ଖୋର୍ଦ୍ଧା: ଗତ 7ତାରିଖରୁ ନିଖୋଜ ଥିଲା ପୁଅ । ଥାନାରେ ଅଭିଯୋଗ କଲା ପରେ ମଧ୍ୟ ତଦନ୍ତ କରାଯାଇ ନଥିଲା । ଅନ୍ୟପଟେ ନିଖୋଜ ହେବାର 6 ଦିନ ପରେ ସ୍ଥାନୀୟ ଜଙ୍ଗଲରୁ ନାବାଳକର ମୃତ ଦେହ ଉଦ୍ଧାର କରାଯାଇଛି । ଏଭଳି ଏକ ଅଭାବନୀୟ ଘଟଣା ଘଟିଛି ଜିଲ୍ଲା ବେଗୁନିଆ ଥାନା ଅନ୍ତର୍ଗତ କୋଦୁଅବେରେଣି ଗାଁରେ । ଏହି ଘଟଣାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଉତ୍ତେଜନା ଦେଖା ଦେଇଛି । ଘଟଣାର ଉଚ୍ଚ ସ୍ଥରୀୟ ତଦନ୍ତ ଦାବିରେ ଉତ୍ୟକ୍ତ ଲୋକେ ରାସ୍ତାରୋକ କରିଛନ୍ତି ।
ତେବେ କୋଦବେରେଣି ଗାଁର ଶାନ୍ତିଲତା ମହାପାତ୍ରଙ୍କ ପୁଅ ହେଉଛନ୍ତି ବିଶ୍ୱଜିତ ମହାପାତ୍ର । ବିଶ୍ବଜିତ୍ ଦଶମ ଶ୍ରେଣୀର ଛାତ୍ର ଅଟନ୍ତି । ଗତ 7 ତାରିଖରୁ ସେ କୁଆଡେ ନିଖୋଜ ଥିଲେ । ତାଙ୍କର ନିଖୋଜ ନେଇ ମା' ଶାନ୍ତିଲତା ବେଗୁନିଆ ଥାନା ଅନ୍ତର୍ଗତ ଧଳାପଥର ଥାନାରେ ଅଭିଯୋଗ କରିଥିଲେ । ମାତ୍ର ଅଭିଯୋଗ କରିବାର 6 ଦିନ ପରେ ମଧ୍ୟ କୌଣସି ତଦନ୍ତ ହୋଇନଥିବା କହିଛନ୍ତି ନାବଳକଙ୍କ ମା ଶାନ୍ତିଲତା ।
ଗତକାଲି (ସୋମବାର) ନବାଳକଟିର ମୃତଦେହ ତାଙ୍କ ଘର ନିକଟସ୍ଥ କାଜୁ ଜଙ୍ଗଲରୁ ଉଦ୍ଧାର ହୋଇଛି । ତେବେ ପୁଅକୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ପରିବାର ଲୋକେ । ପ୍ରତିବାଦରେ 48ନଂ ରାଜ୍ୟ ରାଜପଥକୁ ସ୍ଥାନୀୟ ଲୋକ କୋଦବେରେଣିଠାରେ ଟାୟାର ଜାଳି ରାସ୍ତାରୋକ କରିଛନ୍ତି । ଅନ୍ୟପଟେ ଘଟଣାର ଉଚ୍ଚ ସ୍ଥରୀୟ ତଦନ୍ତ ସହ ଗାଁରେ ପେଟ୍ରୋଲିଂ ପାଇଁ ମଧ୍ୟ ଦାବି କରିଛନ୍ତି ଉତ୍ୟକ୍ତ ଗ୍ରାମବାସୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
