ଭୁବନେଶ୍ବର: କଂଗ୍ରେସରେ ଯୋଗଦେଲେ ଦିବଂଗତ ରାଜନେତା ତଥା ପୂର୍ବତନ ସାଂସଦ ପ୍ୟାରୀମୋହନ ମହାପାତ୍ରଙ୍କ ଝିଅ ସିକ୍ତା ପତି । କଂଗ୍ରେସରେ ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ ଯୋଗଦେବା ପରେ ଏବେ ସଂଗଠନକୁ ସକ୍ରିୟ କରିବା ନେଇ ଦଳରେ ନୂଆ ଆଶା ସଞ୍ଚାର ହୋଇଛି । ବୁଧବାର ବିଜେଡି ଛାଡି କଂଗ୍ରେସରେ ଯୋଗ ଦେଇଛନ୍ତି ପୂର୍ବତନ ସାଂସଦ ପ୍ୟାରୀ ମହାପାତ୍ରଙ୍କ ଝିଅ ସିକ୍ତା ପତି । ରାହୁଲ ଗାନ୍ଧିଙ୍କ ଭାରତ ଯୋଡୋ ଯାତ୍ରା ତାଙ୍କୁ ପ୍ରଭାବିତ କରିଛି ବୋଲି କଂଗ୍ରେସରେ ଯୋଗଦେବା ପରେ ସିକ୍ତା କହିଛନ୍ତି ।
ନିକଟରେ ଦିଲ୍ଲୀ ଯାଇ AICC ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ସାଧାରଣ ସମ୍ପାଦକ କେସି ବେଣୁ ଗୋପାଳ, ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର ଓ ପିସିସି ସଭାପତି ଶରତ ପଟ୍ଟନାୟକଙ୍କ ଉପସ୍ଥିତିରେ କଂଗ୍ରେସର ହାତ ଧରିଥିଲେ ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ । ସେ ଦଳରେ ଯୋଗଦେବାବେଳେ ଆହୁରି ଅନେକ ପ୍ରଶାସକ, ଡାକ୍ତର ଓ ଅନ୍ୟାନ୍ୟ କ୍ଷେତ୍ରରୁ ବ୍ୟକ୍ତି ବିଶେଷ କଂଗ୍ରେସରେ ଯୋଗଦେବେ ବୋଲି ସୂଚନା ଦେଇଥିଲେ କଂଗ୍ରେସ ବିଧାୟକ ସୁର ରାଉତରାୟ ।
ତେବେ ଏହି ପରିପ୍ରେକ୍ଷୀରେ ବୁଧବାର ଦଳରେ ଯୋଡ଼ି ହୋଇଛନ୍ତି ଦିବଂଗତ ରାଜନେତା ତଥା ପୂର୍ବତନ ସାଂସଦ ପ୍ୟାରୀମୋହନ ମହାପାତ୍ରଙ୍କ ଝିଅ ସିକ୍ତା ପତି । କଂଗ୍ରେସରେ ଯୋଗ ଦେବାପରେ ସିକ୍ତା କହିଛନ୍ତି, "ମୋତେ ଗୋଟେ ଜାତୀୟ ଦଳର ଅଂଶ ହେବାପାଇଁ ସୁଯୋଗ ମିଳିଛି । ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ଯାତ୍ରାରେ ଅନୁପ୍ରାଣିତ ହୋଇ ମୁଁ କଂଗ୍ରେସରେ ଯୋଗ ଦେଇଛି । ସମସ୍ତେ କୁହନ୍ତି ଆମେ ସମସ୍ତଙ୍କୁ ନେଇକି ଚାଲିବୁ । କିନ୍ତୁ ରାହୁଲ ଗାନ୍ଧି ହିଁ ଏହାକୁ କରି ଦେଖାଇଛନ୍ତି ।" ତେବେ ଦଳ ଯାହା ଦାୟିତ୍ବ ଦେବ ତାହାକୁ ମୁଁ ତୁଲାଇବାକୁ ଚେଷ୍ଟା କରିବି ବୋଲି କହିଛନ୍ତି ସିକ୍ତା ।
ଏନେଇ ପିସିସି ସଭାପତି ଶରତ ପଟ୍ଟନାୟକ କହିଛନ୍ତି, "ଆଗକୁ କଂଗ୍ରେସ ଅଧିକ ଶକ୍ତିଶାଳୀ ହେବ । ଏବେ ରାଜ୍ୟ ସରକାରଙ୍କୁ ଲୋକେ ଚିହ୍ନି ସାରିଲେଣି । ଆଗକୁ କଂଗ୍ରେସ ଲୋକଙ୍କ ବିଶ୍ବାସଭାଜନ ହେବ । ବିଜୟ ପଟ୍ଟନାୟକ ମିଶିଥିଲେ । ଏବେ ପ୍ୟାରୀ ମହାପାତ୍ରଙ୍କ ଝିଅ ମିଶିଲେ । ଏହାଦ୍ବାରା ଦଳ ଅଧିକ ସଶକ୍ତ ହେବ ।"
ଗତକାଲି(ବୁଧବାର) କଂଗ୍ରେସ ଭବନରେ ଆୟୋଜିତ ଏକ ମିଶ୍ରଣ ପର୍ବରେ ଅବସରପ୍ରାପ୍ତ ରେଳବାଇ ଅଧିକାରୀ ହେମନ୍ତ ଦତ୍ତ, ରାଧାକାନ୍ତ ନାୟକ, ଆଇନଜୀବୀ ପ୍ରଦୀପ କୁମାର ପ୍ରଧାନ ପ୍ରମୁଖ କଂଗ୍ରେସ ଦଳରେ ମିଶିଛନ୍ତି । ରାଜ୍ୟ ପ୍ରଭାରୀ ଚେଲ୍ଲା କୁମାର, ପିସିସି ସଭାପତି ଶରତ ପଟ୍ଟନାୟକ, ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଉପସ୍ଥିତିରେ ସମସ୍ତେ କଂଗ୍ରେସରେ ଯୋଗ ଦେଇଛନ୍ତି ।
ଇଟିଭି ଭାରତ, ଭୁବନେଶ୍ବର
