ଖୋର୍ଦ୍ଧା: ଲକଡାଉନ୍ ସମୟରେ ଚୋରା ଦେଶୀ ମଦ ବେପାରୀଙ୍କ ଦୌରାତ୍ମ୍ୟ ବୃଦ୍ଧି ପାଇବାରେ ଲାଗିଛି । ବାରମ୍ବାର ପୋଲିସ ଓ ଅବକାରୀ ବିଭାଗ ହାତରେ ଧରା ପଡୁଥିଲେ ସୁଦ୍ଧା ଚୋରା ଦେଶୀ ମଦ କାରବାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ତେବେ ବିଶେଷ ସୂତ୍ରରୁ ଖବର ପାଇ ଖୋର୍ଦ୍ଧା ଜିଲ୍ଲା ବାଲୁଗାଁ ଅବକାରୀ ବିଭାଗର ଏକ ଟିମ ବାଣପୁରର ବିଭିନ୍ନ ସ୍ଥାନରେ ଚଢାଉ କରିଥିଲା ।
ଅବକାରୀ ବିଭାଗର ଚଢାଉ
ଚଢାଉ ସମୟରେ 5 ଜଣ ଚୋରା ଦେଶୀ ମଦ ବେପାରୀଙ୍କୁ ଧରିବା ସହ ସେମାନଙ୍କ ଠାରୁ 204 ଲିଟର ଦେଶୀ ମଦ ଜବତ କରିଛନ୍ତି । ସେମାନଙ୍କ ଠାରୁ 4 ଟି ମୋଟର ସାଇକେଲ ମଧ୍ୟ ଜବତ କରିଛନ୍ତି । ଅବକାରୀ ବିଭାଗ 5 ଜଣ ଚୋରା ଦେଶୀ ମଦ ବେପାରୀଙ୍କ ନାମରେ ସୋମବାର ପୃଥକ ପୃଥକ ମାମଲା ରୁଜୁ କରି କୋର୍ଟ ଚାଲାଣ କରିଛି । ସମସ୍ତଙ୍କ ଘର ବାଣପୁର ଅଞ୍ଚଳ ବୋଲି ବାଲୁଗାଁ ଅବକାରୀ ବିଭାଗ ସୂଚନା ଦେଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
