ଖୋର୍ଦ୍ଧା: ଘରୋଇ ଗଣମାଧ୍ୟମ ସଂସ୍ଥା କରିଥିବା ଜମି ଜାଲିଆତି ଘଟଣାରେ କ୍ରାଇମ୍ବ୍ରାଞ୍ଚର ତଦନ୍ତ ଆରମ୍ଭ । ଖୋର୍ଦ୍ଧା ବେଗୁନିଆ ତହସିଲ ସାରୁଅ ଶିଳ୍ପାଞ୍ଚଳରେ ଘରୋଇ ଗଣମାଧ୍ୟମ ସଂସ୍ଥା କରିଥିବା ଜମି ଜାଲିଆତି ଘଟଣାରେ କ୍ରାଇମ୍ବ୍ରାଞ୍ଚ ତଦନ୍ତ ଆରମ୍ଭ କରିଛି।
ପୂର୍ବରୁ ଗଣମାଧ୍ୟମ ସଂସ୍ଥା ବିରୋଧରେ ଗ୍ରାମବାସୀ ଓ ଅନୁସୁଚିତ ଜନଜାତୀ ବ୍ୟକ୍ତି ବାଘମାରୀ ଥାନାରେ ଅଭିଯୋଗ କରିବା ପରେ ଜିଲ୍ଲା ପୋଲିସ ତଦନ୍ତ କରିଥିଲା । ପରେ ଜିଲ୍ଲାପାଳ ରାଜସ୍ବ ବିଭାଗକୁ ଏହାର କ୍ରାଇମବ୍ରାଞ୍ଚ ତଦନ୍ତ ପାଇଁ ସୁପାରିସ କରିଥିଲେ ।
ଫଳରେ ଗୁରୁବାର ସାରୁଅ ଠାରେ କ୍ରାଇମବ୍ରାଞ୍ଚର ତିନି ଜଣିଆ ଟିମ ପହଞ୍ଚି ଉଭୟ ଗ୍ରାମବାସୀ ଓ ସଂସ୍ଥାର କର୍ମଚାରୀଙ୍କୁ ପଚରାଉଚରା କରିଛି । ସାରୁଅ ମଲିକ ସାହିରେ ଥିବା କ୍ଲବ ଘରେ ସାରୁଅ ଗ୍ରାମର ଅଭିଯୋଗ କରିଥିବା ମୋଟ ଆଠ ଜଣଙ୍କୁ ପଚରାଉଚରା କରିଛି କ୍ରାଇମବ୍ରାଞ୍ଚ।
ଅଭିଯୋଗକାରୀଙ୍କ ଅଭିଯୋଗ ଅନୁସାରେ, ସେମାନଙ୍କ ଜମିକୁ ସଂସ୍ଥା ସାଗମାଛ ଦରରେ ଜାଲିଆତି କରି କିଣି ନେଇଛି । ସେହିପରି ସାଧାରଣ ଲୋକଙ୍କ ଠାରୁ ଅଧିକ ଟଙ୍କାରେ ଜମି କିଣିବା ବେଳେ ସେମାନଙ୍କ ଠାରୁ ମାତ୍ର ସାତ ହଜାର ଟଙ୍କା ଡିସିମିଲ ହିସାବରେ ଟଙ୍କା ଦେଇଛି ।
ସେପଟେ ଜମିକୁ ବାଟ ଓ ପାଣି ଛାଡିବା କଥା ମଧ୍ୟ କ୍ରାଇମବ୍ରାଞ୍ଚ ନିକଟରେ ଗ୍ରାମବାସୀ କହିଛନ୍ତି । ସେପଟେ କ୍ରାଇମବ୍ରାଞ୍ଚ ଅତିରିକ୍ତ ଡିଏସପି ଦିଲ୍ଲିପ ତ୍ରିପାଠୀ କହିଛନ୍ତି ତଦନ୍ତ ଆରମ୍ଭ ହୋଇଛି ଏବଂ ଏହା ଆଗକୁ ଜାରି ରହିବ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
