ଖୋର୍ଦ୍ଧା: ରାଜ୍ୟରେ ବଢୁଥିବା କୋରୋନା ସଂକ୍ରମଣକୁ ନଜରରେ ରଖି ରାଜ୍ୟ ସରକାର ନେଇଛନ୍ତି କିଛି ଗୁରୁତ୍ବପୂର୍ଣ୍ଣ ନିଷ୍ପତ୍ତି । ଏଥିରେ ରାଜ୍ୟର 4ଟି ଜିଲ୍ଲା ଯଥା ଗଞ୍ଜାମ, ଖୋର୍ଦ୍ଧା, ଯାଜପୁର, କଟକ ଓ ରାଉରକେଲାର ପୌରାଞ୍ଚଳରେ ପୁଣି ଲକଡାଉନ ଘୋଷଣା କରାଯାଇଛି । ଯାହାକୁ ନେଇ ଖୋର୍ଦ୍ଧାର ଅନେକ କ୍ଷୁଦ୍ର ବ୍ୟବସାୟୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖାଯାଇଛି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଜିଲ୍ଲାର ସମାଜସେବୀ ଓ ବୁଦ୍ଧିଜୀବୀ ।
ଜିଲ୍ଲାର ସମାଜସେବୀ ଓ ବୁଦ୍ଧିଜୀବୀଙ୍କ କହିବା ଅନୁଯାୟୀ ବର୍ତ୍ତମାନ ପରିସ୍ଥିତିରେ କୋରୋନା ସଂକ୍ରମଣକୁ ରୋକିବା ପାଇଁ ଲକଡାଉନ ଏକ ଉପାୟ ନୁହେଁ । ଏବେ ବାୟୁ ଦ୍ବାରା ମଧ୍ୟ ସଂକ୍ରମଣ ବ୍ୟାପିବାର ଡର ରହୁଥିବା ବେଳେ ଲକଡାଉନ ଦ୍ବାରା ଏହାକୁ ରୋକାଯାଇପାରିବ ନାହିଁ ବୋଲି ସେମାନେ ମତ ଦେଇଛସନ୍ତି । ଅପରପାର୍ଶ୍ବରେ କିଛି ଦିନର ବିରତି ପରେ ପୁଣି ବ୍ୟବସାୟ ଧିରେ ଧିରେ ସ୍ବାଭାବିକ ହେବାକୁ ବସିଥିବା ବେଳେ ଲକଡାଉନ ପାଇଁ ରୋଜଗାର ଉପରେ ଚଡକ ପଡିଛି ।
ତେଣୁ ସରକାର ବର୍ତ୍ତମାନ କୋରୋନା ମୁକାବିଲା ପାଇଁ ଅନ୍ୟ କିଛି ଉପାୟର ଚିନ୍ତା କରିବା ଆବଶ୍ୟକତା ରହିଥିବା ପ୍ରକାଶ କରିଛନ୍ତି ଜିଲ୍ଲାର ସମାଜସେବୀ ଓ ବୁଦ୍ଧିଜୀବୀ । ଏଥିସହ ସହରାଞ୍ଚଳରେ ଯେପରି ଲକଡାଉନକୁ କଡାକଡି ପାଳନ ହେଉଛି ସେହିପରି ଗ୍ରାମାଞ୍ଚଳରେ ମଧ୍ୟ କଡାକଡି କରିବାର ଆବଶ୍ୟକତା ରହିଛି । ସେହିପରି ପ୍ରତିଦିନ ସବୁ ଅଞ୍ଚଳକୁ ସାନିଟାଇଜ କରାଯିବା ଦରକାର ବୋଲି ମତ ପ୍ରକାଶ ପାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
