ଖୋର୍ଦ୍ଧା: ଜିଲ୍ଲାର ଧାନମଣ୍ଡିକୁ ମଳିପଡା ଅନ୍ତର୍ଗତ କଁପୁର ସେବା ସମବାୟ ସମିତିରେ ଜିଲ୍ଲାପାଳ ଉଦଘାଟନ କରିଥିଲେ । ଏନେଇ ଦୁଇଜଣ ଚାଷୀ ଧାନ ନେଇ ଆସିଥିଲେ ମଣ୍ଡିକୁ । ମାତ୍ର, ଧାନର ମାନ କମ ଥିବା କହି ମିଲର ଚାଷୀଙ୍କ ଠାରୁ ଧାନ କିଣିନଥିଲା । ଫଳରେ ନିରାଶ ହୋଇ ଚାଷୀ ଦୁଇଜଣ ଫେରିଥିଲେ । ଏହାର ପ୍ରତିବାଦ ସହ ଖୋର୍ଦ୍ଧା ଜିଲ୍ଲାରେ ତୁରନ୍ତ ସମସ୍ତ ମଣ୍ଡି ଖୋଲିବା, ଟୋକନ ଅବଦ୍ଧି ବୃଦ୍ଧି କରିବା ସହ ମିଲରଙ୍କ ମନମାନି ବିରୋଧର ବିଜେପି କୃଷକ ମୋର୍ଚ୍ଚା ସହ କଁ ପୁର ସେବା ସମବାୟ ସମିତିର ଶତାଧିକ ଚାଷୀ ଖୋର୍ଦ୍ଧା ଜିଲ୍ଲାପାଳଙ୍କୁ ଦାବିପତ୍ର ଦେଇଛନ୍ତି ।
ସରକାରଙ୍କ ଗାଇଡଲାଇନ ଅନୁଯାଇ ଖୋର୍ଦ୍ଧା ଜିଲ୍ଲାରେ ସମସ୍ତ ମଣ୍ଡି ଖୋଲାଯିବା ନେଇ ଅତିରିକ୍ତ ଜିଲ୍ଲାପାଳ ସୂଚନା ଦେଇଛନ୍ତି । ସେହିପରି ଆଜି(ଗୁରୁବାର) ଚାଷୀକୁ ଧାନର ସହାୟକ ମୂଲ୍ୟ ବୃଦ୍ଧି, ତୁରନ୍ତ ମଣ୍ଡି ଖୋଲିବା ଭଳି ସମସ୍ୟାର ତୁରନ୍ତ ସମାଧାନ କରିବାକୁ ଦାବିକରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି ନବନିର୍ମାଣ କୃଷକ ସଙ୍ଗଠନ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
