯୋଜନାର ଅନିୟମିତତାକୁ ନେଇ ବିଏମସି କାର୍ଯ୍ୟାଳୟ ସମ୍ମୁଖରେ ଧାରଣା। ଠିକାଦାରଙ୍କ କାର୍ଯ୍ୟରେ ଅବହେଳା ଯୋଗୁଁ ଏଭଳି ହେଉଥିବା ଅଭିଯୋଗ କରି ବିଏମସି କର୍ପୋରେସନ ବୈଠକ ପୂର୍ବରୁ ଏଭଳି ପ୍ରତିବାଦ ଦେଖିବାକୁ ମିଳିଛି । ତେବେ ଏନେଇ ଅଭିଯୋଗ କରିଛନ୍ତି ଚନ୍ଦ୍ରଶେଖରପୁର ମଣ୍ଡପ ବସ୍ତିବାସିନ୍ଦା ।
ତେବେ ବସ୍ତିବାସିନ୍ଦାଙ୍କ ଅଭିଯୋଗ ମୁତାବକ, ଦୀର୍ଘ ୨୦୧୩-୧୪ ମସିହାରୁ ପ୍ରଶାସନ ଏମାନଙ୍କୁ ଆବାସ ଯୋଜନାରେ ଘର ଦେବାକୁ ପ୍ରତିଶ୍ରୁତି ଦେଇଆସୁଛି । ଏଥିପାଇଁ ସର୍ଭେ ସରିଥିଲେ ମଧ୍ୟ କାର୍ଯ୍ୟ ଶୂନ । ରାଜୀବ ଆବାସ ଯୋଜନାରେ ଘର ଖଣ୍ଡିଏ ମିଳିନଥିବା ବେଳେ ଅନ୍ୟାନ୍ୟ ମୌଳିକ ସୁବିଧା ମଧ୍ୟ ଏମାନଙ୍କ ପାଇଁ ସ୍ଵପ୍ନ ପାଲଟିଛି । ମୌଳିକ ସୁବିଧାରୁ ବଞ୍ଚିତ ରାଜଧାନୀର ବସ୍ତିବାସିନ୍ଦା ମୁଣ୍ଡ ଗୁଞ୍ଜିବାକୁ ଘର ନଥିବା ବେଳେ ପିଇବା ପାଣି ମଧ୍ୟ ସେମାନଙ୍କ ପାଖରେ ପହଞ୍ଚି ପାରୁନି । ତେବେ ବିଏମସି ପ୍ରତିଶ୍ରୁତି ଦେବାର 10 ବର୍ଷ ପୁରିଥିଲେ ମଧ୍ୟ କୌଣସି ସହଯୋଗ ମିଳିନଥିବା ଅଭିଯୋଗ ହୋଇଛି ।
ତେଣୁ ଏନେଇ ଭୁବନେଶ୍ୱର ମହାନଗର ନିଗମ ଅଫିସ ସମ୍ମୁଖରେ ବସ୍ତିବାସିନ୍ଦା ହଲ୍ଲାବୋଲ୍ କରିଛନ୍ତି । ବସ୍ତି ବାସିନ୍ଦା କହିଛନ୍ତି, "ପ୍ରଶାସନ ହେଉ ଅବା ମେୟର ଓ କମିଶନର କେହି ଆମ ଦୁଃଖ ଶୁଣୁନଥିବା ବେଳେ ଘର, ପାଣି, ଇଲେକ୍ଟ୍ରି ଭଳି ମୌଳିକ ସୁବିଧା ସେମାନଙ୍କ ପାଇଁ ସ୍ଵପ୍ନ ପାଲଟିଛି । ରାଜଧାନୀ ଭଳି ସ୍ଥାନରେ ଥାଇ ମଧ୍ୟ ଦୁଗର୍ମ ପରିସ୍ଥିତିରେ ଆମେ ରାଜଧାନୀର ଛାତିରେ ଜୀବନ ବିତାଉଚୁ ।" । ଚନ୍ଦ୍ରଶେଖରପୁର ମଣ୍ଡପ ବସ୍ତିବାସିନ୍ଦା ଆଜିବି ଝୁମ୍ପୁଡ଼ି ଘରେ ଦୁଃଖେ କଷ୍ଟେ ରହୁଥିବା ବେଳେ ଘର ଖଣ୍ଡେ ମିଳିଲେ ସେମାନେ ଘରେ ଶାନ୍ତିରେ ରହି ପାରିବେ । କିନ୍ତୁ ପ୍ରଶାସନର ପ୍ରତିଶୃତି ଫେଲ ମାରିବା ଏବଂ ଠିକାଦାରଙ୍କ କାର୍ଯ୍ୟର ଅବହେଳା ପରେ ତାହା ଏବେ ସାତ ସପନ ।
ଏହା ମଧ୍ୟ ପଢ଼ନ୍ତୁ...ବିଭିନ୍ନ ସମସ୍ୟା ନେଇ BeMC ଅଫିସ ଘେରାଉ କରିଲା ବିଜେପି
ସେପଟେ ଆଜି BMC ପକ୍ଷରୁ କର୍ପୋରେସନ ବୈଠକ ଚାଲିଥିବା ବେଳେ ଏଭଳି ବିରୋଧ ଦେଖିବାକୁ ମିଳିଛି । ଶହଶହ ବସ୍ତିବାସିନ୍ଦା ମେୟରଙ୍କୁ ଘେରିଥିବା ବେଳେ କେବେ ଘର, ପାଣି, ବିଜୁଳି ମିଳିବ, କେବେ ପ୍ରତିଶ୍ରୁତି ପାଳନ ହେବ ବୋଲି ପ୍ରଶ୍ନ କରିଛନ୍ତି । ଏହାସହ ବିରୋଧ ପରେ ବସିଥିବା ବୈଠକରେ ଏନେଇ ଆଲୋଚନା ହୋଇଥିବା ବେଳେ ଖୁବଶୀଘ୍ର ଏସବୁ ସମସ୍ୟାର ସମାଧାନ ହେବ ବୋଲି ଭୁବନେଶ୍ବର ମେୟର ସୁଲୋଚନା ଦାସ କହିଛନ୍ତି । ଆଗାମୀ ଦିନରେ ଯଦି ବିଏମସି ତାର ପ୍ରତିଶ୍ରୁତି ପାଳନ ନକରେ ତେବେ ଏହି ଆନ୍ଦୋଳନ ବଡ଼ ଆନ୍ଦୋଳନ ରୂପ ନେବ ବୋଲି ଚେତାବନୀ ଦେଇଛନ୍ତି ବସ୍ତିବାସିନ୍ଦା ।
ଇଟିଭି ଭାରତ, ଭୁବନେଶ୍ବର
