ଖୋର୍ଦ୍ଧା: ଆସନ୍ତାକାଲି (ସୋମବାର) ବିଜେଡିରେ ସାମିଲ ହେବେ ବେଗୁନିଆ କଂଗ୍ରେସ ନେତା ପ୍ରଦୀପ ସାହୁ । 1999 ମସିହାରୁ କଂଗ୍ରେସରେ ସାମିଲ ହୋଇ ଦୀର୍ଘଦିନ ହେବ ଦଳର ସକ୍ରିୟ ରହିବା ସହ ଏକାଧିକ ନିର୍ବାଚନରେ ପ୍ରତିଦ୍ବନ୍ଦିତା କରିଥିବା ପ୍ରଦୀପ ଶେଷରେ ଦଳ ଛାଡିବା ସହ ଶାସକ ବିଜେଡିରେ ସାମିଲ ହେବେ ।
2009 ବିଧାନସଭା ନିର୍ବାଚନରେ ବେଗୁନିଆ-ବୋଲଗଡ଼ ନିର୍ବାଚନ ମଣ୍ଡଳୀରୁ ପ୍ରାର୍ଥୀ ହୋଇ 34 ହଜାର 738 ଖଣ୍ଡ ଭୋଟ ପାଇଥିବାବେଳେ ,2014ରେ ଆମ ଓଡ଼ିଶା ଦଳରୁ ପ୍ରାର୍ଥୀ ହୋଇ 30 ହଜାର 559 ଖଣ୍ଡ ଭୋଟ ପାଇଥିଲେ । ପୁନର୍ବାର 2019 ନିର୍ବାଚନ କଂଗ୍ରେସ ପାର୍ଥୀ ଭାବେ ପ୍ରତିଦ୍ବନ୍ଦିତା କରିବା ସହ 53ହଜାର 130 ଖଣ୍ଡ ଭୋଟ ପାଇ ଦ୍ବିତୀୟ ସ୍ଥାନରେ ରହିଥିଲେ । ଆଜି ପ୍ରଦୀପ କଂଗ୍ରେସ ଦଳର ପ୍ରାଥମିକ ସଦସ୍ୟ ପଦ ଓ ଜିଲ୍ଲା ଉପସଭାପତି ପଦରୁ ଇସ୍ତଫା ଦେଇଥିବାବେଳେ ନିଜ ଇସ୍ତଫାପତ୍ର ପିସିସି ସଭାପତିଙ୍କୁ ପଠାଇଛନ୍ତି ।
ସେହିପରି ବେଗୁନିଆ ଓ ବୋଲଗଡ଼ ବ୍ଲକ କଂଗ୍ରେସ ଓ ଯୁବ କଂଗ୍ରେସ ସଭାପତି ମଧ୍ୟ ଦଳରୁ ଇସ୍ତଫା ଦେଇଛନ୍ତି । ତେବେ ଆସନ୍ତାକାଲି ବିଧିବଦ୍ଧ ଭାବେ ପ୍ରାୟ ଏକ ହଜାର ସହଯୋଗୀ ଓ କର୍ମୀଙ୍କୁ ନେଇ ରାଜ୍ୟ BJD କାର୍ଯ୍ୟାଳୟରେ ଯୋଗଦେବେ ବୋଲି କହିଛନ୍ତି ପ୍ରଦୀପ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
