ଭୁବନେଶ୍ବର: ଆସନ୍ତା ଶନିବାର ନୂଆଦିଲ୍ଲୀରେ ଅନୁଷ୍ଠିତ ହେବ ନୀତି ଆୟୋଗର ଅଷ୍ଟମ ସାଧାରଣ ପରିଷଦ ବୈଠକ । ବୈଠକରେ ଅଧ୍ୟକ୍ଷତାରେ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯୋଗ ଦେବେ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବୈଠକରେ ରାଜ୍ୟ ପୁଣି ଥରେ ସ୍ବତନ୍ତ୍ର ରାଜ୍ୟ ପାହ୍ୟା ଦାବି ଉଠାଇବ ଓଡିଶା । ସୂଚନା ଦେଇଛନ୍ତି ରାଜ୍ୟ ଯୋଜନା ଓ ସଂଯୋଜନା ମନ୍ତ୍ରୀ ରାଜେନ୍ଦ୍ର ପ୍ରସାଦ ଢୋଲକିଆ । ରାଜନୈତିକ ଉଦ୍ଦେଶ୍ୟ ରଖି ସ୍ବତନ୍ତ୍ର ରାଜ୍ୟ ପାହ୍ୟା କଥା କହି ବିଜେଡି ଭ୍ରମିତ କରୁଛି ବୋଲି କହିଛି ବିଜେପି ।
ଏହାବି ପଢନ୍ତୁ- New Parliament Building: ଉଦଘାଟନ ଉତ୍ସବରେ ସାମିଲ ହେବ BJD
ରାଜ୍ୟ ଯୋଜନା ଏବଂ ସଂଯୋଜନା ମନ୍ତ୍ରୀ ରାଜେନ୍ଦ୍ର ପ୍ରସାଦ ଢୋଲକିଆ କହିଛନ୍ତି ଯେ, ଆସନ୍ତା ନୀତି ଆୟୋଗ ବୈଠକରେ ରାଜ୍ୟ ପକ୍ଷରୁ ସ୍ୱତନ୍ତ୍ର ରାଜ୍ୟ ଦାବି ଉଠାଯିବ । ଦୁର୍ବିପାକ ପ୍ରବଣ ରାଜ୍ୟ ଓଡ଼ିଶା ସ୍ୱତନ୍ତ୍ର ରାଜ୍ୟ ପାହ୍ୟା ଓ କିମ୍ୱା ସ୍ୱତନ୍ତ୍ର ସହାୟତା ପାଇବାକୁ ଯୋଗ୍ୟ । ପୂର୍ବରୁ ଅନୁଷ୍ଠିତ 2 ଟି ନୀତି ଆୟୋଗ ବୈଠକରେ ରାଜ୍ୟ ସରକାର ଏହି ଦାବି କରିଆସୁଛନ୍ତି । ଚଳିତ ଥର ଏହି ଦାବିକୁ ଆହୁରି ଶାଣିତ ଏବଂ ବଳିଷ୍ଠ ଢଙ୍ଗରେ ଉପସ୍ଥାପନ କରାଯିବ । ଏହା ସହିତ ସବୁ ପଞ୍ଚାୟତରେ ବ୍ୟାଙ୍କ ଶାଖା ଓ ଗ୍ରାମାଞ୍ଚଳରେ 2G ଟାୱାର ବଦଳରେ 3G ଓ 4G ଟାୱର ବସାଇବାକୁ ଦାବି କରାଯିବ । ରାଜ୍ୟ ସରକାର ଏନେଇ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବେ ।
ସେହିପରି ସମସ୍ତ ସରକାରୀ ଯୋଜନାର ହିତାଧିକାରୀଙ୍କୁ ଆର୍ଥିକ ସହାୟତା ଡିବିଟି ଜରିଆରେ ଦିଆଯାଉଛି । ସବୁ ଗ୍ରାମପଞ୍ଚାୟତରେ ବ୍ୟାଙ୍କ ଶାଖା ନଥିବାରୁ ହିତାଧିକାରୀଙ୍କୁ ସହାୟତା ପ୍ରଦାନରେ ସମସ୍ୟା ସୃଷ୍ଟି ହେଉଛି । ତେଣୁ ସମସ୍ତ ପଞ୍ଚାୟତରେ ବ୍ୟାଙ୍କ ଶାଖା ଓ ବ୍ୟାଙ୍କିଂ ସୁବିଧା ପହଞ୍ଚାଇବାକୁ ଦାବି କରାଯିବ । ଏହା ସହ ରାଜ୍ୟ ପକ୍ଷରୁ କୋଇଲା ରାଜଭାଗ ବୃଦ୍ଧି, ରେଳବାଇ, ବିପର୍ଯ୍ୟୟ ନିରୋଧୀ ଭିତ୍ତିଭୂମି ପାଇଁ ସହାୟତା ପରି ପ୍ରସଙ୍ଗକୁ ରାଜ୍ୟ ସରକାର ଉଠାଇ ପାରନ୍ତି । ଏନେଇ ଯୋଜନା ଓ ସଂଯୋଜନ ପକ୍ଷରୁ ସ୍ବତନ୍ତ୍ର ପ୍ରସ୍ତୁତି କରାଯାଇଛି ।
ଏହାବି ପଢନ୍ତୁ- BJD ଫୋକସରେ ପଶ୍ଚିମ ଓଡିଶା; 5 ଲୋକସଭା ଓ 31 ବିଧାନସଭା ଜିତିବ ଦଳ କହିଲେ ସୁଶାନ୍ତ
ଏନେଇ ଜବାବ ରଖିଛନ୍ତି ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ । ସେ କହିଛନ୍ତି ନୀତି ଆୟୋଗରେ ସ୍ବତନ୍ତ୍ର ରାଜ୍ୟ ମାନ୍ୟତା ଦାବି ଉଠାଇବା କଥା କହିବା, ଏକ ଅବାସ୍ତବ କଥା । ବାରମ୍ବାର ଏହି କଥା ବିଜେଡି ଦୋହରାଉଛି । ରାଜନୈତିକ ଉଦେଶ୍ୟ ରଖି ଭ୍ରମିତ କରୁଛି ବିଜେଡି । ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ମିଳିପାରିବ ନାହିଁ ବୋଲି କଂଗ୍ରେସ ସରକାର ସମୟରେ ସ୍ପଷ୍ଟ ହୋଇଥିଲା । ପ୍ଲାନିଂ କମିଶନ ସମୟରେ ଏହି ନିଷ୍ପତ୍ତି ହୋଇଥିଲା । ସ୍ବତନ୍ତ୍ର ରାଜ୍ୟ ପାହ୍ୟା ଆଉ କେଉଁ ରାଜ୍ୟକୁ ମିଳିବ ନାହିଁ ବୋଲି ନୀତି ଆୟୋଗ ତାହା ଦୋହରାଇଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ଯେଉଁ କାରଣରୁ ସ୍ବତନ୍ତ୍ର ରାଜ୍ୟ ପାହ୍ୟା କଥା ରାଜ୍ୟ କହୁଛି, ତାହା ଠାରୁ ଅଧିକ ଆର୍ଥିକ ସହାୟତା କେନ୍ଦ୍ର ଯୋଗାଉଛି । ଟ୍ୟାକ୍ସ କଥା ହେଉ କିମ୍ବା ସହାୟତା କ୍ଷେତ୍ରରେ ବ୍ୟାପକ ଭାବେ ସହାୟତା ରାଶି ବଢେଇ ଦିଆଯାଇଛି । ରେଳବାଇ କ୍ଷେତ୍ରକୁ ଉଦାହରଣ ଭାବେ ନିଆଯାଇପାରେ । 800 କୋଟି ପାଉଥିବା ବେଳେ ଏବେ ରାଜ୍ୟ 12ରୁ 15 ହଜାର କୋଟି ପାଉଛି । ନିର୍ବାଚନ ଆସିଲେ ରାଜନୈତିକ ଭେଳିକି କରେ ବିଜେଡି । ରାଜନୈତିକ ଭ୍ରମ ବା ଚଞ୍ଚକତା କରିବା ବିଜେଡିର ଅଭ୍ୟାସ । ମୁଖ୍ୟମନ୍ତ୍ରୀଙ୍କୁ ସମ୍ନାରେ ଛିଡା କରି ପଛରେ ଥିବା ବାବୁ ମାନେ ତାଙ୍କୁ ଅପମାନିତ କରିବାକୁ ଚେଷ୍ଟା କରୁଛନ୍ତି । ଏହା ଏକ ଦୁର୍ଭାଗ୍ୟଜନକ କଥା ।
ଇଟିଭି ଭାରତ, ଭୁବନେଶ୍ବର
