ଭୁବନେଶ୍ବର: ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିଜେପି ବିଜେଡି ମଧ୍ୟରେ କଥା କଟାକଟି । ବିଜେପି ଶାସିତ ରାଜ୍ୟ ତୁଳନାରେ ଓଡିଶାର ଆଇନ ଶୃଙ୍ଖଳା ପରିସ୍ଥିତି ଭଲ ରହିଥିବା ନେଇ ବିଜେଡି ମୁଖପାତ୍ର ଶ୍ରୀମୟୀ ମିଶ୍ର କହିଥିବା ବେଳେ ଏନେଇ ପ୍ରତିକ୍ରିୟା ରଖିଛି ବିଜେପି । ଶାସକ ଦଳର ମୁଖପାତ୍ର ମାନେ ନିଜ ରାଜ୍ୟ ଉପରେ କରାଯାଉଥିବା ପ୍ରଶ୍ନର ଉତ୍ତର ରଖନ୍ତୁ ବୋଲି କହିଲେ ବିଜେପି ମୁଖପାତ୍ର ସୋନାଲି ସାହୁ ।
ସୋନାଲି ସାହୁ କହିଛନ୍ତି ଯେ, ''ଶାସକ ଦଳର ମୁଖପାତ୍ର ମାନେ ନିଜ ରାଜ୍ୟ ଉପରେ କରାଯାଉଥିବା ପ୍ରଶ୍ନର ଉତ୍ତର ରଖନ୍ତୁ ଅନ୍ୟ ରାଜ୍ୟ ଉଦାହରଣ ବନ୍ଦ କରନ୍ତୁ । ଯେତେବେଳେ ପ୍ରଶ୍ନ କଲେ ନିଜ କଥା ନକହି ଅନ୍ୟ ରାଜ୍ୟ କଥା କୁହାଯାଉଛି । ପ୍ରତ୍ୟେକ ଦିନ ଏଠି ହିଂସା, ହତ୍ୟା, ଚୋରି, ରାହଜାନୀ ଭଳି ଅପରାଧ ଘଟୁଛି ଏହା ଦର୍ଶାଉଛି ଆଇନଶୃଙ୍ଖଳା କିପରି ରହିଛି । ଦିନ ଦ୍ବିପହରେ ମନ୍ତ୍ରୀ ନବ ଦାସଙ୍କୁ ହତ୍ୟା କରାଗଲା । ସେହି ଜାଗାରେ ଜଣେ ନାବାଳକଙ୍କୁ ଅପହରଣ ପରେ ହତ୍ୟା କରାଗଲା । ଏପରି ଅନେକ ପ୍ରସଙ୍ଗ ରହିଛି ।
ଏ ପ୍ରସଙ୍ଗରେ ନକହି ଅନ୍ୟ ରାଜ୍ୟ କଥା କହି ଭୁଲାଉଛନ୍ତି ବିଜେଡି ମୁଖପାତ୍ର । ଏହା ଦର୍ଶାଉଛି ଶାସକ ଦଳ ଭୟଭୀତ ଅଛି, ଯେଉଁଥିପାଇଁ ଏଭଳି ଉତ୍ତର ରଖୁଛନ୍ତି । ବିଜୁ ଜନତା ଦଳ ମୁଖପାତ୍ର ମାନେ ଭୁଲିଯାଇଛନ୍ତି ଯେ ସତ୍ତାକୁ ପ୍ରଶ୍ନ କରାଯାଏ । ନିଜ ରାଜ୍ୟରେ କଣ ହେଉଛି ତାହା ନକହି ଅନ୍ୟ ରାଜ୍ୟ କଥା କୁହନ୍ତୁ ନାହିଁ । ଲମ୍ବା ସମୟ ଧରି ଶାସନ ଗାଦିରେ ବସିବା ପରେ ଆପଣ ଉତ୍ତର ବି ରଖିପାରୁନାହାନ୍ତି । ଆମେ ପଚାରୁଥିବା ପ୍ରଶ୍ନର ଉତ୍ତର ନଥିବାରୁ ଅନ୍ୟ ରାଜ୍ୟ କଥା କହୁଛନ୍ତି । ସେପରି ହେଲେ ନିଜ ଦଳକୁ ରାଷ୍ଟ୍ରୀୟ ଦଳ ଘୋଷଣା କରନ୍ତୁ ।''
ସେହିପରି ବିଜେଡ଼ି ସାଂସଦ ସସ୍ମିତ ପାତ୍ରଙ୍କ ପ୍ରତିକ୍ରିୟାରେ ବିଜେପି ମୁଖପାତ୍ର ମନୋଜ ମହାପାତ୍ର ସାମ୍ବାଦିକ ସମ୍ମିଳନୀ କରିଥିଲେ । ସେ କହିଥିଲେ,'' ସୁପ୍ରିମକୋର୍ଟ ଓଡିଶା ସରକାରଙ୍କ ବେଦାନ୍ତ ପ୍ରୀତିର ପର୍ଦ୍ଦାଫାସ କରିଛନ୍ତି । ଏନେଇ ବିଜେପି ପକ୍ଷରୁ ସମ୍ବିତ ପାତ୍ର ଜବାବ ରଖିଥିଲେ । ଏହାର କାଉଣ୍ଟର ବିଜେଡି ପ୍ରବକ୍ତା ସସ୍ମିତ ପାତ୍ର ଦେଇଥିଲେ । ଯାହା ଚୋର ମଚାଏ ସୋର ପ୍ରାକ୍ଟିସ ଜାରି ରଖିଥିବା ମନେ ହେଉଛି । ସସ୍ମିତ ବାବୁ ଭୁଲିଯାଇଛନ୍ତି 2004 ନିର୍ବାଚନ ପୂର୍ବରୁ ନବୀନ ବାବୁ ନିୟମଗିରି ପାହାଡ଼କୁ ବେଦାନ୍ତ ହାତରେ ଟେକିଦେଇଥିଲେ । ଯେତେବେଳେ ଏହାକୁ ନେଇ ଆନ୍ଦୋଳନ ଉଠିଲା ସେତେବେଳେ ଏହାକୁ ଡାଇଭର୍ଟ କରିବାକୁ ବେଦାନ୍ତ ବିଶ୍ଵବିଦ୍ୟାଳୟ ଘୋଷଣା ହୋଇଥିଲା । ''
''ତତ୍କାଳୀନ ରାଜସ୍ବ ମନ୍ତ୍ରୀଙ୍କୁ ଦୋଷ ଦେଉଛି ବିଜେଡି । କିନ୍ତୁ ସେମାନେ ଭୁଲିଯାଉଛନ୍ତି ଯେ ତାଙ୍କ ସରକାରରେ ମନ୍ତ୍ରୀଙ୍କଠୁ ସଚିବଙ୍କ ପାୱାର କେତେ । ତତ୍କାଳୀନ ରାଜସ୍ବ ମନ୍ତ୍ରୀ ମନମୋହନ ସାମଲଙ୍କୁ ଯଦି ଏଥିପାଇଁ ଦୋଷୀ କରାଯାଉଛି ତେବେ ସେତେବେଳେ ଖାଦ୍ୟ ସୁରକ୍ଷା ମନ୍ତ୍ରୀ ମଧ୍ୟ ଥିଲେ ମନମୋହନ ସାମଲ । 2 ଟଙ୍କିଆ ଚାଉଳ ପାଇଁ ଶ୍ରେୟ ନବୀନ ବାବୁ କାହିଁକି ନେଉଛନ୍ତି । ଲୋକପାଳ ଓ ହାଇକୋର୍ଟ ରାୟ ଶୁଣାଇବା ପରେ କଣ ପାଇଁ ସୁପ୍ରିମକୋର୍ଟ ଯାଇଥିଲ, ତାହା ଜବାବ ରଖିବା ଦରକାର ଶାସକ ଦଳ । ଯିଏ ଚୋର ସେ ଅଧିକ ଶବ୍ଦ କରେ ଏହା ଏଥିରୁ ସ୍ପଷ୍ଟ ଭାବେ ଜଣାପଡୁଛି । ''
ଇଟିଭି ଭାରତ, ଭୁବନେଶ୍ବର
