ଖୋର୍ଦ୍ଧା: ଜଟଣୀ ଥାନା କୁଶମାଟିରୁ ଦୁଇ ମୋବାଇଲ ଲୁଟେରାଙ୍କୁ କାବୁ କରି ପୋଲିସରେ ଜିମା ଦେଲେ ଗ୍ରାମବାସୀ । ଅଭିଯୋଗ ଅନୁସାରେ ଦୀର୍ଘ କିଛି ଦିନ ହେବ ଗାଁର ବିଭିନ୍ନ ଅଞ୍ଚଳରୁ ମୋବାଇଲ ଚୋରି ହୋଇଆସୁଥିଲା ।
ଏହି ଘଟଣାରେ ଜଣେ ବ୍ୟକ୍ତିଙ୍କ ମୋବାଇଲ ଚୋରି ହେବା ପରେ ସେହି ଗ୍ରାମର ଜଣେ ଯୁବକ ତାଙ୍କୁ କିଛି ପଇସା ମାଗିଥିଲା । କହିଥିଲା ପଇସା ଦେଲେ ତାଙ୍କ ମୋବାଇଲ ମିଳିଯିବ । ମୋବାଇଲ ଚୋରି ହୋଇଥିବା ବ୍ୟକ୍ତିଙ୍କ ସନ୍ଦେହ ହେବାରୁ ସେ ପଇସା ଦେବାକୁ ରାଜି ହୋଇଥିଲେ । ତେବେ ମଙ୍ଗଳବାର ମୋବାଇଲ ବଦଳରେ ପଇସା ନେବାକୁ ଆସିଥିବା ବେଳେ ଦୁଇ ଜଣଙ୍କୁ କାବୁ କରିଥିଲେ ଗ୍ରାମବାସୀ ।
ଗ୍ରାମବାସୀ ଉକ୍ତ ଯୁବକଙ୍କୁ ଧରି ପଚରାଉଚୁରା କରିବାରୁ ସେମାନଙ୍କ ମଧ୍ୟରୁ ଜଣେ ଯୁବକ ନିଜକୁ ପ୍ରଥମେ ସାମ୍ବାଦିକ ପରିଚୟ ଦେଇଥିଲା । ତେବେ ଏଥିରେ ମାନିନଥିଲେ ଗ୍ରାମବାସୀ । ପୁଣି ତାକୁ ପଚରା ଉଚୁରା କରିବା ପରେ ନିଜକୁ ଜଣେ ଛାତ୍ର କହିଥିଲା ଏବଂ ପରେ ମୋବାଇଲ ଚୋରି ଘଟଣା ସମ୍ପର୍କରେ ସ୍ବୀକାର କରିଥିଲା । ଦୁଇ ଯୁବକଙ୍କ ମଧ୍ୟରେ ଜଣେ ସେହି ଗ୍ରାମର ହୋଇଥିବା ବେଳେ ଅନ୍ୟ ଯୁବକର ଘର କେନ୍ଦ୍ରାପଡା ଜିଲ୍ଲାରେ ବୋଲି ଜଣାପଡିଛି । ତେବେ ଏହି ମୋବାଇଲ ଚୋରି ଗ୍ୟାଙ୍ଗରେ ଅନ୍ୟ କେଉଁମାନେ ସାମିଲ ଅଛନ୍ତି ସେନେଇ ଅଧିକ ତଦନ୍ତ କରୁଛି ଜଟଣୀ ପୋଲିସ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
