ଭୁବନେଶ୍ବର: ପୋଲିସ ଡାଳେ ଡାଳେ ଗଲେ ଲୁଟେରା ପତ୍ରରେ ପତ୍ରରେ । ସୁରକ୍ଷା ବ୍ୟବସ୍ଥାକୁ ଯେତେ କଡାକଡି କଲେ ମଧ୍ୟ ଥମିବାର ନାଁ ଧରୁନି ଲୁଟପାଟ, ଚୋରୀ ଓ ଛିନତାଇ । ପୁଣି ରାଜଧାନୀରୁ ସାମ୍ନାକୁ ଆସିଲା ଚେନ ଝାମ୍ପି ନେବା ଘଟଣା । ରାସ୍ତା ପାର ହେଉଥିବା ବେଳେ ମହିଳାଙ୍କ ବେକରୁ ସୁନା ଚେନ ଝାମ୍ପି ନେଲେ ଦୁଇ ଯୁବକ । ଶନିବାର କ୍ୟାପିଟାଲ ଥାନା ସମ୍ମୁଖରେ ଘଟିଛି ଏପରି ଘଟଣା । ଲୁଟର ଶିକାର ହୋଇଥିବା ମହିଳା ହେଉଛନ୍ତି ବରମୁଣ୍ଡାର ମାଉସି ବୋର୍ଡର ଅନୁସୁୟା ବାରିକ ।
ମିଳିଥିବା ସୂଚନା ଅନୁଯାୟୀ, ମହିଳା ଜଣଙ୍କ ଗତକାଲି ମାର୍କେଟିଂ ପାଇଁ ଏକ ନମ୍ବର ହାଟକୁ ଆସିଥିଲେ । ଏହି ସମୟରେ ମହିଳାଙ୍କୁ ଦୁଇ ଯୁବକ ପିଛା କରିଥିଲେ । ଯେତେବେଳେ ମହିଳା ଜଣଙ୍କ ଦୁର୍ଗାପୁଜା ମଣ୍ଡପ ପଟୁ କ୍ୟାପିଟାଲ ଥାନା ସାମ୍ନାକୁ ରାସ୍ତା ପାର ହେଉଥିଲେ ଏହି ସମୟରେ ଦୁଇ ଯୁବକ ବାଇକରେ ଆସି ବେକରୁ ଚେନ ଝାମ୍ପି ନେଇଥିଲେ । ଏହାପରେ ମହିଳା ଜଣଙ୍କ ରାସ୍ତାରେ ଚିତ୍କାର କରିବାରୁ ଦୁଇ ଯୁବକ ଚେନ ଧରି ଫେରାର ହୋଇଯାଇଥିଲେ । ସଙ୍ଗେ ସଙ୍ଗେ ମହିଳା ଜଣକ କ୍ୟାପିଟାଲ ଥାନାରେ ଜଣାଇବା ପରେ ପୋଲିସ ଘଟଣା ସ୍ଥଳକୁ ଯାଇ ସିସିଟିଭି ଫୁଟେଜ ଆଧାରରେ ତଦନ୍ତ ଆରମ୍ଭ କରିଛି ।
ଏହା ମଦ୍ୟ ପଢନ୍ତୁ-ହାତୀ ଦେଖିବାକୁ ଯାଇଥିଲେ, କଚାଡ଼ି ମାରିଲା ଦନ୍ତା
ଇଟିଭି ଭାରତ, ଭୁବନେଶ୍ବର
