ଖୋର୍ଦ୍ଧା: ଗୋଟିଏ ପରେ ଗୋଟିଏ ବିପତ୍ତି ମାଡି ବସୁଛି ଚାଷୀଙ୍କ ଉପରେ । କିଛିଦିନ ତଳେ ଅମଳକ୍ଷମ ଫସଲରେ ଚକଡ଼ା ପୋକ ତାଣ୍ଡବ ରଚିଥିବା ବେଳେ ଏବେ ଲଘୁଚାପ ବର୍ଷା ଚାଷୀର ଚିନ୍ତାକୁ ଦ୍ବିଗୁଣିତ କରିଛି । ବିଶେଷ କରି ଖୋର୍ଦ୍ଧା ଜିଲ୍ଲାର ଚାଷୀମାନେ କେବଳ ଖରିଫ ଧାନ ଚାଷ ଉପରେ ନିର୍ଭର କରୁଥିବାବେଳେ ଲଘୁଚାପ ଜନିତ ଲଗାଣ ବର୍ଷାରେ ବ୍ୟାପକ ଧାନ ଫସଲ ନଷ୍ଟ ହେବା ସହ ଚାଷୀମାନେ ବିଶେଷ ଭାବେ ପ୍ରଭାବିତ ହୋଇଛନ୍ତି । କଟା ହୋଇଥିବା ଧାନ ଖଳାକୁ ଆଣିପାରିନାହିଁ ଚାଷୀ, ଫଳରେ କଟାଧାନ ଗୁଡିକ ପାଣିରେ ପଡ଼ି ରହିଛି । ଏବେ ଆସିଥିବା ଲଘୁଚାପ ବର୍ଷା ଯୋଗୁଁ ଧାନ ଗଛ ଜମିରେ ଶୋଇପଡ଼ିଛି ।
ଅନ୍ୟପଟେ ଅବଶିଷ୍ଟ ଧାନ ଫସଲ ମଧ୍ୟରୁ ଧାନ କାଟିବା ଯୋଗ୍ୟ ହୋଇସାରିଛି । ତେବେ ପାଚିଲା ତଥା କାଟିବା ଯୋଗ୍ୟ ଧାନ ବର୍ଷାରେ ଅଧିକ ପ୍ରଭାବିତ ହେବ ବୋଲି ଚାଷୀ କହିଛନ୍ତି । ଲଘୁଚାପ ବର୍ଷା ଯୋଗୁଁ କିଛି ସ୍ଥାନରେ ବିଲରୁ ଚାଷୀ ଧାନ ଆଣିନପାରି ଧାନକୁ ଜମିରେ କିମ୍ବା ଜମି ପାର୍ଶ୍ବରେ ଚାଷୀ ରଖିଛନ୍ତି । ଏହି ଦୁଇ ଚାରି ଦିନ ମଧ୍ୟରେ କଟାଯାଇଥିବା ଧାନକୁ ଜମିରେ ଶୁଖିବା ପାଇଁ ଛାଡ଼ି ଦେଇଥିଲେ ଚାଷୀ । ଯଦି ଲଘୁଚାପ ଜନିତ ଲଗାଣ ବର୍ଷା ନ କମେ, ତେବେ ପାଣିରେ ଭିଜିଥିବା ଧାନ ସହ ଧାନ କେଣ୍ଡାର ତଳ ଏବଂ ଉପର କେଣ୍ଡାର ଧାନ ଓଦା ହୋଇଯାଇଥିବ । ତେଣୁ ଧାନ ନଷ୍ଟ ହେବା ସମ୍ଭାବନା ଦେଖାଯାଇଛି । ସେପଟେ ସମଗ୍ର ଜିଲ୍ଲାରେ ଏହି ଲଘୁଚାପ ଜନିତ ବର୍ଷା 52.26 ମିଲିମିଟର ରେକର୍ଡ କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
