ଖୋର୍ଦ୍ଧା: ଜିଲ୍ଲା ବିଜେଡି ମଧ୍ୟରେ ଗୋଷ୍ଠୀ କନ୍ଦଳକୁ ନେଇ ଚର୍ଚ୍ଚା ଆରମ୍ଭ ହୋଇଛି । ସାଧାରଣ ନିର୍ବାଚନ ଯେତିକି ପାଖେଇ ଆସୁଛି ବିଜେଡି ଦଳ ମଧ୍ୟରେ ସେତିକି କନ୍ଦଳ ବଢୁଛି । ଏହାକୁ ନେଇ ବେଗୁନିଆରେ ଚର୍ଚ୍ଚା ଜୋର ଧରିଛି । ଅକ୍ଟୋବର ୨ ଗାନ୍ଧୀ ଜୟନ୍ତରୁ ମୁଖ୍ୟମନ୍ତ୍ରୀ ଆରମ୍ଭ କରିଛନ୍ତି ଜନସଂପର୍କ ପଦଯାତ୍ରା । କିନ୍ତୁ ବେଗୁନିଆରେ ବିଜେଡିର ଜନସମ୍ପର୍କ ପଦଯାତ୍ରାରେ ବେଗୁନିଆ ବିଧାୟକ ଦଳୀୟ ସଙ୍ଗଠନ ସହ ସମ୍ପର୍କ ତୁଟାଉଥିବା ଆଲୋଚନା ହେଉଛି ।
ଏକ ମାସ ହେଲା ପଦଯାତ୍ରା ଆରମ୍ଭ ହୋଇଥିବା ବେଳେ ବେଗୁନିଆ ସଦର ମହକୁମାରେ ପଦଯାତ୍ରା କରୁନଥିବା ବେଳେ ଦଳୀୟ ଛାମୁଆ ସଙ୍ଗଠନକୁ ମଧ୍ୟ ସାମିଲ କରୁ ନାଁହାନ୍ତି ବୋଲି ଅଭିଯୋଗ ହୋଇଛି । ଫଳରେ ବିଜୁ ଛାତ୍ର ଜନତା ଦଳ, ଯୁବ ବିଜୁ ଜନତା ଦଳ ଓ ବିଜୁ ମହିଳା ଜନତା ଦଳ ପକ୍ଷରୁ ଆଜି (ବୁଧବାର) ବେଗୁନିଆ ସଦର ମହକୁମାରେ ପଦଯାତ୍ରା ଅନୁଷ୍ଠିତ ହୋଇଥିଲା । ବେଗୁନିଆ ସମିତିସଭ୍ୟ ପ୍ରକାଶ ଚନ୍ଦ୍ର ବଳିୟାର ସିଂହଙ୍କ ନେତୃତ୍ବରେ ପୋଷ୍ଟଅଫିସ ଛକଠାରୁ ପଦଯାତ୍ରା ବାହାରି ବ୍ୟାଙ୍କ ଛକ, ଥାନା ଛକ, ବ୍ଲକ ଛକ ଦେଇ ବିଜୁ ପଟ୍ଟନାୟକ ପାର୍କ ଠାରେ ପହଁଚିଥିଲେ । ଏହି ପଦଯାତ୍ରାରେ ସରକାରଙ୍କ ଜନହିତକର ଯୋଜନା ଲୋକଙ୍କୁ ଅବଗତ କରାଯାଇଛି ।
ବିଜୁ ପଟ୍ଟନାୟକ ପାର୍କରେ ପହଞ୍ଚିବା ପରେ ବିଜୁବାବୁ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ କର୍ମକର୍ତ୍ତା । ଏହାପରେ ଉପସ୍ଥିତି ନେତାଏ ରାଜ୍ୟ ସରକାରଙ୍କ ଯୋଜନାକୁ ନେଇ ଭାଷଣ ଦେଇଥିଲେ । ଏହି ପଦଯାତ୍ରାରେ ବେଗୁନିଆ ବ୍ଲକ ବିଜୁ ଛାତ୍ର ଜନତା ଦଳ ସଭାପତି ବିଶ୍ୱଜିତ ଭୁଜବଳ, ଯୁବ ବିଜେଡ଼ି ସଭାପତି ବିଭୂତି ଭୂଷଣ ମହାନ୍ତି ପ୍ରମୁଖ ଯୋଗ ଦେଇଥିଲେ । ସାରାବ୍ଲକ ଅଞ୍ଚଳରୁ ୩ଶହରୁ ଊର୍ଦ୍ଧ୍ବ ବିଜେଡି କର୍ମୀ ଯୋଗଦେଇଥିଲେ । ଏପଟେ ବେଗୁନିଆର କୁଞ୍ଜୁରୀ ପଂଚାୟତ ଅନ୍ତର୍ଗତ ଡାଳତୋଳା ବଜାରରେ ପଦଯାତ୍ରା କରାଯାଇଥିଲା । ତେବେ ଗୋଟିଏ ବ୍ଲକରେ ଦୁଇ ଦୁଇଟି ଗୋଷ୍ଠୀ ପକ୍ଷରୁ କରାଯାଉଥିବା ପଦଯାତ୍ରାକୁ ନେଇ ଚର୍ଚ୍ଚା ଜୋର ଧରିଛି ।