ଭୁବନେଶ୍ବର: ଗୃହ ବିଭାଗର ଖର୍ଚ୍ଚ ବାବଦରେ ମୁଖ୍ୟମନ୍ତ୍ରୀ ରଖିଥିବା ବିବୃତ୍ତିକୁ ନେଇ ରାଜନୈତିକ ଝଡ଼ ସୃଷ୍ଟି ହୋଇଛି । "ବିକାଶ ଓ ଅପରାଧକୁ ନେଇ ଯିଏ ରାଜନୀତି କରିବେ, ସେମାନେ ବିଧାନସଭାକୁ ଆସିପାରିବେନି" ବୋଲି ମୁଖ୍ୟମନ୍ତ୍ରୀ ରଖିଥିବା ବକ୍ତବ୍ୟକୁ ନେଇ ତାତିଛନ୍ତି ବିରୋଧୀ । ମୁଖ୍ୟମନ୍ତ୍ରୀ ବିରୋଧୀଙ୍କୁ ଧମକାଉଛନ୍ତି ବୋଲି କହି କ୍ଷୋଭ ପ୍ରକାଶ କରିଛନ୍ତି ବିରୋଧୀ ଦଳ ନେତା ଜୟନାରାୟଣ ମିଶ୍ର । ସେପଟେ "ମୁଖ୍ୟମନ୍ତ୍ରୀ ଅଧିକ ବିକାଶକୁ ବିରୋଧ କରୁଥିବାରୁ ସେ ନଆସିବା ଉଚିତ" ବୋଲି କହିଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର। ସେପଟେ ବିରୋଧୀଙ୍କୁ କାଉଣ୍ଟର କରିଛି ବିଜେଡି ।
ବିରୋଧୀ ଦଳର ନେତା ଜୟ ନାରାୟଣ ମିଶ୍ର କହିଛନ୍ତି , "ବକ୍ତବ୍ୟରୁ ସ୍ପଷ୍ଟ ହେଉଛି ମୁଖ୍ୟମନ୍ତ୍ରୀ ଧମକାଇବା ଲାଗି ଚେଷ୍ଟା କରୁଛନ୍ତି । ଯିଏ ମୋତେ ବିରୋଧ କରିବ ସେ ବିଧାନସଭାକୁ ଆସି ପାରିବ ନାହିଁ । ପୂର୍ବରୁ ବି ସେ ଏମିତି ଅନେକ ଚେଷ୍ଟା କରିଛନ୍ତି । ନବୀନ ପଟ୍ଟନାୟକ ହେଲେ ସବୁଠୁ ବଡ଼ ଜନ ବିରୋଧୀ । ବିକାଶର ସବୁଠୁ ବଡ଼ ବାଧକ ହେଲେ ନବୀନ ପଟ୍ଟନାୟକ । ସେ କେମିତି ବିଧାନସଭା ଫେରିବେ ସେ କଥା ନିଜେ ଚିନ୍ତା କରନ୍ତୁ । ସେ ଯେମିତି ଜନ ବିରୋଧୀ କାମ କରିଛନ୍ତି ଲାଗୁଛି ଆଉ ବିଧାନସଭା ଫେରିବେନି । କିଏ ଜିତିବ କିଏ ହାରିବ ସେଇଟା ତାଙ୍କ ଉପରେ ନିର୍ଭର କରେନାହିଁ । ଜନତାଙ୍କ ଉପରେ ଏହା ନିର୍ଭର କରେ । ହୁଏତ ସେ ବୁଥ କ୍ୟାପଚର, ସରକାରୀ କଳର ବ୍ୟବହାର କରି ବହୁତ ପ୍ରଭାବିତ କରୁଛନ୍ତି ।"
"ମୋତେ ବିଧାନସଭାରେ ପୁରାଇ ନଦେବାକୁ ମେଣ୍ଟ ଭାଙ୍ଗିବା ପରେ 2009 ରୁ ପ୍ଲାନ କରୁଛନ୍ତି । ଯିଏ ଯିଏ ତାଙ୍କ ବିରୁଦ୍ଧରେ କହୁଛନ୍ତି ସେମାନଙ୍କୁ ବିଧାନସଭାରେ ପୁରେଇ ନଦେବାକୁ ଚେଷ୍ଟା କରନ୍ତି ନବୀନ ପଟ୍ଟନାୟକ । ମୋ କ୍ଷେତ୍ରରେ 2014ରେ ସଫଳ ହୋଇଥିଲେ । 2019ରେ ବିଫଳ ହୋଇଥିଲେ । ବିଜୟ ମହାପାତ୍ର, ନଳିନୀ ମହାନ୍ତି, ପ୍ରଶାନ୍ତ ନନ୍ଦ ତାର ଉଦାହରଣ । ଲେଡି ଇନ୍ସପେକ୍ଟରଙ୍କ ସହ ମୁହାଁମୁହିଁ ଘଟଣାରେ ମୁଖ୍ୟମନ୍ତ୍ରୀ ମୋତେ ଟାର୍ଗେଟ କରିଛନ୍ତି । ଏହି ଘଟଣାରେ ଲେଡି ଇନ୍ସପେକ୍ଟର ଦାୟୀ । ତାଙ୍କର ଲେଡିସ ଅଞ୍ଚଳରେ ଡ୍ୟୁଟି ଥିଲା । ସେ କାହିଁକି ପୁରୁଷଙ୍କ ଅଞ୍ଚଳକୁ ଆସିଥିଲେ । କାହିଁକି ମୋ ଗୋଡ଼କୁ ସେ ଦଳି ଦେଲେ । ଆଜି ପର୍ଯ୍ୟନ୍ତ ମୋ ଗୋଡ଼ ଠିକ ହୋଇପାରିନାହିଁ । ଏହାର ତଦନ୍ତ ମୁଖ୍ୟମନ୍ତ୍ରୀ କରିଛନ୍ତି କି ?" ବୋଲି ପ୍ରଶ୍ନ କରିଛନ୍ତି ଜୟନାରାୟଣ।
ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି , " ବିକାଶକୁ ଯିଏ ବିରୋଧ କରେ ସେ ବିଧାନସଭା ନ ଆସିବା ଉଚିତ । ଏଥିରେ ମୁଁ ସହମତ । କିନ୍ତୁ ବିକାଶକୁ ବାଧା କିଏ ଦେଉଛି ? ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲାଙ୍ଗୀର ବିକାଶରେ ବାଧକ ସାଜିଛନ୍ତି । ମୁଖ୍ୟମନ୍ତ୍ରୀଙ୍କ ସହଯୋଗରେ ବଲାଙ୍ଗୀର ନିର୍ବାଚନ ମଣ୍ଡଳୀରେ ବହୁତ ବିକାଶ ହୋଇଛି । କିନ୍ତୁ କେଜାଣି କାହିଁକି କିଛି ସମୟ ହେଲା ସେ ବିକାଶକୁ ବିରୋଧ କରୁଛନ୍ତି । ଉଦାହରଣ ଓ ପ୍ରମାଣ ବି ଅଛି । ସହରରେ ଥିବା ମହରାଣୀ ସାଗରକୁ ଦେଢ଼ ବର୍ଷ ହେଲା 20 କୋଟି ଟଙ୍କା ଦିଆଯାଇଛି । ତାଙ୍କ ନିର୍ଦ୍ଦେଶରେ ବିକାଶ କାର୍ଯ୍ୟ ବନ୍ଦ କରିଦିଆଯାଇଛି । ଶୁଭ ଦିଆଯାଇ ଏକ କେନ୍ଦ୍ରୀୟ ସଂସ୍ଥାକୁ କାମ କରିବାକୁ ଦିଆଯାଇଥିଲା । ସୁନ୍ଦର ପ୍ରକଳ୍ପ ରିପୋର୍ଟ ପ୍ରସ୍ତୁତ ହୋଇଥିଲା । ତାକୁ ବନ୍ଦ କରାଯାଇଛି ।"
