ଖୋର୍ଦ୍ଧା : ଖଣି ଓ ଡ୍ରଗ୍ସ ମାଫିଆର ବିଳାସପୂର୍ଣ୍ଣ ଘର ଉପରେ ମାଡିଲା ବୁଲଡୋଜର । ସରକାରୀ ଜମିରେ ବେଆଇନ ଘର କରିବା ସହ ନିଶା କାରବାର କରୁଥିଲା ଛୋଟା ଓରଫ ଶୁଭ୍ରାଂଶୁ ପରିଡା । ଖୋର୍ଦ୍ଧା ତହସିଲର ଗୁରୁଜଙ୍ଗ ଜବରଦସ୍ତପୁର ଠାରେ ପ୍ରାୟ ଏକ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା କୋଠାକୁ ଖୋର୍ଦ୍ଧା ଉପଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଆଜି ତହସିଲଦାର ବୁଲଡୋଜର ଚଢାଇ ଭାଙ୍ଗିଛନ୍ତି।
ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ତିନି ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ଦିର୍ଘ ତିନି ବର୍ଷ ହେଲା ଏହି ଘରେ ଛୋଟା ବେଆଇନ ଭାବେ ନିଶା ଓ ଖଣି ବ୍ୟବସାୟ ଚଳାଉଥିଲା । ପାଖାପାଖି 400 ଡ଼ିସିମିଲ ସରକାରୀ ଜାଗାକୁ ଜୋର ଜବରଦସ୍ତ କବଜା କରି ଘରେ ଶୀତତାପ ନିୟନ୍ତ୍ରଣ ସହ ସୁଇମିଂପୁଲ ଓ ବିଦେଶୀ କୁକୁରରେ ଚକମକ ଘର କରିଥିଲା ଖଣି ମାଫିଆ ଛୋଟା ।
ତେବେ ଛୋଟା ଜଣେ ପରିବା ଦୋକାନୀ ହୋଇଥିବାରୁ ଏତେ ସମ୍ପତ୍ତିର ମାଲିକ କିପରି ହେଲା ତାକୁ ନେଇ ଅଞ୍ଚଳରେ ଚର୍ଚ୍ଚା ଜୋର ଧରିଛି । ପୂର୍ବ ଓଡ଼ିଶାର ନିଶା ମାଫିଆ ଛୋଟା , ସୁଦୂର ବଙ୍ଗଳାଦେଶରୁ ବ୍ରାଉନସୁଗାର ଆଣି ଏଠାରେ ସ୍ଥାନୀୟ ଯୁବକଙ୍କ ସହାୟତାରେ କାରବାର ଚଳାଇଥିଲା।
ଏନେଇ କ୍ରାଇମବ୍ରାଞ୍ଚର ଏସଟିଏଫ ଟିମ ଛୋଟାକୁ ଗିରଫ କରିବା ପାଇଁ ଯୋଜନା ସମ୍ପର୍କରେ ଖବର ପାଇ ସେ ଗତ 9ତାରିଖରେ ଖୋର୍ଦ୍ଧା କୋର୍ଟରେ ଆତ୍ମସମର୍ପଣ କରିଥିବା ଜଣାପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା , ଈଟିଭି ଭାରତ
