ଖୋର୍ଦ୍ଧା: 16ନଂ ଜାତୀୟ ରାଜପଥରେ ବେଆଇନ ଗୋରୁ ଚାଲାଣବେଳେ ସନ୍ଦେହରେ ଟ୍ରକ ଜବତ । ଟ୍ରକରୁ ୧୩ ଗୋରୁ ଉଦ୍ଧାର । ଏହାସହ ଦୁଇ ଯୁବକଙ୍କୁ ଅଟକ ରଖିଛି ପୋଲିସ । ଟ୍ରକଟି ଆନ୍ଧ୍ରପ୍ରଦେଶରୁ କୋଲକାତା ଯାଉଥିବା ଜଣାପଡିଛି ।
ବେଆଇନ ଗୋଚାଲାଣ 13 ଗୋରୁ ଉଦ୍ଧାର, ଦୁଇ ଅଟକ
ସୂଚନା ଅନୁଯାୟୀ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ୧୬ ନଂ ଜାତୀୟ ରାଜପଥ ଓଭର ବ୍ରିଜ୍ ନିକଟରେ ଏକ ଟ୍ରକରେ ଯାନ୍ତ୍ରିକ ତ୍ରୁଟି ଦେଖା ଦେବା ଯୋଗୁଁ ଅଟକି ରହିଥିଲା । ଟ୍ରକରୁ ଗୋରୁଙ୍କର ବିକଳ ଚିତ୍କାର ଶୁଣି ସ୍ଥାନୀୟ ଯୁବକମାନେ ଆସିଥିଲେ ଏବଂ ଗୋରୁ ଚାଲାଣକାରୀଙ୍କୁ ପଚାରିଥିଲେ । ସେଠାରେ ଭିଡ ବଢୁଥିବା ଦେଖି ଟ୍ରକରୁ ଗୋରୁ ଗୋଚାଲାଣକାରୀମାନେ ଚମ୍ପଟ ମାରିବାକୁ ଚେଷ୍ଟା କରିଥିଲେ । କିନ୍ତୁ ସେମାନଙ୍କୁ ସ୍ଥାନୀୟ ଲୋକ ଅଟକ ରଖି ଟାଙ୍ଗୀ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଟ୍ରକକୁ ଜବତ କରିବା ସହ ୧୩ଟି ଗୋରୁ ଉଦ୍ଧାର କରିଛି । ଏହି ଘଟଣାରେ ପୋଲିସ ଟ୍ରକ ସହ ୨ ଜଣଙ୍କୁ ଅଟକ ରଖି ତଦନ୍ତ ଚଳାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
