ଭୁବନେଶ୍ବର: ସେଭ୍ ଏଲିଫାଣ୍ଟ ଫାଉଣ୍ଡେସନ୍ ଟ୍ରଷ୍ଟ (Save Elephant Foundation Trust)ର ଏକାଦଶ ପ୍ରତିଷ୍ଠା ଦିବସ । ଏଥିରେ ମୁଖ୍ୟ ଅତିଥି ଭାବେ ଯୋଗ ଦେଇ ହାତୀ ସୁରକ୍ଷା ଉପରେ ଗୁରୁତ୍ବାରୋପ କରିଛନ୍ତି ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରଦୀପ କୁମାର ଅମାତ । ହାତୀ ମନୁଷ୍ୟ ବିବାଦ ଏବେ ଦିନକୁ ଦିନ ବଢିବାରେ ଲାଗିଛି । ଏହି ୨ ପ୍ରାଣୀଙ୍କ ଶାନ୍ତିପୂର୍ଣ୍ଣ ସହାବସ୍ଥାନ ପାଇଁ ପିପିସିପି ମଡେଲ (ପବ୍ଲିକ୍-ପ୍ରାଇଭେଟ୍-କମ୍ଯୁନିଟି-ପାର୍ଟନରସିପ୍)ର ସହାୟକ ହେବ ବୋଲି କହିଛନ୍ତି ମନ୍ତ୍ରୀ ପ୍ରଦୀପ ।
ଏନେଇ ମନ୍ତ୍ରୀ ପ୍ରଦୀପ କହିଛନ୍ତି, "ହାତୀ-ମନୁଷ୍ୟ ବିବାଦ ଦିନକୁ ଦିନ ବଢ଼ିବାରେ ଲାଗିଛି । ରାଜ୍ୟରେ ଅନେକ ସ୍ଥାନରେ ଏହା ମୁଣ୍ଡବ୍ୟଥାର କାରଣ ହୋଇଛି । ଏହି ବିବାଦ ମଧ୍ୟରେ ପରସ୍ପର ସହ ସଂଶ୍ଳିଷ୍ଟ ଜୈବମଣ୍ଡଳ, ସମାଜ ଓ ପରିବେଶ ସନ୍ତୁଳନରେ ହାତୀମାନଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି । ଡାଇନୋସର ପରେ ବର୍ତ୍ତମାନ ସ୍ଥଳଭାଗର ସବୁଠାରୁ ବଡ଼ ପ୍ରାଣୀ ହେଉଛି ହାତୀ । ଯଦି ହାତୀମାନେ ନ ରୁହନ୍ତି ତା’ହେଲେ ଜୈବମଣ୍ଡଳରେ ତାଙ୍କ ସ୍ଥାନ ଅନ୍ୟ କେହି ନେଇପାରିବେ ନାହିଁ ।" ମୁଖ୍ୟମନ୍ତ୍ରୀଙ୍କ ମାର୍ଗଦର୍ଶନରେ ହାତୀ-ମନୁଷ୍ୟଙ୍କ ଶାନ୍ତିପୂର୍ଣ୍ଣ ସହାବସ୍ଥାନ ପାଇଁ ଅନେକ ପଦକ୍ଷେପ ଗ୍ରହଣ କରିଛନ୍ତି । ପିପିସିପି ମଡେଲ୍ରେ କାର୍ଯ୍ୟ କରାଗଲେ ହାତୀ-ମନୁଷ୍ୟ ବିବାଦରେ ଅନେକ ଉପଶମ ମିଳିପାରିବ ବୋଲି ମନ୍ତ୍ରୀ ମତ ରଖିଛନ୍ତି ।
ପରିବେଶ ସନ୍ତୁଳନରେ ହାତୀ ଏକ ପ୍ରମୁଖ ଭୂମିକା ନିର୍ବାହ କରିଥାଏ । ହାତୀମାନଙ୍କ ରହିବା ସ୍ଥାନକୁ ଭଲ ଜଙ୍ଗଲ ଥିବା ଅଞ୍ଚଳ ବୋଲି ବିବେଚନା କରାଯାଇଥାଏ । ଜୈବମଣ୍ଡଳ ପାଇଁ ଜଙ୍ଗଲ ନିତାନ୍ତ ଆବଶ୍ୟକ ଏକଥା ସମସ୍ତେ ଜାଣିଛନ୍ତି ବୋଲି ପ୍ରଧାନ ବନସଂରକ୍ଷକ ବନ୍ୟାପ୍ରାଣୀ ପିସିସିଏଫ ସୁଶୀଲ କୁମାର ପୋପଲି ପ୍ରକାଶ କରିଛନ୍ତି । ସେ କହିଛନ୍ତି ଯେ, ଢେଙ୍କାନାଳରେ ସୋଲାର ଫେନସିଂର ୪ଟି ପ୍ରକଳ୍ପ ଆରମ୍ଭ ହୋଇଛି । ଧୀରେଧୀରେ ସବୁ ଜିଲ୍ଲାରେ ଆରମ୍ଭ ହେବ ବୋଲି କହିଛନ୍ତି । ସୂଚନା ଥାଉ କି ଗତ ୧୦ ବର୍ଷରେ ୭୮୪ ଗୋଟି ହାତୀ ମୃତ୍ୟୁ ଘଟିଛି । ତନ୍ମଧ୍ୟରୁ ଅସ୍ଵାଭାବିକ ଭାବରେ ମୃତ୍ୟୁ ଯେପରିକି ଶିକାର, ବିଷ ପ୍ରୟୋଗ, ବିଦ୍ୟୁତ ଆଘାତ, ରେଳ ଦୁର୍ଘଟଣା ଏବଂ ସଡକ ଦୁର୍ଘଟଣା ଘଟିଥିବା ହାତୀଙ୍କ ସଂଖ୍ୟା ୧୭୯ ରହିଥିବା ଜଣାପଡ଼ିଛି ।
ଇଟିଭି ଭାରତ, ଭୁବନେଶ୍ବର
