ଖୋର୍ଦ୍ଧା: ଜିଲ୍ଲାର ବୋଲଗଡ ବ୍ଳକ ରାଜସୁନାଖଳା ସ୍ଥିତ ଏସବିଆଇ ଏଟିଏମରେ ପାସବୁକ ପ୍ରିଣ୍ଟ ମେସିନ ପାଖରେ ଜମୁଛି ଗ୍ରାହକଙ୍କୁ ନାହିଁ ନଥିବା ଭିଡ଼ । ଏଠାରେ ସାମାଜିକ ଦୂରତା ରକ୍ଷା କରାଯାଉନଥିବାରୁ କୋରୋନା ଭୁତାଣୁ ସଂକ୍ରମଣର ଭୟ ରହିଛି ।
ମହାମାରୀ କୋରୋନା ପାଇଁ ସାରା ଦେଶରେ ଲକଡାଉନ ଜାରି ରହିଛି । ଶ୍ରମିକଠାରୁ ବ୍ୟବସାୟୀ ହାତ ଯୋଡି ବସିଛନ୍ତି । ଏଭଳି ପରିସ୍ଥିତିରେ କେନ୍ଦ୍ର ସରକାର ପ୍ରତ୍ୟେକ ମହିଳାଙ୍କ ଜନଧନ ଖାତାକୁ ୫ ଶହ , ଗ୍ୟାସ ପାଇଁ ୭୭୬ ଟଙ୍କା ସହାୟତା ପ୍ରଦାନ କରିଛନ୍ତି । ଆଉ ସେହି ଟଙ୍କା ଉଠାଇବା ପାଇଁ ମହିଳା ଓ ସେମାନଙ୍କ ପରିବାର ଲୋକେ ବ୍ୟାଙ୍କରେ ଭିଡ଼ ଜମାଉଛନ୍ତି ।
ବ୍ୟାଙ୍କ ବାହାରେ ଏଟିଏମ କାଉଣ୍ଟର ନିକଟରେ ଏହି ମେସିନଟି ରହିଛି । ତେବେ ଆସିଛି କି ନାହିଁ ଜାଣିବା ପାଇଁ ପାସ୍ବୁକକୁ ପ୍ରିଣ୍ଟ କରି ଚେକ କରିବାକୁ ଭିଡ ଜମାଯାଉଛି । ଆଉ ଏସବୁ ଯାଞ୍ଚ ନେଇ ମଧ୍ୟ କିଛି ବ୍ୟବସ୍ଥା ବା ଅଧିକାରୀ ନଥିବାରୁ ସାଧାରଣରେ ଭୟର ବାତାବରଣ ଖେଳିଯାଇଛି । ଏଣୁ ଏପ୍ରତି ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
