ଭୁବନେଶ୍ବର: ଗତ ୧୫ ଦିନ ମଧ୍ୟରେ କୋଭିଡ ରୋଗୀଙ୍କ ସଂଖ୍ୟା ସାରା ଦେଶରେ ଉପରମୁହାଁ ହୋଇଛି । କେବଳ ୫ଟି ରାଜ୍ୟରୁ ମୋଟ ୯୮% କୋଭିଡ୍ ଆକ୍ରାନ୍ତ ଅଛନ୍ତି । କେବଳ କେରଳରୁ ମୋଟ ୮୮ % ରୋଗୀ ଠାବ ହୋଇଥିବା ବେଳେ ତାମିଲନାଡୁରେ ୫%, କର୍ଣ୍ଣାଟକରେ ୫% ଏବଂ ଅବଶିଷ୍ଟ ରୋଗୀ ଗୋଆ ଏବଂ ପଞ୍ଜାବରୁ ଠାବ ହୋଇଛନ୍ତି । କୋଭିଡର ନୂଆ ଭାରିଏଣ୍ଟ JN.1 ଯଦିଓ ବ୍ୟାପୁଛି କିନ୍ତୁ ସାଙ୍ଘାତିକ ହେଉନାହିଁ । ଏହାର ଲକ୍ଷଣ ସାଧାରଣ ଇନଫ୍ଲୁଏଞ୍ଜା ଭଳି ଥଣ୍ଡା, କାଶ, ଜ୍ଵର ରହୁଛି । ଗତ ଅଗଷ୍ଟ ଓ ସେପ୍ଟେମ୍ବର ମାସରୁ ନୂଆ ଭାରିଏଣ୍ଟ JN.1କୁ ଚିହ୍ନଟ କରାଯାଇଥିଲା । କିନ୍ତୁ କେନ୍ଦ୍ର ସରକାର ସମସ୍ତ ରାଜ୍ୟଙ୍କୁ ଏନେଇ ସତର୍କ ରହିବାକୁ ଚିଠି ଲେଖିଛନ୍ତି ।
ରାଜ୍ୟରେ ଗତ ଡିସେମ୍ବର ୩ ତାରିଖ ଠାରୁ କୋଭିଡର ଗୋଟିଏ ହେଲେ କେସ ଆସିନାହିଁ ଅର୍ଥାତ୍ ରାଜ୍ୟରେ ଆକ୍ଟିଭ କୋଭିଡ୍ କେସ ସଂଖ୍ୟା ଶୂନ ରହିଛି । ତଥାପି ରାଜ୍ୟ ସ୍ବାସ୍ଥ୍ୟ ବିଭାଗକୁ ଆଲର୍ଟ ରହିବାକୁ ପାଇଁ କୁହାଯାଇଛି । ଏଣୁ ଇନଷ୍ଟିଚ୍ୟୁଟ ଅଫ ଲାଇଫ ସାଇନ୍ସର ସହାୟତାରେ ସମସ୍ତ ଜିଲ୍ଲା ଚିକିତ୍ସାଳୟମାନଙ୍କୁ ସର୍ଭେଲାନ୍ସ ଓ କୋଭିଡ ଟେଷ୍ଟ ବଢାଇବାକୁ ଏବଂ ଫିଭର୍ କ୍ଲିନିକ୍ ଚଳାଇବାକୁ କୁହାଯାଇଛି । କୋଭିଡ୍ କେସ ଯଦି ବଢେ ତା ପାଇଁ ସମସ୍ତ ପ୍ରକାର ପ୍ରସ୍ତୁତି ଏବେ ଠାରୁ କରି ରଖିବାକୁ ନିର୍ଦ୍ଦେଶ ରହିଛି । ଔଷଧ, ଲଜିଷ୍ଟିକ, ଟେଷ୍ଟ କିଟ୍, ବେଡ୍, ଅକ୍ସିଜେନ୍ , ଇକୋ ସିଷ୍ଟମ ସହ ଯାହା ଆବଶ୍ୟକ ଜିନିଷ ଡାକ୍ତରଖାନାରେ ମହଜୁଦ ରଖିବେ ।
ଏହା ମଧ୍ୟ ପଢନ୍ତୁ ... 'ଓଡ଼ିଶାରେ ନାହିଁ ନୂଆ ଭାରିଆଣ୍ଟ JN.1, ଲକ୍ଷଣ ଥିଲେ ତୁରନ୍ତ ଟେଷ୍ଟ କରାନ୍ତୁ'
ଏହା ସହିତ ପ୍ରତି ୩ ମାସରେ ଥରେ ମକ ଡ୍ରିଲ୍ କରିବା ପାଇଁ ମଧ୍ୟ ନିର୍ଦ୍ଦେଶ ରହିଛି । ଲୋକଙ୍କୁ ମଧ୍ୟ ସଚେତନ ରହିବା ପାଇଁ କୁହାଯାଇଛି । କୌଣସି ପ୍ରକାର ଭୟ ବା ଆତଙ୍କିତ ନ ହୋଇ କୋଭିଡ ନିୟମ ଅନୁପାଳନ କରିବାକୁ ଲୋକଙ୍କୁ ନିବେଦନ କରାଯାଇଛି । ଥଣ୍ଡା, କାଶ, ଜ୍ଵର ହେଲେ ଗହଳି ସ୍ଥାନକୁ ନ ଯିବାକୁ କୁହାଯାଇଛି । ବୟସ୍କ ଓ କୋମର୍ବିଡ ଅର୍ଥାତ ଡାଇବେଟିସ, ରକ୍ତଚାପ ଭଳି ଅନ୍ୟାନ୍ୟରୋଗରେ ପୀଡି଼ତ ମାନେ ମାସ୍କ ବ୍ୟବହାର କରନ୍ତୁ ବୋଲି ଜନସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର କହିଛନ୍ତି ।
ଇଟିଭି ଭାରତ, ଭୁବନେଶ୍ବର
